Tomuʻa Fakanofó

ʻI he maama fakalaumālié, ne fili ai ʻe he ʻOtuá ha ngaahi laumālie pau ke nau fakahoko ha ngaahi misiona pau ʻi he māmaní. ʻOku ui ʻeni ko e tomuʻa fakanofó. ʻOku ʻikai fakapapauʻi ʻe he tomuʻa fakanofó ʻe maʻu ʻe he niʻihi fakafoʻituituí ha ngaahi uiuiʻi pe fatongia pau. ʻOku hoko mai ʻa e ngaahi faingamālie peheé ʻi he moʻuí ni tuʻunga ʻi hono fakaʻaongaʻi ʻo e tauʻatāina ke filí ʻi he angatonú, ʻo hangē tofu pē ko e hoko mai ʻa e tomuʻa fakanofó tuʻunga ʻi he angatonu ʻi he maama fakalaumālié.

Naʻe tomuʻa fakanofo ʻa Sīsū Kalaisi ke fakahoko e Fakaleleí, ʻo hoko ai ko e “Lami ʻa ia naʻe tāmateʻi talu mei he fakatupu ʻo māmaní.”

ʻOku fakamatala ʻa e folofolá ki ha niʻihi kehe naʻe tomuʻa fakanofo. Naʻe ʻilo ʻe he palōfita ko ʻĒpalahamé fekauʻaki mo hono tomuʻa fakanofo iá ʻi heʻene maʻu ha vīsone ʻa ia naʻá ne mamata ai ki he “tokolahi naʻe ngali ʻeiki mo lahi” ʻi he lotolotonga ʻo e ngaahi laumālie ʻi he maama fakalaumālié. Naʻá ne pehē: “Naʻe ʻafio ʻa e ʻOtuá ki he ngaahi laumālié ni kuo nau lelei, pea naʻá ne tuʻu ʻi honau lotolotongá, ʻo ne folofola: Te u fakanofo ʻa kinautolú ni ko ʻeku kau pule; he naʻá ne tuʻu ʻi he haʻohaʻonga ʻo kinautolu ʻa ia ko e ngaahi laumālie, pea naʻá ne ʻafio kuo nau lelei; peá ne folofola mai kiate au: ʻE ʻĒpalahame, ko e toko taha koe ʻo kinautolu; naʻe fili koe ʻi he teʻeki ai ke fanauʻi koé.” Naʻe folofola ʻa e ʻEikí kia Selemaia, “Naʻá ku ʻilo koe ʻi he heʻeki ai te u fakatupu koe ʻi he fatú; pea naʻá ku fakatapuʻi koe, pea tuʻutuʻuni koe, ko e palōfita ki he ngaahi puleʻangá, ʻi he teʻeki ai te ke haʻu mei he manavá.” Naʻe tomuʻa fakanofo ʻa Sione Papitaiso ke teuteuʻi e kakaí ki he ngāue fakafaifekau ʻa e Fakamoʻuí ʻi he māmaní.

ʻOku fekauʻaki ʻa e tokāteline ʻo e tomuʻa fakanofó mo e kāingalotu kotoa ʻo e Siasí, kae ʻikai ki he Fakamoʻuí pē mo ʻEne kau palōfitá. Kimuʻa pea toki fakatupu ʻa e māmaní, ne foaki ki ha kakai fefine faivelenga ha ngaahi fatongia pau pea tomuʻa fakanofo mo ha kakai tangata angatonu ki ha ngaahi fatongia lakanga fakataulaʻeiki ʻe niʻihi. ʻI hono fakamoʻoniʻi ʻe he kakaí ʻoku nau moʻui tāú, ʻe ʻoange kiate kinautolu ha ngaahi faingamālie ke fakakakato ʻa e ngaahi fatongia naʻa nau maʻu aí.