Ngaahi Fakataha Alēlea ʻa e Siasí

Ko e taumuʻa ʻo e ngaahi fakataha alēlea ʻa e Siasí ke fekumi mo maʻu ha fakahā fakalangi. ʻOku muimui ʻa e ngaahi fakataha alēlea ʻi he Siasí ʻi he sīpinga ʻo e fakataha alēlea ʻi he langí. ʻI he ngaahi fakataha alēlea ʻa e Siasí te tau lava ai ʻo maʻu ha ueʻi fakalaumālie ke faituʻutuʻuni, tokoniʻi lelei ange e fakafoʻituituí mo e ngaahi fāmilí, pea palani mo fakafekauʻaki e ngāue ʻa e ʻOtuá ki he fakamoʻuí mo e hakeakiʻí. ʻOku fakamamafaʻi makehe ʻe he ngaahi fakataha alēlea ʻi he Siasí ʻa hono tokoniʻi e kāingalotu ʻo e Siasí ke nau maʻu e ngaahi ouaú mo tauhi e ngaahi fuakava ʻoku fekauʻaki mo iá.

Ko e kāingalotu ʻo e Siasí ʻoku uiuiʻi, pe fili ʻo fakafou ʻi he fakahā mei he ʻOtuá mo e kau taki ʻo e Siasí, ke ngāue ʻi he ngaahi fakataha alēleá. ʻI he ngaahi fakataha alēlea lahi ʻi he Siasí, ʻoku tokoni ʻa e houʻeiki tangatá mo e fafiné ke fakahoko e ngāue ʻa e ʻEikí ʻi he funga ʻo e māmaní. ʻOku fakamatalaʻi ʻe he Tohi Tuʻutuʻuni Fakakātoá “ʻoku hanga ‘e he kehekehe ‘o e puipuituʻá, taʻu motuʻá, ngaahi taukeí, mo e fakakaukau ʻa e kau mēmipa ʻo e fakataha alēleá ʻo fakakoloaʻi ʻa e fakataha alēleá.”

ʻOku tokoni ʻa e ngaahi fakataha alēleá ke tau fekumi ki he finangalo ʻo e ʻEikí ʻi he uouangataha mo e tui. ʻOku nau ʻi he ngaahi tuʻunga kotoa pē ʻo e Siasí pea ʻoku kau ai ʻa e ngaahi fakataha alēlea fakalūkufuá, fakaʻēlia, fakasiteiki, fakauooti, fakakōlomu, fakakalasi mo e ngaahi fakataha alēlea fakatakimuʻa kehé. ʻE feinga e kau mēmipa ʻo e fakataha alēleá ke nau taha ʻi he fakaʻamu mo e taumuʻa pea mo e Tamai Hēvaní mo Sīsū Kalaisi. ʻI he Siasí, ʻoku ʻikai puleʻi ʻa e ngaahi fakataha alēleá ʻe he tokolahí ʻo hangē ko ia ʻoku angamaheni ʻi he ngaahi kautaha kehé. ʻOku ʻikai foki ke fai ʻe he taki ʻo e fakataha alēleá ʻa e ngaahi tuʻutuʻuní ʻiate ia pē. Ko e ngaahi tuʻutuʻuni ʻoku fai ʻe he taki ʻo e fakataha alēleá ʻoku fakahoko ia ʻe he ngaahi fealeaʻaki ʻa e fakatahá pea fakapapauʻi ʻe he Laumālie Māʻoniʻoní.

ʻOku tataki ʻe he takí ʻa e ngaahi fealeaʻaki ʻo e fakataha alēleá mo poupouʻi ʻa e tokotaha kotoa pē ke vahevahe ʻenau fakakaukaú. ʻOku totonu ke ongoʻi malu ʻa e kau mēmipa ʻo e fakataha alēleá ke vahevahe ʻenau fakakaukaú ʻi ha laumālie ʻo e angaʻofa mo e ʻofa. ʻOku ngāue ʻa e kau takí ke faʻu ha ʻātakai ʻa ia ʻoku ongona ai ʻa e tokotaha kotoa pē pea fakamahuʻingaʻi ʻa e fakakaukau kotoa pē. Ko ha meʻa ʻeni ʻoku hāhāmolofia ʻi he māmaní he ʻahó ni.

ʻI he fakafanongo ʻa e kau mēmipa ʻo e fakataha alēleá, fakakaukauʻi ʻi he loto-fakatōkilalo e ngaahi ongo ʻa e niʻihi kehé, mo fekumi ki he finangalo ʻo e Tamai Hēvaní, ʻe lava ke ʻi ai ha laumālie ʻo e tataki fakalaumālié mo e uouangatahá. Ki ha fakamatala lahi ange fekauʻaki mo e ngaahi fakataha alēlea ʻi he Siasí, vakai, Tohi Tuʻutuʻuni Fakakātoá, vahe 4.