Fakamaau Totonú

ʻI he ngaahi lea fakafolofolá, ko e fakamaau totonú ko e fono taʻefeliliuaki ia ʻokú ne ʻomi e ngaahi nunuʻa ʻo e ngaahi ngāué. Koeʻuhí ko e fono ʻo e fakamaau totonú, ʻoku tau maʻu ai ha ngaahi tāpuaki ʻi he taimi ʻoku tau talangofua ai ki he ngaahi fekau ʻa e ʻOtuá. ʻOku toe fiemaʻu foki ʻe he fono ʻo e fakamaau totonú ke totongi ha tautea ki he angahala kotoa pē ʻoku tau faí.

ʻI hono fakahoko ʻe he Fakamoʻuí ʻa ʻEne Fakaleleí, naʻá Ne toʻo kiate Ia ʻetau ngaahi angahalá. Naʻá Ne lava ʻo “fakakakato ʻa e ngaahi tuʻutuʻuni ʻa e fonó” koeʻuhí naʻá Ne fakamoʻulaloaʻi Ia ki he tautea ʻoku fiemaʻu ʻe he fonó ki heʻetau ngaahi angahalá. ʻI hono fakahoko iá, naʻá Ne “totongi ʻa e ngaahi fie maʻu ʻa e fakamaau totonú” mo foaki ʻa e ʻaloʻofá ki he tokotaha kotoa pē ʻoku fakatomala mo muimui kiate Iá. Koeʻuhí kuó Ne totongi huhuʻi ʻetau ngaahi angahalá, he ʻikai ke tau toe mamahi ʻi he tautea ko iá kapau te tau fakatomala.