“Kilisimasi,” Ngaahi Tefitó mo e Ngaahi Fehuʻí (2023)
Vakai Fakalūkufuá
Kilisimasi
“ʻI he taimi ʻoku tau tauhi ai ʻa e laumālie ʻo e Kilisimasí, ʻoku tau tauhi ai ʻa e Laumālie ʻo Kalaisí, he ko e laumālie ʻo e Kilisimasí ʻa e Laumālie ʻo Kalaisí. Te ne taʻofi kotoa e ngaahi meʻa ʻokú ne tohoakiʻi ʻetau tokangá ʻa ia te ne lava ke holoki e Kilisimasí pea folo hifo hono ʻuhinga totonú.
“ʻOku ʻikai ha taimi ʻe toe lelei ange ʻi he taimí ni, ʻa e faʻahitaʻu Kilisimasi ko ʻení, ke toe fakatapui ʻa kitautolu kotoa ki he ngaahi tefitoʻi moʻoni naʻe akoʻi ʻe Sīsū Kalaisí.
“Koeʻuhí naʻá Ne hāʻele mai ki he māmaní, ʻoku tau maʻu ai ha sīpinga haohaoa ke muimui ki ai. ʻI heʻetau feinga ke tau hoko ʻo hangē ko Iá, te tau maʻu ai ʻa e fiefia mo e nēkeneka ʻi heʻetau moʻuí pea mo e melino ʻi he ʻaho takitaha ʻo e taʻú. Kapau ʻe muimuiʻi ʻEne sīpingá, te ne ueʻi kitautolu ke tau angaʻofa mo ʻofa lahi ange, fakaʻapaʻapa mo tokanga lahi ange ki he niʻihi kehé.
“Koeʻuhí naʻá Ne hāʻele mai, ʻoku ʻi ai leva ʻa e ʻuhinga ʻo ʻetau moʻui fakamatelié.
“Koeʻuhí naʻá Ne hāʻele mai, ʻoku lava ke tau ʻilo ai e founga ke tokoniʻi kinautolu ʻoku faingataʻaʻiá pe loto-mamahí, ʻi ha faʻahinga feituʻu pē ʻoku nau ʻi ai.
“Koeʻuhí naʻá Ne hāʻele mai, kuo mole ʻa e huhu ʻo e maté, pea ikuna ʻa e faʻitoká. Te tau toe moʻui koeʻuhí he naʻá Ne hāʻele mai.
“Koeʻuhí he naʻá Ne hāʻele mai mo totongi huhuʻi ʻetau ngaahi angahalá, ʻoku tau maʻu ai e faingamālie ke maʻu e moʻui taʻengatá.”
Ko e faʻahitaʻu Kilisimasí ko ha taimi ia ke fakamanatu mo ngāueʻi e ngaahi tāpuaki mo e ngaahi faingamālie ʻoku tau maʻu koeʻuhí ko e ʻaloʻi, moʻui, Fakalelei, mo e Toetuʻu ʻa hotau Fakamoʻui, ko Sīsū Kalaisí. Koeʻuhí ko ʻetau Tamai Hēvaní “naʻe ʻofa pehē … ki māmani, naʻá ne foaki hono ʻAlo pē taha naʻe fakatupú,” ʻoku tau fakahaaʻi ai ʻetau ʻofa ki he niʻihi kehé pea ki he ʻOtuá mo Hono ʻAlo mahuʻingá ʻaki hono foaki kitautolú.