Konisēnisí

ʻOku fanauʻi ʻa e kakai kotoa pē mo ha mālohi ke fakafaikehekeheʻi ʻa e totonú mei he halá. ʻOku ui e tuʻunga malava ko ʻení ko e konisēnisí, ko hano fakahaaʻi ia ʻo e Maama ʻo Kalaisí. Ko e konisēnisi ʻo ha taha ko ha maluʻanga ia mei he ngaahi tūkunga ʻoku fakatuʻutāmaki fakalaumālié.

ʻOku ʻomi ʻe he ngaahi fili māʻoniʻoní mo e talangofua ki he ngaahi fekaú ʻa e nonga ʻo e konisēnisí.

ʻI he taimi ʻoku tau faiangahala aí, ʻoku tau ongoʻi fakaʻiseʻisa pe halaia, ʻo hangē pē ko ʻetau ongoʻi mamahi fakaesino ʻi he taimi ʻoku tau kafo aí. Ko e tali fakanatula ʻeni hotau konisēnisí ki he angahalá, pea te ne lava ʻo tataki kitautolu ke tau fakatomala.

ʻOku fakafoʻou ʻe he fakatomalá mo e fakamolemolé ʻa e nonga hotau konisēnisí. ʻI he tafaʻaki ʻe tahá, kapau te tau tukunoaʻi hotau konisēnisí pea ʻikai fakatomala, ʻe taʻeʻaonga hotau konisēnisí ʻo hange kuo “hunuhunu … ʻaki ʻa e ukamea vela.”

ʻOku tau ako ke muimui ʻi hotau konisēnisí. Ko ha konga mahuʻinga ʻeni hono fakaʻaongaʻi ʻa e tauʻatāina ke filí. Ko e lahi ange ʻetau muimui ki hotau konisēnisí, ko ʻene mālohí ange ia. Ko e konisēnisi ongongofuá ko ha fakaʻilonga ia ʻo ha laumālie moʻui lelei.