Faitotonú

ʻI hono ʻomi ʻo e Ngaahi Fekau ʻe Hongofulú, naʻe folofola ʻa e ʻEikí: “ʻOua naʻá ke kaihaʻa. ʻOua naʻá ke tukuakiʻi ʻa ho kaungāʻapí.” ʻOku pehē ʻe he tefito ʻo e tui hono hongofulu mā tolu ʻa e Siasí, “ʻOku mau tui ʻoku totonu ke faitotonu.” ʻOku ʻuhinga ʻa e faitotonú ke fakamātoato, lea moʻoni, pea ʻikai ha kākā ʻi he taimi kotoa.

ʻI he taimi ʻoku tau faitotonu ai ʻi he meʻa kotoa pē, ʻoku tau malava ai ʻo maʻu ha fakakaukau nonga mo tauhi ʻa e fakaʻapaʻapaʻi kitá. ʻOku tau fakamālohia ʻa e ʻulungaanga leleí, ʻa ia ʻoku malava ai ke tau ngāue ki he ʻOtuá mo e niʻihi kehé. ‘Oku tau falalaʻanga ʻi he ʻao ʻo e ʻOtuá mo kinautolu ʻoku tau feohí.

‘I he tafaʻaki ʻe tahá, kapau ʻoku tau taʻefaitotonu ʻi heʻetau leá pe ngāué, ʻoku tau fakamamahiʻi ai kitautolu pea faʻa fakamamahiʻi ai foki mo e niʻihi kehé. Kapau te tau loi, kaihaʻa, kākā, pe taʻetokanga ke ngāueʻi kakato ʻetau vahé, ʻoku mole ai meiate kitautolu ʻa e fakaʻapaʻapaʻi kitá. ʻOku mole meiate kitautolu ʻa e tataki ʻa e Laumālie Māʻoniʻoní. Mahalo te tau ʻilo kuó tau maumauʻi ha ngaahi vā mo e kau mēmipa ʻo e fāmilí mo e ngaahi kaungāmeʻá pea ʻikai ke toe falala mai e kakaí kiate kitautolu.

‘Oku faʻa fiemaʻu ki he faitotonú ʻa e loto-toʻa mo e feilaulau, tautautefito ki he taimi ʻoku feinga ai ʻa e niʻihi kehé ke fakalotoa kitautolu ke fakatonuhiaʻi ʻa e ʻulungaanga taʻefaitotonú. Kapau ‘oku tau fepaki mo ha tūkunga pehē, te tau lava ʻo manatuʻi ʻoku mahuʻinga ange ʻa e melino tuʻuloa ʻoku maʻu ʻi he faitotonú ʻi he fiemālie fakataimi ʻo e muimui ki he meʻa ʻoku fai ʻe he tokolahí.