Nofo-malí

Naʻe pehē ʻe ʻEletā ʻUlise Soālesi: “ʻOku ʻikai ha tuʻunga māʻolunga pe maʻulalo ʻi he vā ʻo e nofo-malí, pea ʻoku ʻikai muʻomuʻa pe muimui ha taha. Te na lue fetākinima, ko ha ongo tuʻunga tatau, ko e fānau fakalangi ʻa e ʻOtuá. Te na hoko ʻo taha ʻi he fakakaukau, loto, mo e taumuʻa fakataha mo ʻetau Tamai Hēvaní mo Sīsū Kalaisi. … [ʻOku] ʻaʻeva fakataha [ʻa e ngaahi hoa mali peheé] ʻi he fakaʻapaʻapa, houngaʻia, mo e ʻofa, ʻo fakangaloki kinaua kae fekumi ki heʻena leleí ʻi heʻena fononga ki he taʻengatá.” Fakakaukau ki hoʻo “fononga ki he taʻengatá” ko e konga ʻo e palani ʻa e ʻOtuá. ʻE tokoniʻi fēfē koe he fononga ko iá ʻi he lue “fetākinima, ko ha ongo tuʻunga tatau” mo ha hoa malí? Kapau ʻokú ke ʻosi mali, ko e hā ha meʻa te ke lava ʻo fai ke fakahaaʻi ai ha fakaʻapaʻapa, houngaʻia, mo e ʻofa lahi ange ʻi hoʻo fakahoko e fononga ko ʻení mo ho malí? Te ke lava foki ʻo palani ha meʻa pau te ke fai maʻa ho malí. Hiki ʻa e ngaahi ongo ʻokú ke maʻú, pea ngāueʻi kinautolu.

Naʻe lea ʻa ʻEletā D. Toti Kulisitofasoni kiate kinautolu ʻoku ʻikai lolotonga hoko moʻoni ki ai ʻa e malí mo e ngaahi tāpuaki ʻoku kaunga ki aí:

“ʻOku ʻi ai hamou niʻihi ʻoku ʻikai ke mou aʻusia e tāpuaki ʻo e malí koeʻuhí, ko ha ngaahi palopalema ʻo kau ai ʻa e ʻikai ha taha taau, fetokangaʻaki ʻa e tangata mo e tangata pe fefine mo e fefiné, ngaahi palopalema fakaesino pe fakaʻatamai, pe ko ha manavasiʻi naʻa ʻikai ke ola lelei pea siʻi ai e tuí. Pe naʻá ke ʻosi mali pea ʻikai ke ola lelei ʻa e mali ko iá, pea ʻokú ke nofo ʻo fakahoko toko taha ai ʻa e meʻa ʻoku ʻikai faʻa malava ʻe he toko uá. ʻOku ʻi ai ha niʻihi ʻo kimoutolu ʻoku ʻikai ha fānau neongo ʻa e fuʻu holi lahi mo e tautapa ʻi he lotú.

“… ʻOku tau fakamoʻoni taʻe toe veiveiua ki he meʻa naʻe fakataumuʻa ki ai e Fakalelei ʻa Sīsū Kalaisí, pea ʻi he ikuʻangá te Ne totongi huhuʻi ʻa e meʻa kotoa pē naʻe mole meiate kinautolu ʻoku tafoki kiate Iá. ʻOku ʻikai ke ʻi ai ha taha ia kuo tuʻutuʻuni pau mai ke ne maʻu pē ha meʻa siʻisiʻi ange ʻi he meʻa kotoa kuo ʻomi ʻe he Tamaí maʻa ʻEne fānaú.”

Ko e hā e meʻa ʻokú ke maʻu ʻi he ngaahi lea ʻa ʻEletā Kulisitofasoní ʻe ala tokoni atu kiate koe pe ko ha taha ʻokú ke ʻiloʻi kuo teʻeki ke ne maʻu e ngaahi tāpuaki ʻo e malí pe ko ha taha ʻoku ʻikai ke ne aʻusia e ngaahi tāpuaki ko iá he taimí ni? ʻOku tāpuekina fēfē ʻe he ʻOtuá ʻa “kinautolu ʻoku tafoki kiate Ia” ʻi he taimi ʻo ʻenau “molé”?

