Ngaahi Fakataha Alēlea Fakafāmilí

ʻOku tokoni e ngaahi fakataha alēlea fakafāmilí ke fekumi e kau mēmipa ʻo e fāmilí ki he finangalo ʻo e ʻEikí ʻi he uouangataha mo e tui. ʻI ha fakataha alēlea fakafāmili, ʻoku talanoa fakataha e kau mēmipa ʻo e fāmilí, fevahevaheʻaki e ngaahi ongó mo e fakakaukaú, pea felotoi ki ha palani ngāue.

Naʻe fakafeʻiloaki mai e ngaahi fakataha alēlea peheé ʻi heʻetau moʻui ʻi he maama fakalaumālié. Kuo akoʻi ʻe he kau taki ʻo e Siasí naʻa tau kau ʻi ha fakataha alēlea fakafāmili ʻi he maama fakalaumālié, ʻi heʻetau nofo mo ʻetau ongomātuʻa fakalangí ko ʻEna fānau fakalaumālié.

ʻE lava ke muimui ʻa e ngaahi fāmilí ki he sīpinga taʻengata ko ʻení ʻo fakaʻaongaʻi ʻa e ngaahi fakataha alēleá ke fokotuʻu ha ngaahi taumuʻa, fakaleleiʻi e ngaahi faingataʻá, aleaʻi e ngaahi meʻa fakapaʻangá, fakahoko ha ngaahi palani, fepoupouaki mo fefakamālohiaʻaki, vahevahe e fakamoʻoní, fakatupulaki e uouangatahá, mo fehūfiaʻaki. ʻOku ola lelei taha ʻa e ngaahi fakataha alēlea fakafāmilí ʻi he taimi ʻoku fakaafeʻi ai ʻa e ʻEikí ʻi he lotú ke hoko ko ha konga ʻo kinautolu. ʻOku poupouʻi kitautolu ʻe he ngaahi folofolá ke “fealeaʻaki mo e ʻEikí ʻi he meʻa kotoa pē te [tau] fai, pea te ne fakahinohinoʻi [kitautolu] ʻi he meʻa ʻoku leleí.”

ʻE lava ke fakahoko e ngaahi fakataha alēlea fakafāmilí ʻi ha faʻahinga taimi pē ʻoku fiemaʻu aí. ʻE lava ke fakakaukau ha fāmili ke fakahoko ʻenau ngaahi fakataha alēleá ʻi ha taimi-tēpile angamaheni, kae fakahoko ia ʻe ha niʻihi kehe ʻo fakatatau ki hano fiemaʻu. ʻE ala fiemaʻu ʻe he mātuʻá he taimi ʻe niʻihi ke fakahoko ha fakataha alēlea fakafāmili ʻi he Sāpaté pe fakafekauʻaki ia ki ha efiafi ʻi ʻapi.

ʻOku faʻa kau e fāmilí kotoa ki he ngaahi fakataha alēlea fakafāmilí ka ʻe lava pē ke ʻi ai pē ha tamai mo ha faʻē, ongomātuʻá fakatouʻosi mo ha fānau ʻe toko taha, pe mātuʻa ʻe taha mo ha fānau ʻe toko taha. ʻE lava ke fakahoko e ngaahi fakataha alēleá ʻi ha faʻahinga ʻātakai pē ʻokú ne fakaʻatā ha fealeaʻaki lelei, ʻo tatau ai pē kapau ʻoku ʻikai fai ʻi ʻapi.

ʻOku mahuʻinga ke fakaʻapaʻapaʻi e ngaahi fakakaukau mo e ongo ʻa e niʻihi kehé ki he ola lelei ʻa e ngaahi fakataha alēlea fakafāmilí. ʻOku taki e mātuʻá ʻi ha fakataha alēlea fakafāmili ka ʻokú na faʻa fanongo ʻo lahi ange ʻi heʻena leá. ʻOkú na tokoniʻi e kau mēmipa kotoa ʻo e fāmilí ke nau kau atu ʻi he ʻofa, fakaʻapaʻapa, angaʻofa, mo e faʻa kātaki. ʻI he taimi ʻoku fonu ai e ngaahi fakataha alēlea fakafāmilí ʻi he ʻofa faka-Kalaisí pea tataki ʻe he Laumālie ʻo e ʻEikí, ʻoku tokoni ia ke maluʻi e kau mēmipa ʻo e fāmilí mei he ngaahi kovi ʻo e māmaní.

Ki ha fakamatala lahi ange fekauʻaki mo e founga ke fakahoko ai ha fakataha alēlea ʻoku ola leleí, vakai ki he tefito “Ngaahi Fakataha Alēlea ʻa e Siasí” ʻi he Ngaahi Tefitó mo e Ngaahi Fehuʻí.