Fuakava Taʻengatá

Ako ʻa e Tokāteline mo e Ngaahi Fuakava 133:57–62, fekauʻaki mo hono fakafoki mai ʻe he ʻEikí ʻa e kakato ʻo e ongoongolelei ʻo Sīsū Kalaisí. Ko e hā nai hono ʻuhinga naʻe ʻomi ia “ʻi he lea mahinongofua mo faingofuá”? Fakakaukau ki he founga ʻoku teuteuʻi ai koe ʻe he fuakava taʻengata ka ʻoku faingofua mo fakaʻofoʻofá ke ke maʻu ʻa e moʻui taʻengatá. ʻOku poupouʻi fēfē nai koe ʻe he maʻu e mahino ki he ivi malava ko ʻení ke ke tokoni ki he ʻEikí ʻi Heʻene ngāue ʻo e fakamoʻuí mo e hakeakiʻí?

ʻI he Tokāteline mo e Ngaahi Fuakava 22:1–4, naʻe fakahā ʻe he ʻEikí naʻá Ne fakafoʻou ʻEne fuakava taʻengatá mo e Kāingalotu he kuonga muʻá. Lau fakataha ʻa e konga ʻi he ʻuluʻi tohí pea mo e ngaahi veesi ko ʻení, pea aleaʻi e meʻa ʻokú ke ako fekauʻaki mo hono mahuʻinga ʻo ha fuakava “foʻou”. ʻOku ʻuhinga nai ki he hā ʻa e “ngaahi ngāue maté”? Talanoa ki he meʻa ʻokú ke ako mei he veesi 3 fekauʻaki mo e mahuʻinga ʻo hono Fakafoki Mai ʻo e ongoongoleleí mo e fuakava taʻengatá.

Koeʻuhí ko Sīsū Kalaisi mo ʻEne Fakaleleí, te tau lava ʻo maʻu ʻa e moʻui taʻengatá kapau te tau tauhi ʻetau ngaahi fuakava mo Iá. Naʻe akoʻi mai ʻe Palesiteni Nalesoni: “Ko kinautolu ʻoku nau fakahoko ha ngaahi fuakava toputapu mo tauhi kinautolú, ʻoku talaʻofa kiate kinautolu ʻa e moʻui taʻengatá mo e hākeakiʻí, ʻa ia ʻʻoku mahuʻinga taha ʻi he ngaahi meʻaʻofa kotoa pē ʻa e ʻOtuá’ (Tokāteline mo e Ngaahi Fuakava 14:7). Ko Sīsū Kalaisi ʻa e tokotaha ʻokú ne maluʻi ʻa e ngaahi fuakava ko iá (vakai, Hepelū 7:22; 8:6). Ko e kau tauhi fuakava ko ia ʻoku nau ʻofa ki he ʻOtuá pea tuku ke Ne ikunaʻi ʻa e ngaahi meʻa kehe kotoa pē ʻi heʻenau moʻuí, ʻokú Ne hoko ai ko e ivi tākiekina mālohi taha ʻi heʻenau moʻuí.” Talanoa ki he founga te ke tuku ai ke “[ikuna ʻa e ʻOtuá ʻi he] ngaahi meʻa kehe kotoa pē” ʻi hoʻo moʻuí. ʻE tokoniʻi fēfē ai koe ke ke maʻu ʻa e moʻui taʻengatá, pea ko e hā ʻoku mahuʻinga ai ʻa e ngāue ki hono maʻu ʻo e hakeakiʻí?