Lau ʻa e Tokāteline mo e Ngaahi Fuakava 121:36–42 mo ho malí pe niʻihi kehe, pea aleaʻi e founga ʻoku felāveʻi ai e potufolofola ko ʻení mo e nofo-malí. Naʻe naʻinaʻi ʻa Palesiteni Kōtoni B. Hingikelī ʻo pehē: “ʻOku ou fiemālie kapau te tau sio ki he ngaahi ʻulungaanga lelei ʻi he niʻihi kehé kae ʻikai ko e angakoví, ʻe lahi ange ʻa e fiefiá ʻi he ngaahi ʻapi ʻo hotau kakaí. ʻE siʻisiʻi ange ʻaupito ʻa e vete-malí, siʻisiʻi ange e ʻikai anganofó, siʻisiʻi ange e ʻitá, tāufehiʻá mo e fakakikihí. ʻE lahi ange ʻa e fakamolemolé, lahi ange ʻa e ʻofá, lahi ange ʻa e melinó, lahi ange ʻa e fiefiá. Ko e meʻa ʻeni ʻe hōifua ki ai ʻa e ʻEikí.” Aleaʻi e founga ʻe lava ke tokoni ai hono manatuʻi ko e malí ko ha konga mahuʻinga ia ʻo e palani ʻo e fiefiá, ke tau muimui ki he faleʻi ʻa Palesiteni Hingikelií. Te mou lava leva ʻo vahevahe ha ngaahi fakakaukau ki hono maʻu ha fiefia lahi ange ʻi he nofo-malí.

Sēnesi 1:27–28; 2:18, 21–24; 1 Kolinitō 11:11–12; Tokāteline mo e Ngaahi Fuakava 42:22; 49:15–17

“Ko e Fāmilí: Ko ha Fanongonongo ki Māmani,” Gospel Library

Gordon B. Hinckley, “Living Worthy of the Girl You Will Someday Marry,” Ensign, May 1998, 49–51

Lau e Tokāteline mo e Ngaahi Fuakava 132:19–20, pea fakalaulauloto ki he meʻa ʻoku akoʻi ʻe he ngaahi veesi ko ʻení fekauʻaki mo e fuakava ʻo e malí. Naʻe akoʻi ʻe Sisitā Suli B. Peki ʻo pehē: “Ko ha tangata mo ha fefine ʻokú na kau ki he hoa ngāue kakato ʻo ha fuakava ʻo e mali temipalé, ʻokú na vahevahe tatau ʻi he ngaahi tāpuaki ʻo e fuakava ko iá ʻo kapau ʻokú na faivelenga [vakai, Tokāteline mo e Ngaahi Fuakava 131:1–2]. Kuo folofola ʻa e ʻEikí ʻe ngāue mālohi ʻena fuakavá hili e moʻuí ni, pea ʻoku talaʻofa fakataha kiate kinaua ʻa e mālohí mo e hakeakiʻí [vakai, Tokāteline mo e Ngaahi Fuakava 132:19–20].” ʻOku tokoni fēfē ʻa e ngaahi tāpuaki kuo talaʻofa mai ʻi ha fuakava ʻo e malí, ke kei fetauhiʻaki pē ha ongomeʻa mali ʻo aʻu ki he taimi ʻoku faingataʻa aí?

ʻOku finangalo ʻa e ʻOtuá ke ʻoua naʻa tau fakahoko ha faʻahinga mali pē, ka ko ha mali taʻengata ʻi he fuakava. Naʻe akonaki ʻa ʻEletā Pulusi C. Haifeni ʻo pehē: “ʻI he taimi ʻoku hoko ai e faingataʻá ki ha mali ʻi he fuakavá, ʻoku ngāue fakataha ki ai ʻa e husepānití mo e uaifí. ʻOkú na malí ke foaki pea ke tupulaki, ʻo haʻi ʻi he ngaahi fuakava kiate kinaua, ki he koló, pea ki he ʻOtuá.” Naʻe pehē ʻe Palesiteni Tieta F. ʻUkitofa lolotonga ʻene kei faifatongia ʻi he Kau Palesitenisī ʻUluakí, “Ko e nofomali leleí ʻoku langa māmālie, mei he ʻaho ki he ʻaho, ʻi he moʻuí kotoa.” Vakai ki he fakatātā ʻoku ʻoatú ʻo ha fale piliki, pea fakakaukau ki he “langa māmālie” te ne faʻu ha nofo-mali ʻoku mālohí. Te ke lava ʻo lau e pōpoaki konifelenisi ʻa Palesiteni ʻUkitofa “Ko e Fakahīkihikiʻi ʻo Kinautolu ʻOku Fakahaofí” pea fakakaukau ki he faleʻi ʻokú ne ʻoange ki he ngaahi husepānití mo e ngaahi uaifí. Ko e hā ha “langa māmālie” te ke lava ʻo kamataʻi ʻi he ngaahi uike ka hoko maí ke fakamālohia ho nofo-malí pe teuteu ki ha nofo-mali ʻoku mālohí?

