“Elijah Able,” Bwebwenato ko an Katak im Bujen Ko (2024)
“Elijah Able,” Bwebwenato ko an Katak im Bujen Ko
1838
Elijah Able
Juon mijen kōn tōmak im peran
Irooj ekar kūr juon em̧m̧aan kar etan Elijah Able n̄an erom̧ juon mijenede. Elijah ekar katakin Eunice im Charles Franklin kōn gospel eo an Jisōs Kraist. Ekar jiron̄ er kōn Bok in Mormon im kōn Rikanaan Josep Smith. Eunice im Charles raar tōmak ta eo ekar katakin im kōņaan kobatok ilo Kabun̄ in. Elijah ekar peptaiji er.
Armej ro Rekwojarjar, 1:316
Elijah ekar ilo̧k n̄an kwaļo̧k gospel eo ilo bar juon bukwōn. Juon bon̄, jejjo allōn̄ tokālik, ekar wōr juon an ettōņak kōn eo m̧ōttan Eunice. Ilo ettōņak eo, Eunice ekar jako an tōmak bwe Bok in Mormon ekar m̧ool im bwe Josep Smith ekar juon rikanaan. Ke Elijah ekar ruj, ekar ro̧o̧l ilo iien eo em̧ōkaj n̄an lale Eunice.
Katak im Bujen Ko 75:27; Armej ro Rekwojarjar, 1:315–16
Eunice ekar bwilōn̄ in lo Elijah ilo kōjām eo an! Ettōņak eo an Elijah ekar jim̧we. Eunice ekar jab tōmak n̄an jidik ilo Bok in Mormon ak Josep Smith.
Armej ro Rekwojarjar, 1:317
Elijah ekar kajjitōk ippān Eunice n̄an itok n̄an ron̄jake an kwaļo̧k naan ilo juon jikuuļ. Ke liin ekar ron̄ naan ko an Elijah, liin ekar bar juon alen en̄jake Jetōb Kwojarjar. Liin ekar jeļā bwe gospel in em̧ool!
Armej ro Rekwojarjar, 1:317
Elijah ekar kallim̧uri Eunice bwe enaaj kar bar ro̧o̧lļo̧k ilo ruo wiik n̄an bar kwaļo̧k naan. Bōtaab jet armej ilo bukwōn eo raar jab kōņaan bwe en bar ro̧o̧lļo̧k. Ālkin an Elijah em̧m̧akūt, raar jino jiron̄ aolep bwe Elijah ekar m̧anm̧an armej. Raar leļo̧k juon mennin nebar n̄an jabdewōt eo ekar loe.
Armej ro Rekwojarjar, 1:318
Eunice ekar jeļā bwe armej ro raar riab kōn Elijah. Ejjan̄in kar m̧an jabdewōt. Ekar juon em̧m̧aan em̧m̧an im juon rikarejeran Anij. Liin ekar jeļā riab ko aer reban kar kabōjrak Elijah jān an itok n̄an bukwōn eo aer n̄an kwaļo̧k naan Eunice ekar jiron̄ armej ro bwe Elijah enaaj bar ro̧o̧lļo̧k. “Anij enaaj kōjparok e,” liin ekar ba.
Armej ro Rekwojarjar, 1:318
Elijah ekar bar ro̧o̧lļo̧k. Ekar itok n̄an ejja jikuuļ eo wōt ijo ekar kwaļo̧k naan ie m̧oktaļo̧k. Ekar obrak kōn armej ro im raar kōņaan kalbuuji. Elijah ekar jutak im̧aan jar eo. Ekar ba eļan̄n̄e raar kōņaan kalbuuji, rej aikuj kōm̧m̧an kiiō, m̧okta jān an kar jino kwaļo̧k. Eļan̄n̄e jaab, rej aikuj kōtļo̧k an kwaļo̧k.
Armej ro Rekwojarjar, 1:318
Ejjeļo̧k juon ekar em̧m̧akūt. Elijah eka kōttar, bōtaab jarlepju ro rekar jab keroro. Elijah ekar al juon al, ba juon jar, im kar kwaļo̧k gospel eo an Jisōs Kraist. Kajoor eo an Anij ekar pād ippān. Ālkin an dedeļo̧k an kwaļo̧k, ekar kōnono n̄an eo m̧ōttan Eunice im Charles im kar wōnm̧aanļo̧k wōt kōn mijen eo an ilo aenōm̧m̧an.
Armej ro Rekwojarjar, 1:319