ʻĪsaia 55:1–3; Selemaia 32:37–40; 2 Nīfai 31:17–21; Tokāteline mo e Ngaahi Fuakava 49:9–14

Marcus B. Nash, “Ko e Fuakava Foʻou mo Taʻengatá,” Liahona, Tīsema 2015, 40–47

Ko e hā nai ʻene ʻuhinga kiate koe ke hoko ko ha konga ʻo e fuakava faka-ʻĒpalahamé? Fakakaukau ki he ngaahi moʻoni ko ʻení: Naʻá ke fai ha fuakava mo e ʻOtuá ʻi he taimi naʻá ke papitaiso aí. ʻOkú ke fakafoʻou ʻa e fuakava ko iá mo fakahoko ha fuakava foʻou ʻi he taimi kotoa pē ʻokú ke maʻu ai ʻa e sākalamēnití. Te ke fakatefito fēfē nai hoʻo moʻuí ʻi he temipalé kae lava ke ke kau lahi ange ai ki he kakato ʻo e ongoongoleleí?

Lau ʻa e ʻĒpalahame 1:2, pea fakakaukau ki he meʻa ʻokú ke ako kau ki he ʻulungaanga ʻo ʻĒpalahamé. ʻOku ʻuhinga nai ki he hā ke hoko ko ha “tokotaha muimui ki he māʻoniʻoní” ʻi hotau kuongá ni? ʻOkú ke pehē ko e hā e ʻuhinga naʻe “kumi ai [ʻa ʻĒpalahame] ki he ngaahi tāpuaki ʻo e ngaahi tamaí”? Kuo tāpuekina fēfē nai koe ʻo fakafou ʻi he fuakava faka-ʻĒpalahamé? Ko e hā ha meʻa te ke lava ʻo fai ke ke maʻu ai ʻa e ngaahi tāpuaki ʻo e fuakava ko ʻení?

Ako e ngaahi sīpinga faivelenga ʻo hono moʻui ʻaki ʻo e ongoongoleleí meia ʻĒpalahame mo Sela mo honau fāmili angatonú (hangē ko ʻení, mahalo te mou lau fakataha ha niʻihi ʻo e ngaahi potufolofola ko ʻení: Sēnesi 17:1–19; 18:1–19; 22:1–18; 24; 32:1–28; 33; 46:1–7; ʻĪsaia 51:1–3; Kalētia 3:27–29; 2 Nīfai 8:1–3). Lau leva ʻa e Sione 8:39. Te mou lava ʻo tā pe valivali ha fakatātā pe ko e tohi ha foʻi maau ʻo fakahaaʻi ai hoʻomou houngaʻia ʻi he ngaahi tāpuaki kuo mou maʻú pe ko ia ʻe lava ke maʻu mei hono tauhi e fuakava taʻengata ʻo e ongoongoleleí ʻo hangē ko ia ne fakahoko ʻe ʻĒpalahame mo Selá. Te mou lava leva ʻo fevahevaheʻaki hoʻomou fakatātaá pe foʻi māú.

Teutalōnome 7:6–9; 2 Nīfai 29:14; ʻĒpalahame 2:6–12

Russell M. Nelson, “Ngaahi Fuakavá,” Liahona, Nōvema 2011, 86–89

“Ko e Fuakava Faka-ʻĒpalahamé,” Liahona, Fēpueli 2022, 47

“Abraham” (vitiō), Gospel Library

ʻI he Mōsaia 5:1–8, ʻoku tau ako ai ki hono tali ʻe he kakai ʻo e Tuʻi ko Penisimaní ʻa ʻene ngaahi akonaki fekauʻaki mo e ongoongolelei ʻo Sīsū Kalaisí. Ko e hā e meʻa naʻa nau loto-fiemālie ke fakahoko ʻi he taimi ko iá? Ko e hā nai hono ʻuhinga kiate koe ke hoko ko ha taha ʻo e “fānau ʻa Kalaisí”? Ko e hā nai hono ʻuhinga ʻo e pehē kuo “fanauʻi fakalaumālie ʻa kimoutolu” ʻe Kalaisí? Kuo “liliu [fēfē nai] ʻa [ho] lotó ʻi he tui ki hono huafá”?

