Nofotuʻí

Ko e nofotuʻí ko ha vahaʻataimi ia ʻo e taʻu ʻe 1,000. Ko e taimi ʻoku tau talanoa ai ki he “Nofotuʻí,” ʻoku tau ʻuhinga ki he taʻu ʻe 1,000 hili e Hāʻele ʻAnga Ua Mai ʻa e Fakamoʻuí. Lolotonga ʻa e Nofotuʻí, “ko Kalaisi pē ʻe pule ʻi he māmaní.”

ʻE hoko ʻa e Nofotuʻí ko ha taimi ia ʻo e angatonu mo e melino ʻi he māmaní. Kuo ʻosi fakahā ʻe he ʻEikí “ʻi he ʻaho ko iá ʻe ngata ʻa e tāufehiʻa ʻa e tangatá, mo e tāufehiʻa ʻa e fanga manú, ʻi hoku ʻaó, ʻio, ʻa e tāufehiʻa ʻa e kakano kotoa pē.” Ko Sētané ʻe “haʻi … ke ʻoua naʻa ʻi ai hano nofoʻanga ʻi he loto ʻo e fānau ʻa e tangatá.”

ʻI he lolotonga ʻo e Nofotuʻí, ʻe lelei mo angatonu ʻa e kakai kotoa ʻi he funga ʻo e māmaní, ka ʻe ʻi ai hanau tokolahi ʻe teʻeki ai ke nau maʻu ʻa e kakato ʻo e ongoongoleleí. ʻI heʻene peheé, ʻe fakahoko leva ʻe he kāingalotu ʻo e Siasí ʻa e ngāue fakafaifekaú.

ʻE toe kau foki mo e kāingalotu ʻo e Siasí ʻi he ngāue fakatemipalé lolotonga ʻo e Nofotuʻí. ʻE hoko atu ʻa e kāingalotú ʻi hono langa ʻo e ngaahi temipalé mo maʻu ʻa e ngaahi ouaú, ʻo fakafofongaʻi honau kāinga kuo pekiá. ʻI he fakahinohino mei he fakahaá, te nau teuteu ʻa e ngaahi lekooti ʻo ʻenau ngaahi kuí ʻo aʻu kia ʻĀtama mo ʻIvi.

ʻE hokohoko atu ai pē ʻa e māʻoniʻoni mo e melino kakató kae ʻoua kuo ngata ʻa e taʻu ʻe 1,000, pea ʻe toki “vete ange [ʻa Sētane] ʻo kiʻi fuofuoloa siʻi, koeʻuhí ke ne tānaki fakataha mai ʻa ʻene ngaahi kau taú.” ʻE tauʻi ʻe he ngaahi konga kau ʻa Sētané ʻa e kau tau ʻo e langí, ʻa ia ʻe taki mai ʻe Maikeli, pe ko ʻĀtama. ʻE ikunaʻi ai ʻa Sētane mo hono kau muimuí pea kapusi ki tuʻa ʻo taʻengata.