Ongomātuʻa Fakalangí

Ko e kakai kotoa pē ko ha fānau fakalaumālie ʻa ha ongomātuʻa fakalangi ʻoku ʻofeina. ʻOku tau takitaha maʻu ha tuʻunga malava fakalangi koeʻuhí ko ʻetau ongomātuʻa fakalangí. ʻOku fakamatalaʻi ʻe he tupuʻanga fakalangi ko ʻení ʻa hotau tuʻunga totonú.

Naʻa tau ako ʻi heʻetau moʻui ʻi he maama fakalaumālié ki he palani ʻo e fakamoʻuí, ʻa ia ʻoku ʻomi ai ʻa e founga ke maʻu ʻa e moʻui taʻengatá, ʻa e moʻui ʻa ʻetau ongomātuʻa fakalangí. Ko e taumuʻa ʻo ʻetau moʻuí, kau ai ʻa e moʻui fakamatelié, ke teuteuʻi kitautolu ke maʻu ʻa e meʻaʻofa nāunauʻiá ni.

ʻOku siʻi ʻa e meʻa kuo fakahā mai fekauʻaki mo ʻetau Faʻē Fakalangí ʻo ʻikai toe ope atu ʻi he ʻilo pē ʻokú Ne ʻi aí. Neongo ʻoku ʻikai ke tau hū kiate Ia, ka ʻoku tau fakaʻapaʻapaʻi Ia ko ha mātuʻa fakalangi. ʻI heʻetau muimui ki he sīpinga ʻa e Fakamoʻuí, ʻoku tau lotu pē ki heʻetau Tamai Hēvaní. ʻOku tau maʻu ha fakahinohino mo e tataki mei he Tamai Hēvaní mo Hono ʻAló ʻo fakafou ʻi he Laumālie Māʻoniʻoní.

ʻOku tau feinga ʻi he moʻuí ni ke fakatupulaki ʻa e ngaahi ʻulungaanga faka-ʻOtua ʻoku maʻu ʻe heʻetau ongomātuʻa fakalangí. ʻOku fakafōtunga ʻa e ngaahi ʻulungaanga ko ʻení ʻi he moʻui ʻa Sīsū Kalaisí.