Ngaahi Fakataha Alēlea ki he Tuʻunga Mēmipasipí

ʻOku ʻofa ʻetau Tamai Hēvaní ʻiate kitautolu kotoa mo finangalo ke tau foki hake ʻo nofo mo Ia. Koeʻuhí ʻoku tau faiangahala kotoa pē, kuó Ne ʻomi ai ʻa e meʻaʻofa ʻo e fakatomalá, ʻa ia “ko e kī ia ki he fiefia mo e nonga ʻo e ʻatamaí. … Ko e taimi ʻoku tau fili ai ke fakatomalá, ʻoku tau fili ke … tupulaki fakalaumālie mo fiefia.”

Ko e lahi taha ʻo e fakatomalá ʻoku hoko ia ʻi he vahaʻa ʻo ha taha fakafoʻituitui, ko ha ʻOtua ʻofa, mo kinautolu kuo uesia ʻe ha faiangahala ʻa ha taha. Neongo ia, kapau ʻoku fakahoko ʻe ha mēmipa ʻo e Siasí ha angahala mamafa, ʻe ala fiemaʻu ke tokoniʻi ia ʻe he pīsopé pe palesiteni fakasiteikí ʻi heʻene fakatomalá.

Ko e konga ʻo e fakatomala ʻa ha mēmipa mei ha angahala mamafá ʻa e malava ke mole meiate ia ha ngaahi faingamālie ʻi he tuʻunga mēmipa ʻo e Siasí ʻi ha kiʻi vahaʻataimi. ʻOku faʻa fakahoko ʻi he taimi ʻe niʻihi ʻa e ngaahi tuʻutuʻuni fekauʻaki mo e mēmipasipí mo e ngaahi faingamālie ki he tuʻunga mēmipasipí ʻi ha fakataha alēlea ki he tuʻunga mēmipasipí. Ko e ngaahi taumuʻa ʻo e ngaahi fakataha alēlea ki he tuʻunga mēmipasipí ke tokoni ki hono maluʻi ʻa e niʻihi kehé, tokoniʻi ha taha ke ne maʻu ʻa e mālohi huhuʻi ʻo Sīsū Kalaisí ʻo fakafou ʻi he fakatomalá, mo maluʻi ʻa e ngeia ʻo e Siasí.

ʻI ha fakataha alēlea ki he tuʻunga mēmipasipí, ʻe fakapapauʻi ʻe he pīsopé pe palesiteni fakasiteikí ʻo fakafou ʻi he fealeaʻaki ʻaki ʻa e laumālie ʻo e ʻofá mo e ueʻi fakalaumālie mei he ʻEikí, pe ʻoku kei ʻi ha tuʻunga lelei nai ʻa e tokotahá pe ʻoku totonu ke fakangatangata pe toʻo ʻa e mēmipasipi ʻo ha taha mei he Siasí.

ʻOku ʻikai fakataumuʻa e fakangatangata pe toʻo e mēmipasipi ʻo ha taha ko ha tautea. Ka, ko e ongo ngāué ni ke tokoniʻi ha taha ke fakatomala mo aʻusia ha liliu ʻo e lotó. ʻOku toe ʻoange foki ai ha taimi ki he tokotahá ke ne teuteu fakalaumālie ai ke toe fakafoʻou mo tauhi ʻene ngaahi fuakavá. ʻI he fakatomala ʻa ha taha, ʻe lava ke fakaivia ia mo maʻu ha poupou ʻi heʻene ʻalu ki he ngaahi houalotu mo e ngaahi ʻekitivitī ʻa e Siasí. ʻI he taimi kuo fakatomala moʻoni ai ha taha, ʻe lava ke fakafoki kiate ia peá ne toe maʻu ʻa e ngaahi faingamālie kotoa ʻo e mēmipasipi ʻi he Siasí.

Ki ha fakamatala lahi ange fekauʻaki mo e ngaahi fakataha alēlea ki he tuʻunga mēmipasipi ʻi he Siasí, vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, vahe 32, ChurchofJesusChrist.org.