Laumālie Māʻoniʻoní

ʻOku fengāueʻaki uouangataha ʻa e Laumālie Māʻoniʻoní mo e Tamai Hēvaní mo Sīsū Kalaisi, ʻo fakahoko ha ngaahi fatongia ke tokoniʻi kitautolu ke tau moʻui angatonu mo maʻu ʻa e ngaahi tāpuaki ʻo e ongoongoleleí.

ʻOkú Ne “fakamoʻoniʻi ʻa e Tamaí mo e ʻAló” mo fakahā mo akoʻi “hono moʻoni ʻo e ngaahi meʻa kotoa pē.” Te tau toki lava pē ʻo maʻu ha fakamoʻoni pau ʻo e Tamai Hēvaní mo Sīsū Kalaisi ʻi he mālohi ʻo e Laumālie Māʻoniʻoní. Ko ʻEne fetuʻutaki ki hotau laumālié ʻoku mātuʻaki pau ange ia ʻi ha toe faʻahinga fetuʻutaki te tau lava ke maʻu ʻaki hotau ngaahi ongo fakanatulá.

ʻI heʻetau feinga ke nofo maʻu ʻi he hala ʻoku fakatau ki he moʻui taʻengatá, ʻe lava ke tataki kitautolu ʻe he Laumālie Māʻoniʻoní ʻi heʻetau ngaahi filí mo maluʻi kitautolu mei ha fakatuʻutāmaki fakatuʻasino mo fakalaumālie.

Te tau lava ʻiate Ia ʻo maʻu ʻa e ngaahi meʻafoaki ʻo e Laumālié ke ʻaonga kiate kitautolu pea mo kinautolu ʻoku tau ʻofa mo tokoniʻí. Ko Ia ʻa e Fakafiemālié. ʻE lava ʻe he fanafana ʻa e Laumālié ʻo fakanonga ʻetau manavasiʻí, lolou ʻa e ngaahi loto-hohaʻa ʻo ʻetau moʻuí, mo fakafiemālieʻi kitautolu ʻi heʻetau mamahí, ʻo hangē ko e leʻo fakanonga ʻa ha mātuʻa ʻofa ki ha fānau ʻoku tangi. ʻE lava ʻe he Laumālie Māʻoniʻoní ʻo fakafonu kitautolu ʻaki “ʻa e ʻamanaki leleí mo e ʻofa haohaoá” mo “akoʻi [kitautolu] ʻi he ngaahi meʻa fakamelino ʻo e puleʻangá.”

ʻI Hono mālohí ʻoku fakamāʻoniʻoniʻi kitautolu ʻi he taimi ʻoku tau fakatomala aí, maʻu ʻa e ngaahi ouau ʻo e papitaisó mo e hilifakinimá, pea tuʻu maʻu ʻi heʻetau ngaahi fuakavá.

Ko Ia ʻa e Laumālie Māʻoniʻoni ʻo e Talaʻofá. ʻI he fatongia ko ʻení, ʻokú Ne fakapapauʻi ai ko e ngaahi ouau ʻo e lakanga fakataulaʻeiki kuo tau maʻú pea mo e ngaahi fuakava kuo tau fakahokó, ʻoku tali ia ʻe he ʻOtuá. ʻOku makatuʻunga ʻa hono tali ko ʻení mei he hokohoko atu ʻetau faivelengá.

ʻE lava ke ongoʻi ʻa e Laumālie Māʻoniʻoní ʻe he tokotaha kotoa pē ʻoku fekumi fakamātoato ki he moʻoní, pea tataki ai kinautolu kia Sīsū Kalaisi mo ʻEne ongoongoleleí. Ka neongo ia, ʻoku ʻatā ʻa e kakato ʻo e ngaahi tāpuaki kuo foaki ʻo fakafou ʻi he Laumālie Māʻoniʻoní, kiate kinautolu pē ʻoku nau maʻu ʻa e meʻafoaki ʻo e Laumālie Māʻoniʻoní mo moʻui tāú.

Hili hano papitaiso ʻo ha taha ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku hilifaki ʻe ha taha maʻu Lakanga Taulaʻeiki Faka-Melekisēteki ʻe toko taha pe tokolahi ange honau nimá ki he ʻulu ʻo e tokotahá pea fakamaʻu ia ko ha mēmipa ʻo e Siasí ʻi ha ouau lakanga fakataulaʻeiki toputapu. ʻI he konga ko ʻeni ʻo e ouaú ʻoku ui ko e hilifakinimá, ʻoku foaki ki he tokotahá ʻa e meʻafoaki ʻo e Laumālie Māʻoniʻoní.

ʻOku kehe pē ʻa e meʻafoaki ia ʻo e Laumālie Māʻoniʻoní mei he ivi tākiekina ʻo e Laumālie Māʻoniʻoní. Kimuʻa ʻi he papitaisó, ʻe lava ke ongoʻi ʻe ha taha ʻa e ivi tākiekina ʻo e Laumālie Māʻoniʻoní ʻi he taimi ki he taimi, pea ʻoku fakafou ʻi he tākiekina ko iá ʻa ʻene lava ke maʻu ha fakamoʻoni ki he moʻoní. Hili hono maʻu ʻa e meʻafoaki ʻo e Laumālie Māʻoniʻoní, ʻoku maʻu leva ʻe he tokotahá ʻa e totonu ki he takaua maʻu pē ʻo e mēmipa ko ia ʻo e Toluʻi ʻOtuá ʻo kapau ʻokú ne tauhi ʻa e ngaahi fekaú.