Mate, Fakatuʻasino

Ko e mate fakatuʻasinó ko e mavahe ia ʻa e laumālié mei he sino fakamatelié. Ne ʻomi ʻe he Hinga ʻa ʻĀtamá ʻa e mate fakatuʻasinó ki he māmaní. Tuʻunga ʻi he Fakalelei mo e Toetuʻu ʻa Sīsū Kalaisí, ʻe toetuʻu pea ʻe huhuʻi ʻa e faʻahinga kotoa pē ʻo e tangatá mei he mate fakatuʻasinó.

Ko e maté ko ha konga mahuʻinga ia ʻo e palani ʻo e fakamoʻui ʻa e Tamai Hēvaní. Kuo pau ke tau foua ʻa e maté mo maʻu ha sino haohaoa kuo toetuʻu ʻamui, kae lava ke tau hoko ʻo tatau mo ʻetau Tamai Taʻengatá.

Ko e taimi ʻoku mate ai ʻa e sino fakamatelié, ʻoku kei hoko atu pē ʻa e moʻui ʻa e laumālié. ʻI he maama tataliʻanga ʻo e ngaahi laumālié, ko e ngaahi laumālie ʻoku māʻoniʻoní “ʻe tali ʻa kinautolu ki ha potu ʻo e fiefia, ʻa ia ʻoku ui ko palataisi, ko ha potu ʻo e mālōlō, ko ha potu ʻo e melino, ʻa ia te nau mālōlō ai mei heʻenau ngaahi faingataʻaʻia kotoa pē mo e hohaʻa kotoa pē mo e mamahi.” Ko ha feituʻu ʻoku ui ko e fale fakapōpula ʻa e ngaahi laumālié ʻoku fakatatali “maʻanautolu [kuo] pekia ‘i heʻenau ngaahi angahalá, ‘o ka ʻikai ha ‘ilo ki he moʻoní, pe ko ʻenau maumau-fonó, ʻo nau fakafisinga ‘a e kau palōfitá.” Ko e ngaahi laumālie ʻi he fale fakapōpulá ʻoku “akoʻi kiate kinautolu ʻa e tui ki he ʻOtuá, fakatomala mei he angahalá, papitaiso fakafofonga ki he fakamolemole ʻo e ngaahi angahalá, pea mo e maʻu ʻo e meʻa-foaki ʻo e Laumālie Māʻoniʻoní ʻi he hilifaki ʻo e nimá, pea mo e ngaahi tefitoʻi moʻoni kehe kotoa pē ʻo e ongoongoleleí ʻa ia naʻe ʻaonga ke nau ʻilo ki ai.” Kapau te nau tali ʻa e ngaahi tefitoʻi moʻoni ʻo e ongoongoleleí, fakatomala mei heʻenau ngaahi angahalá, pea tali e ngaahi ouau ne fakahoko maʻanautolu ʻi he ngaahi temipalé, ʻe talitali lelei kinautolu ki palataisi.

Tuʻunga ʻi he Fakalelei mo e Toetuʻu ʻa Sīsū Kalaisí, ʻoku fakataimi pē ʻa e mate fakatuʻasinó: “He ʻoku hangē ʻoku mate kotoa pē ʻia ʻĀtamá, ʻe pehē foki e moʻui kotoa pē ʻia Kalaisí.” ʻE toetuʻu ʻa e tokotaha kotoa pē, ʻoku ʻuhinga ia ʻe toe fakatahaʻi ʻa e laumālie ʻo e tokotaha kotoa pē mo hono sinó—“ʻe fakafoki ʻa e ngaahi meʻa kotoa pē ki honau angatotonu mo haohaoá” pea he ʻikai ke toe moʻulaloa ki he maté.