Moʻui Leleí

Kuo hoko hono tauhi ʻo e moʻui lelei fakatuʻasinó ko ha sīpinga ia ʻo e ongoongoleleí ʻi he fakalau ʻa e ngaahi taʻú—mei he ngaahi lao maʻu meʻatokoni pau ʻo ʻIsileli ʻi he kuonga muʻá, fakataha mo e sīpinga ʻa Taniela mo hono ngaahi kaungā-ngāué, ki he Lea ʻo e Potó ʻi he kuonga fakakosipeli ko ʻení mo e ngaahi akonaki ʻa e kau palōfita mo e kau ʻaposetolo ʻo e ʻaho ní. Ko e sino fakamatelié ko ha meʻaʻofa ia mei he ʻOtuá pea ʻoku totonu ke tokangaʻi fakalelei mo fakaʻapaʻapaʻi ia. ʻOku toe mahuʻinga foki ʻa e moʻui lelei fakaeʻatamaí pea ʻoku ʻikai totonu ke taʻe-fakatokangaʻi, he te ne lava ʻo fakatou uesia fakatuʻasino mo fakalaumālie kitautolu. Kuo pau ke tau fai e meʻa kotoa te tau lavá ke tokangaʻi hotau sinó mo hotau ʻatamaí fakatouʻosi.

“ʻOku tuku mai ʻe he ʻEikí ha tuʻunga moʻui māʻolunga maʻatautolu ʻi hono talamai ke manatuʻi ko hotau sinó ko e temipale. … [Kuó Ne] fokotuʻu … ha ngaahi tefitoʻi tuʻunga moʻui ki hono tokangaʻi hotau sinó” mo e moʻui lelei fakaeʻatamaí ke tau hoko ai ʻo moʻui fakafalala pē kiate kitautolu mo mateuteu lelei ange ke fakalakalaka fakataautaha, fakamālohia e fāmilí, mo ngāue ʻi he Siasí mo e koló.