Loto-fakatōkilalo

Ko e loto-fakatōkilaló, ko hono fakatokangaʻi ia ‘i he loto-houngaʻia ‘etau fakafalala ki he ʻEikí—ke mahino ‘oku tau fiemaʻu maʻu pē ʻa ʻEne tokoní. Ko e loto-fakatōkilaló ko hano ʻiloʻi ko hotau ngaahi talēnití mo e meʻa ʻoku tau malavá ko e meʻaʻofa ia mei he ʻOtuá. ʻOku ʻikai ko ha fakaʻilonga ia ʻo e vaivai, ngāvaivai, pe ilifia; ko ha fakaʻilonga ia ʻoku tau ʻiloʻi pe ʻoku maʻu moʻoni mei fē hotau mālohí. Te tau lava ‘o fakatou loto-fakatōkilalo mo taʻe-ilifia. Te tau lava ‘o fakatou loto-fakatōkilalo mo loto-toʻa.

Ko Sīsū Kalaisi ʻetau sīpinga maʻongoʻonga taha ʻo e loto-fakatōkilaló. Lolotonga ʻEne ngāue ʻi he māmaní, naʻá Ne fakahā maʻu pē naʻe maʻu Hono mālohí koeʻuhí ko ʻEne fakafalala ki Heʻene Tamaí. Na‘á Ne folofola: “ʻOku ʻikai te u faʻa fai ʻe au pē ha meʻa. … ʻOku ʻikai te u fai ki hoku loto ʻoʻokú, ka ko e finangalo ʻo e Tamai naʻá ne fekau aú.”

ʻE fakamālohia kitautolu ʻe he ʻEikí ʻi heʻetau loto-fakatōkilalo ʻi Hono ʻaó. Naʻe akoʻi ʻe Sēmisi: “ʻOku tekeʻi ʻe he ʻOtuá ʻa e laukaú, ka ʻokú ne foaki ʻa e ʻofá ki he angavaivaí. … Fakavaivaiʻi ʻa kimoutolu ʻi he ʻao ʻo e ʻEikí, pea ʻe hakeakiʻi ʻe ia ʻa kimoutolu.”