“Kolosí,” Ngaahi Tefitó mo e Ngaahi Fehuʻí (2025)
Vakai Fakalūkufuá
Kolosí
Ko e Tutuki ʻo Sīsū Kalaisí ko ha konga ia ʻo ʻEne feilaulau fakaleleí. Ko ha tefitoʻi tokāteline ia ʻi he palani ʻo e fakamoʻui ʻa e Tamai Hēvaní. Naʻe ikunaʻi ʻe Kalaisi ʻa e angahalá mo e maté ʻo fakafou ʻi Heʻene mamahi ʻi Ketisemaní, Tutuki ʻi he funga kolosí, mo ʻEne Toetuʻu he hili iá, ʻo fakaʻatā ai ʻa e faingamālie maʻá e tokotaha kotoa pē ke haʻu kiate Ia ʻo maʻu ʻa e fakamoʻuí mo e hakeakiʻí.
ʻOku fakaʻaongaʻi ʻa e fakaʻilonga ʻo e kolosí ʻi he ngaahi siasi faka-Kalisitiane lahi ko hano fakahaaʻi moʻoni ʻo e tui kia Sīsū Kalaisí. ʻOku manatua ʻi he loto-ʻapasia ʻe he kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e mamahi ʻa e Fakamoʻuí ʻi Ketisemani mo Kalevalé. ʻOku mau tui naʻe “pekia ʻa Kalaisi ʻi heʻetau ngaahi angahalá, ʻo fakatatau ki he ngaahi tohí; pea naʻe fai ia pea naʻe toe tuʻu hake ia ʻi hono tolu ʻo e ʻahó, ʻo fakatatau ki he ngaahi tohí” (1 Kolinitō 15:3–4). ʻOku fakamamafaʻi ʻe he Tohi Tapú, Tohi ʻa Molomoná, Tokāteline mo e Ngaahi Fuakavá, mo e Mataʻitofe Mahuʻingá ʻa e mahuʻinga faifakamoʻui ʻo e pekia ʻa Kalaisi ʻi he funga kolosí.
ʻOku ʻikai fakaʻaliʻali ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e kolosí ʻi hono ngaahi falé pe ʻi hono ngaahi falelotú pe ʻū lokiakó pe ngaahi feituʻu tatau mo iá. Ka neongo iá ʻoku fakatefito hono ngaahi akonakí ʻi he tokāteline ʻo e Fakalelei fakaofo ʻa Kalaisí ʻa ia ne hoko ʻi Ketisemani pea ʻi he kolosí.
Hangē ko e ngaahi tui faka-Kalisitiane kehé, ʻoku fakamamafaʻi ʻe he Siasí ʻa e Kalaisi moʻui kuo toetuʻú. Ko e ʻuhinga ʻeni ʻoku hoko ai e fakaʻilonga fakaʻofisiale ʻo e Siasí ko e ʻīmisi ʻo e Kalaisi moʻui kuo toetuʻú, ʻa ia ʻokú Ne tataki Hono Siasí he ʻahó ni ʻo fakafou ʻi he fakahā ki Heʻene palōfitá. ʻOku hoko foki ʻa e fakaʻilonga ko ʻení ko ha fakamanatu te tau lava kotoa ʻo maʻu ha ʻamanaki lelei ki ha toetuʻu nāunauʻia koeʻuhí ko e mamahi, pekia mo e Toetuʻu ʻa Sīsū Kalaisí.
Ko e meʻa tatau foki ʻoku moʻoni ki he kau Kalisitiane kehé, ʻoku hoko ʻetau tōʻonga moʻuí ko ha tefitoʻi founga ia ʻoku tau fakahaaʻi ai ʻetau ʻofa ki hotau Fakamoʻuí mo ʻEne ngāué.