Kirtland Tampeļ Eo Ej Aje

Ālkin enan̄in jilu iiō ko in kijejeto in jerbal, Kirtland Tampeļ eo ekar dedeļo̧k. Rikanaan Josep ekar karuwaineneik Armej ro Rekwojarjar n̄an juon kweilo̧k āinjuon n̄an aje tampeļ eo. Ekar kōm̧m̧ane juon jar ejenolo̧k im leļo̧k n̄an tampeļ eo n̄an Irooj. Enaaj erom m̧weo ekwojarjar im̧ōn Irooj.

Armej ro Rekwojarjar, 1:235

M̧oktaļo̧k ilo jibbon̄ in kweilo̧k eo, buki Armej ro Rekwojarjar raar kaobrak ilowaan tampeļ eo. Ke aolep jea ko raar obrak, armej ro raar jutak ilo mejān kōjām eo im inam̧ōj, im reilo̧k jen wintō ko. Aolep raar lem̧ōņōņō n̄an lo an tampeļ eo kar aje.

Armej ro Rekwojarjar, 1:235–36

Josep ej riiti juon jar n̄an aje eo an tampeļ eo. Ekar jiron̄ Irooj bwe Armej ro Rekwojarjar raar pokake E. Ekar kajjitōk ippān Irooj n̄an bōk tampeļ eo āinwōt m̧weo Im̧ōn.

Katak im Bujen Ko 109:1–5

Josep ekar jar bwe aolep ro im raar itok n̄an tampeļ eo ren en̄jake kajoor eo an Irooj n̄an jeļā ej im̧ōn Irooj.

Katak im Bujen Ko 109:13

Josep ekar barāinwōt jar bwe n̄e Armej ro Rekwojarjar raar jerawiwi, ren maron̄ ukweļo̧k ilo iien eo em̧ōkajtata. Ekar kajjitōk ippān Irooj n̄an leļo̧k n̄an er kajoor n̄an kwaļo̧k gospel eo An ilo aolepān laļ in. Ālkin jar eo, juon kuwaer ekar al juon al kāāl kar ņaetan “Jetōb An Anij.” Armej ro raar obrak kōn m̧ōņōņō. Raar jutak im nebar Irooj.

Katak im Bujen Ko 109:21–32; Al Ko Al In Ajri, nō. 2; Armej ro Rekwojarjar, 1:237

Elōn̄ armej raar lo enjeļ ro ilo tampeļ eo raan eo. Raar lo meram eo eromaak ej wanlaļtak jān lan̄ n̄an ilowaan tampeļ eo. Jet armej raar ba ekar āinwōt juon kōdo̧; ro jet raar ba ekar āinwōt kijeek. Er aolep raar en̄jake bwe tampeļ eo ekar juon jikin ekwojarjar. Ilo m̧ool ekar kiiō m̧weo im̧ōn Irooj.

Armej ro Rekwojarjar, 1:237