Fiefiá

ʻOku finangalo ʻa e Tamai Hēvaní ke tau maʻu ʻa e fiefia ʻoku moʻoni mo tuʻuloá. Ko ʻetau fiefiá ʻa e taumuʻa ʻo e ngaahi tāpuaki kotoa pē ʻokú Ne foaki mai maʻatautolú—ʻa e ngaahi akonaki ʻo e ongoongoleleí, ngaahi fekaú, ngaahi ouau ʻo e lakanga fakataulaʻeikí, ngaahi vā fakafāmilí, kau palōfitá, ngaahi temipalé, ko e masani ʻo e fakatupú, pea naʻa mo e faingamālie ke tau foua ʻa e faingataʻá. ʻOku faʻa ui ʻEne palani ki hotau fakamoʻuí “ko e palani lahi ʻo e fiefiá.” Naʻá Ne foaki mai Hono ʻAlo ʻOfaʻangá ke fakahoko ʻa e Fakaleleí kae lava ke tau fiefia ʻi he moʻuí ni mo maʻu hono kakato ʻo e fiefia ʻi he taʻengatá.

ʻI he fakamoʻoni ʻa e palōfita ko Līhaí ki he “ngaahi taumuʻa taʻengata” ʻa e ʻOtuá, naʻá ne akoʻi ai ʻo pehē, “ʻOku ʻi ai ʻa e faʻahinga ʻo e tangatá koeʻuhi ke nau maʻu ʻa e fiefiá.” ʻOku feinga ha kakai tokolahi ke maʻu ʻa e fiefiá mo e lavameʻá ʻi ha ngaahi ʻekitivitī ʻoku fehangahangai mo e ngaahi fekau ʻa e ʻEikí. Ko ʻenau siʻaki ko ia ʻa e palani ʻa e ʻOtuá maʻanautolú, ʻoku nau fakasītuʻaʻi ai ʻa e maʻuʻanga pē ʻe taha ʻo e fiefia moʻoní. ʻOku nau tukulolo ki he tēvoló, ʻa ia ʻokú ne “feinga ke mamahi ʻa e tangata kotoa pē ʻo hangē pē ko iá.” ʻE faifai pē pea nau ʻilo ʻa e moʻoni ʻo e fakatokanga ʻa ʻAlamā ki hono foha ko Kolianitoní: “Kuo teʻeki ai hoko ʻa e fai angahalá ko e fiefia.”

ʻOku fekumi ha niʻihi ki ha ngaahi meʻa pē ke nau fiefia ai ʻi he moʻuí. ʻI he hoko ʻeni ko ʻenau tefitoʻi taumuʻá, ʻoku nau tuku ai ʻa e fiefia fakataimí ke ne tohoakiʻi kinautolu mei he fiefia ʻoku tuʻuloá. ʻOku nau kaihaʻasi meiate kinautolu ʻa e fiefia tuʻuloa ʻo e tupulaki fakalaumālié, ngāue tokoní, mo e ngāue mālohí.

ʻI heʻetau feinga ko ia ke fiefiá, ʻoku totonu ke tau manatuʻi ko e founga pē taha ki he fiefia moʻoní ko e moʻui ʻaki ʻa e ongoongoleleí. Te tau maʻu ʻa e fiefia ʻoku nonga mo taʻengatá ʻi he taimi ʻoku tau feinga ai ke tauhi ʻa e ngaahi fekaú, lotua ha ivi, fakatomala mei he ngaahi angahalá, kau ʻi he ngaahi ʻekitivitī langaki moʻuí, mo fakahoko ha ngaahi ngāue tokoni ʻoku ʻaongá.