Kātaki ki he Ngataʻangá

Naʻe aʻusia ʻe Sīsū Kalaisi ʻa e sivi maʻongoʻonga taha ʻo e kātaki ki he ngataʻangá ʻi Heʻene mamahi maʻa ʻetau ngaahi angahalá lolotonga ʻEne Fakaleleí. Lau ʻa e Luke 22:42 mo e 3 Nīfai 11:11. Ko e hā e meʻa ʻokú ke ako mei he sīpinga ʻa Kalaisí ʻe lava ʻo tokoni ke ke kātaki ki he ngataʻangá? Te ke fakafalala fēfē ki Heʻene Fakaleleí ʻi hoʻo fāifeinga ke kātaki ki he ngataʻangá pea maʻu e moʻui taʻengatá? Hiki ha faʻahinga ueʻi ʻokú ke maʻu, pea ngāueʻi leva ia.

Mahalo ʻe hangē ʻa e kātaki ki he ngataʻangá ko ha meʻa ia ʻe fuʻu fuoloa ʻaupitó—ʻo fuʻu fuoloa fau ʻe hangē ka taʻemalavá ia. Ka ʻi hoʻo manatuʻi ʻoku hoko fakakongokonga ʻa e kātaki ki he ngataʻangá, he ʻikai ngali fuʻu faingataʻa ia. Naʻe akonaki ʻa Palesiteni Tōmasi S. Monisoni ʻo pehē: “Fekumi ki ha fakahinohino fakalangi he ʻaho ki he ʻaho. ʻOku faingataʻa e sio fakalūkufuá ki he moʻuí; ka ʻoku faingofua hono fuesia fakakongokongá. Te tau takitaha lava ‘o faitotonu ‘i he ‘aho pē taha—pea tānaki mai e ‘aho hokó mo e ‘aho hokó—kae ‘oua kuo tau moʻui ‘o tataki kitautolu ‘e he Laumālié he toenga ʻetau moʻuí, ko ha moʻui ʻoku ‘ofi ki he ‘Eikí, ko ha moʻui fonu ngāue lelei mo angatonu.” Ko e hā ha ngaahi fili fakaʻaho te ke lava ʻo fai ke tauhi moʻoni ai ki he ongoongolelei ʻo Sīsū Kalaisí? ʻE tokoniʻi fēfē nai koe ʻe he ngaahi fili ko iá ke ke kātaki ki he ngataʻangá? Mahalo te ke lava ʻo fili ha ʻulungaanga faka-Kalaisi te ke saiʻia ke fakatupulaki pea fakaafeʻi leva ʻa e ʻEikí ʻi he faʻa lotu ke tokoni atu ke ke maʻu ia ʻi hoʻo feinga ke muimui kiate Ia he ʻaho takitaha.

ʻOku akoʻi mai ʻe he folofolá te tau maʻu e moʻui taʻengatá ʻi he kātaki ki he ngataʻangá. Ka ʻoku fōtunga fēfē ʻa e kātaki ki he ngataʻangá? Lau fakataha ʻa e Loma 2:7; 2 Nīfai 31:19–20; mo e Tokāteline mo e Ngaahi Fuakava 59:23, pea aleaʻi leva e meʻa ʻokú ke ako mei he ngaahi veesi ko ʻení fekauʻaki mo e founga ke kātaki ki he ngataʻangá. Te mou lava foki ʻo lau pe hivaʻi fakakulupu e himi “Tau Laka Atu he Tui Kia Kalaisi” (Ngaahi Himí, fika 35) pea talanoaʻi leva ha faʻahinga fakalea pē ʻokú ne ueʻi koe ke ke laka ki muʻa pea maʻu e meʻaʻofa ʻo e moʻui taʻengatá.

ʻI he pōpoaki ʻa ʻEletā Tieta F. ʻUkitofa ko e “Have We Not Reason to Rejoice?” Naʻá ne akonaki ai ʻoku ʻikai fiemaʻu ia ke tau kātaki ki he ngataʻangá ʻiate kitautolu pē. Naʻá ne pehē: “Ko e kātaki ki he ngataʻangá ʻoku ʻikai ko ha meʻa fakafiefiemālie pē ʻi hono kātakiʻi ʻa e ngaahi tūkunga faingataʻa ʻo e moʻuí pe ʻkoloa pē ke kātakí.ʼ ʻOku longomoʻui ʻetau tui fakalotú ʻi hono tokoniʻi e fānau ʻa e ʻOtuá ke fou ʻi he hala hangatonu mo fāsiʻí ke fakatupulaki e tuʻunga kakato ʻoku nau malavá lolotonga e moʻuí ni ke toe foki kiate Ia ʻi ha ʻaho.” Mamata fakataha ʻi ha konga ʻo e pōpoaki ʻa ʻEletā ʻUkitofá ʻi he vitiō “Endure to the End” (2:05). Vahevahe leva ha ngaahi fakakaukau ke fetokoniʻaki ke nofo maʻu ʻi he hala ʻoku fakatau ki he moʻui taʻengatá. Te mou lava foki ʻo fevahevaheʻaki ha ngaahi aʻusia ʻe niʻihi ʻo e taimi ne tokoniʻi ai koe ʻe ha taha ke ke kātekina faivelenga ha faingataʻa.

Hepelū 6:12; 10:23; 1 Nīfai 8:30; 15:24; Tokāteline mo e Ngaahi Fuakava 63:47; 101:35; 121:7–8, 29; Ngaahi Tefito ʻo e Tui 1:13

Dale G. Renlund, “Tukupā Taʻeueʻia kia Sīsū Kalaisi,” Liahona, Nōvema 2019, 22–25

Steven J. Lund, “Tuʻunga Fakaākonga Tuʻuloá,” Liahona, Nōvema 2022, 89–91

Henry B. Eyring, “The Reward of Enduring Well,” Ensign, July 2017, 4–5

Russell M. Nelson, “Endure and Be Lifted Up,” Ensign, May 1997, 70–72