Efiafi ʻi ʻApí

Kuo faleʻi ʻe he kau palōfitá ʻa e ngaahi mātuʻá ke akoʻi ʻenau fānaú ke ʻofa he ʻOtuá mo tauhi ʻEne ngaahi fekaú. Ko e efiafi ʻi ʻapí ko ha taimi pau ia ki he fakafoʻituituí mo e ngaahi fāmilí ke nau ako ai ʻa e ongoongoleleí mo feohi fakataha.

ʻE lava ke kau ʻi he ngaahi efiafi ʻi ʻapí ha lotu, mūsika langaki moʻuí, fakahinohino ʻi he ongoongoleleí, ngāue tokoni, vahevahe ʻo e ngaahi talēnití, mo e ngaahi ʻekitivitií. ʻOku totonu foki ke fakakau ai ʻa e ngaahi fakataha alēlea fakafāmilí, ʻa ia ʻoku fokotuʻu ai ʻe he kau mēmipa ʻo e fāmilí ha ngaahi taumuʻa, fakaleleiʻi ha ngaahi palopalema, fakafekauʻaki ʻenau ngaahi taimi-tēpilé, mo fepoupouaki.

ʻE lava ke tokoniʻi ʻa e ako folofola fakataautaha mo fakafāmilí ʻe he ngaahi efiafi fakauike ʻi ʻapí. ʻE lava ke maʻu ha ngaahi fokotuʻu ki he ngaahi efiafi fakafāmili ʻi ʻapí ʻi he Haʻu, ʻo Muimui ʻIate Aú mo e ʻū makasini ʻa e Siasí.

ʻE lava ke fakatahataha ʻa e kāingalotu tāutahá mo e niʻihi kehé ʻi ha ngaahi kulupu makehe mei he ngaahi houalotu angamaheni ʻa e Siasí ke kau atu ki he ngaahi efiafi ʻi ʻapí mo fefakamālohiaʻaki.

ʻE lava ke fakahoko ʻa e ngaahi efiafi ʻi ʻapí ʻi he ngaahi ʻaho Sāpaté, ʻaho Mōnité, pe ha toe taimi kehe ʻokú ne feau lelei taha ʻa e ngaahi fiemaʻu ʻa e fakafoʻituituí mo e ngaahi fāmilí. ʻOku totonu ke fakaʻataʻatā ʻe he kau taki ʻo e Siasí ʻa e ngaahi efiafi Mōnité mei he ngaahi fakataha mo e ngaahi ʻekitivitī ʻa e Siasí. ʻE faitāpuekina ʻa e tokotaha kotoa pē ʻi heʻenau kau atu ki he ngaahi efiafi ʻi ʻapí. ʻE lava ke fakamālohia ʻa e ngaahi vā fetuʻutakí ʻi he feohi fakataha ʻa e kau mēmipa ʻo e fāmilí.