ʻOku ʻi ai ha ola tuʻuloa ʻo ʻetau feinga ke fakamālohia ʻetau nofo-malí. ʻOku ʻikai ngata pē ʻi hono uesia kitautolu mo hotau malí ʻe heʻetau nofo-malí, ka ʻoku kau ai mo ʻetau fānaú mo ʻenau fānaú, ʻo aʻu ki ʻitāniti. ʻI he pōpoaki ʻa ʻEletā Mātiu L. Kāpenitā ko e “Fua ʻOku Tolongá,” naʻá ne lea kau ki he mahuʻinga ʻo hono fakatolonga e “fua” ʻo ʻetau fuakava ʻi he malí pea fakahoa ia ki hono fakatolonga fakalelei ʻo e fuaʻiʻakaú ʻi he ngaahi foʻi hiná. Naʻá ne akonaki, “Kapau ʻoku tau fakahoko mo tauhi ʻa e ngaahi fuakava mo e ʻOtuá, ʻe lava ke ope atu ʻa e ngaahi tāpuaki ʻoku fekauʻaki mo ʻetau ngaahi fuakavá ʻi he moʻuí ni pea silaʻi kiate kitautolu, pe tolonga, ʻo taʻengata, ʻo hoko ko ha fua ʻoku tolonga ki he kotoa ʻo e ʻitānití.” Mahalo te ke fakakaukau ke lau pe fanongo ki he pōpoaki ko ʻení lolotonga hoʻomou kai fakataha ha fuaʻiʻakau kuo fakatolonga. Talanoa fekauʻaki mo e founga ke tanumaki ai ha nofo-mali ke maʻu ai ha “fua ʻoku tolonga” ʻo ope atu ʻi he moʻuí ni pea aʻu ki ʻitānití.

ʻOku fepaki e tokolahi taha ʻo e ngaahi hoa malí mo ha ngaahi faingataʻa mei he taimi ki he taimi, pea taimi ʻe niʻihi ʻoku ngali tāumamaʻo ʻa e mali taʻengatá. Ka naʻe akonaki ʻa Palesiteni Hingikelī ʻo pehē: “ʻOku ʻikai ko e vete-malí e faitoʻo ki he konga lahi ʻo e palopalema fakamalí. ʻOku maʻu ia ʻi he fakatomalá mo e faʻa-fakamolemolé, ʻi he fakahaaʻi ʻo e angaʻofá mo e tokangá. ʻE maʻu ia ʻi hono fakaʻaongaʻi ʻo e Lao Koulá.” Kapau ʻokú ke fepaki mo ha ngaahi faingataʻa ʻi hoʻo nofo-malí, talanoa fakataha fekauʻaki mo e founga ʻe ala tokoni ai hono manatuʻi hoʻomo ngaahi fuakavá ke mo fakahoko e ngaahi liliu te mo fie vakai ki aí. Fili ha meʻa kuo hoko ko ha faingataʻa ʻi hoʻomo nofo-malí, pea ngāue fakataha ke fakaleleiʻi ia (ʻoku lahi ha ngaahi fakakaukau ʻi he tohi fakahinohino Ko Hono Fakamālohia ʻo e Nofo-malí ʻe lava ʻo tokoni). Kumi tokoni mei ha tokotaha falalaʻanga (hangē ko ha taki ʻo e Siasí, tokotaha faifaleʻi, pe faifaleʻi ki he nofo-malí) ʻo ka fiemaʻu.

Tokāteline mo e Ngaahi Fuakava 132:7, 15–20

Russell M. Nelson, “Ko e Mali Fakasilesitialé,” Liahona, Nōvema 2008, 92–94

Marcus B. Nash, “Ko e Fuakava Foʻou mo Taʻengatá,” Liahona, Tīsema 2015, 40–47