Naʻe lea ʻa Palesiteni ʻEmilī Pele Filimani kau ki he mahuʻinga ʻo e ʻaʻeva ʻi ha vā fetuʻutaki fakafuakava mo Kalaisi peá ne fakamatala fakanounouʻi ʻa e talaʻofa ko ia naʻe fakahoko ʻe he ʻOtuá mo Sēkopé: “ʻOku ou ʻiate koe. Te u maluʻi koe. Te u toe ʻomi koe ki ʻapi. He ʻikai te u liʻaki koe. Te u tauhi ʻeku palōmesi kiate koé.” Naʻá ne fakamatalaʻi leva: “Naʻe ʻi ai ha fili ke fakahoko ʻe Sēkope. Te ne lava ʻo fili ke moʻui pē mo e ʻOtua ʻo ʻene tamaí, pe te ne lava ʻo fili ke moʻui līʻoa ki ha vā fetuʻutaki fakafuakava mo Ia.” Fakalaulauloto ki hono ʻuhinga kiate koe ke ke moʻui līʻoa ʻi ha vā fetuʻutaki fakafuakava mo Kalaisi. Ko e hā te ke loto-fiemālie ke kamata fakahoko pe taʻofi hono faí kae lava ke ke fakamālohia ho vā fetuʻutaki fakafuakava mo Iá?

Lau ʻa e Hilamani 5:12 mo e ngaahi lea ko ʻeni meia Brother Seni E. Niumaní: “[ʻOku tau] akoʻi ʻetau fānaú ke nau haʻi kinautolu [kia Kalaisi] ʻo fakafou ʻi he ngaahi ouau mo e fuakava toputapú, koeʻuhí, ʻi he tō mai ʻa e ngaahi matangi mo e tāfea ʻo e fakafepakí, ʻa ia kuo pau ke hokó, ʻe siʻisiʻi hono uesia kinautolú “koeʻuhi ko e maka kuo langa ai ʻa [kinautolú].’” Ko e hā ha niʻihi ʻo e “ngaahi matangi mo e tāfea ʻo e fakafepakí” te tau ala foua ʻi heʻetau moʻuí? Aleaʻi ʻa e founga ʻe lava ke tokoni ai hoʻo ngaahi fuakavá ke maluʻi koe mo hoʻo fāmilí mei he “fuʻu afā lahi” ʻo e filí.

Lau ʻa e fakamatala ko ʻeni naʻe fai ʻe ʻEletā Niila L. ʻEnitasení: “ʻOku tau hoko kotoa ko e ʻfānau ʻo e fuakaváʼ ʻo kāpui ʻa e māmaní ʻi he ngaahi puleʻanga mo e anga fakafonua ʻi he konitinēniti kotoa, ʻo toko lauimiliona, ʻi heʻetau tatali ki he hāʻele nāunauʻia mai hotau ʻEiki mo e Fakamoʻuí. ʻI heʻetau ulo atu ko ha maama kiate kinautolu ʻoku tau feohí, ʻoku tau fakafōtunga lelei ai ʻetau ngaahi holí, fakakaukaú, filí, mo e tōʻongá. ʻI heʻetau fekumi ʻaki hotau lotó kotoa ke ʻiloʻi mo ʻofa ʻi he Fakamoʻuí, ʻoku tau fakamavaheʻi ai kitautolu mei he māmaní ʻo fakafou ʻi he ngaahi fuakava mo e ʻOtuá, ʻaki ʻetau fakaʻapaʻapa makehe kiate Ia mo ʻEne ngaahi akonakí, kae ʻikai ke tau fakamavaheʻi kitautolu mei he niʻihi ʻoku kehe ʻenau tuí.” Aleaʻi e founga te tau lava ai ʻo “fekumi ʻaki hotau lotó kotoa ke ʻiloʻi mo ʻofa ʻi he Fakamoʻuí” mo tauhi ʻetau ngaahi fuakava mo e ʻOtuá.

Sēnesi 12:1–3; Kalētia 3:7–9; 1 Nīfai 15:13–18; Tokāteline mo e Ngaahi Fuakava 124:58

Russell M. Nelson, “Children of the Covenant,” Ensign, May 1995, 32–34