Lakanga Taulaʻeiki Faka-ʻĒloné

Ko e ngaahi tuʻunga ʻo e Lakanga Taulaʻeiki Faka-ʻĒloné ko e tīkoni, akonaki, taulaʻeiki mo e pīsope.

Tīkoni. ʻI he Siasi ʻo Sīsū Kalaisí, ʻe lava ke fakanofo ʻa e kau talavoú ki he tuʻunga ko e tīkoni ʻi he ʻaho 1 ʻo Sānuali ʻo e taʻu ʻoku hoko ai honau taʻu 12. ʻOku tufa ʻe he kau tīkoní ʻa e sākalamēnití ʻi hano fakamafaiʻi ʻe he taki lakanga fakataulaʻeiki pulé (ʻoku angamaheni ʻaki ko e pīsopé pe palesiteni fakakoló). ʻOku nau tokoni ki he pīsopé pe palesiteni fakakoló ke tokangaekina e kāingalotu ʻo e Siasí ʻaki ʻenau ngāue mo tokoni ʻi he ngaahi meʻa fakatuʻasinó ʻo hangē ko hono tānaki ʻo e foaki ʻaukaí (ʻi he feituʻu ʻoku malava aí).

Akonaki. ʻE lava ke fakanofo ʻa e kau talavoú ki he tuʻunga ko e akonaki ʻi he ʻaho 1 ʻo Sānuali ʻo e taʻu ʻoku hoko ai honau taʻu 14. ʻE lava ke fakahoko ʻe he kau talavou ko ʻení ʻa e ngaahi fatongia kotoa pē ʻo e kau tīkoní. ʻOku ʻi ai honau ngaahi fatongia makehe hangē ko hono teuteuʻi e mā mo e vai sākalamēnití pea mo e hoko ko e kau tangata ngāue fakaetauhi.

Taulaʻeiki. ʻE lava ke fakanofo ʻa e kau talavoú ki he tuʻunga ko e taulaʻeiki ʻi he ʻaho 1 ʻo Sānuali ʻo e taʻu ʻoku hoko ai honau taʻu 16. ʻE lava ke nau fakahoko ʻa e ngaahi fatongia kotoa pē ʻo e kau tīkoní mo e kau akonakí. Te nau lava foki ʻo tāpuakiʻi e sākalamēnití, papitaiso, fakahoko e papitaiso maʻá e pekiá ʻi he temipalé, mo fakanofo e niʻihi kehé ki he ngaahi tuʻunga ʻo e taulaʻeiki, akonaki, mo e tīkoni, ʻi hano fakamafaiʻi ʻe he taki lakanga fakataulaʻeiki pulé.

Pīsope. Ko e pīsopé ko ha tangata ia kuo fakanofo pea vaheʻi ko e taulaʻeiki lahi pule ki ha uooti pe kāingalotu. ʻOkú ne maʻu ʻa e fatongia ke tokangaʻi ʻa e ngaahi fiemaʻu fakatuʻasino mo fakalaumālie ʻa e kāingalotú. ʻOku tokangaʻi ʻe he pīsopé ʻa e kāingalotu ʻo e uōtí ʻaki e ʻofa mo tokoniʻi kinautolu ke nau muimui kia Sīsū Kalaisi. ʻOku nau maʻu e fakahā maʻá e uōtí. ʻOku nau ʻomi foki ha tokoni fakauelofea mei he paʻanga kuo foaki ki he Siasí ke tokoniʻi ʻa e niʻihi ʻoku faingataʻaʻia fakapaʻangá pe ʻi ha ngaahi founga kehé. ʻIkai ke ngata aí, ʻoku nau tokangaʻi e ʻū lekooti mo e meʻa fakapaʻanga ʻa e uōtí pea mo hono tauhi mo fakaʻaongaʻi ʻo ʻenau ʻapisiasi fakalotofonuá.

Ko e kōlomu lakanga fakataulaʻeikí ko ha kulupu ʻo ha houʻeiki tangata pe kau talavou kuo fokotuʻutuʻu maau ʻa ia ʻoku nau maʻu e lakanga fakataulaʻeikí. Ko e kau mēmipa ʻo e kōlomú ʻoku nau “tokoniʻi e niʻihi kehé, fakahoko e ngaahi fatongia fakataulaʻeikí, langaki ʻa e uouangatahá, pea ako mo moʻui ʻaki e tokāteliné.” ‘Oku fokotuʻutuʻu ʻa e ngaahi kōlomú maʻá e Lakanga Taulaʻeiki Faka-Melekisētekí mo e Faka-ʻĒloné fakatouʻosi. Ko e ngaahi kōlomu ʻe tolu ʻi he Lakanga Taulaʻeiki Faka-ʻĒloné ko e kōlomu ʻa e kau tīkoní, kōlomu ʻa e kau akonakí, mo e kōlomu ʻa e kau taulaʻeikí.

Ko e ngaahi kōlomu ʻo e Lakanga Taulaʻeiki Faka-ʻĒloné ʻoku taki ia ʻe ha palesiteni ʻa ia ʻoku vaheʻi, pe foaki ki ai e mafai ʻo e lakanga fakataulaʻeikí, ke ne tokangaʻi. Ko e ongo kōlomu ʻo e tīkoní mo e akonakí, ko e palesiteni aí ko ha talavou ʻi he kōlomú; ko e pīsopé ʻoku palesiteni ʻi he kōlomu ʻo e kau taulaʻeikí. ʻOku foaki ki he palesitení ʻa e ngaahi kī ʻo e lakanga fakataulaʻeikí ʻoku fiemaʻu—pe ko e totonu—ke fakakakato ʻaki e ngaahi fatongia ʻo e uiuiʻi ko iá. ʻI he feituʻu ʻoku malava aí, ʻoku kau ʻi he ngaahi kōlomu ʻo e Lakanga Taulaʻeiki Faka-ʻĒloné ha ongo tokoni (ki he ongo kōlomu ʻo e kau tīkoní mo e kau akonakí) mo ha ongo ʻasisiteni (ki he kōlomu ʻo e kau taulaʻeikí) kuo uiuiʻi ke poupouʻi ʻa e palesitení pea mo faʻu ha kau palesitenisī. ʻE lava foki ke kau ai mo ha sekelitali maʻá e kōlomú ʻi he taimi ʻe lava aí.

• Pīsopé

• Lakanga Taulaʻeiki Faka-Melekisētekí

• Lakanga Fakataulaʻeikí

• Ngaahi Folofolá

• Ngaahi pōpoaki mei he kau taki ʻo e Siasí

• Ngaahi Vitiō

• Maʻuʻanga tokoni maʻá e fānaú

• Ngaahi himí mo e ngaahi hiva ʻa e fānaú