Ngāue Maʻuʻanga Moʻuí

Ko e ngāue maʻuʻanga moʻuí ko ha konga mahuʻinga ia ʻo ʻetau moʻui ʻi he māmaní; ʻokú ne ʻomi kiate kitautolu e ngaahi founga ke tokonaki maʻa hotau ngaahi fāmilí. ʻOku fiemaʻu ʻe he ʻOtuá ʻa e ngaahi mātuʻá ke tokonaki maʻa honau ngaahi fāmilí. ʻI he “Ko e Fāmilí: Ko ha Fanongonongo ki Māmaní,” ʻoku pehē ai, “ʻoku ʻa e ngaahi tamaí ai, ke nau puleʻi honau fāmilí ʻi he ʻofa mo e māʻoniʻoni pea ko honau fatongia ke tokonaki ʻa e ngaahi fiemaʻu ʻo e moʻuí pea mo ha maluʻi maʻa honau ngaahi fāmilí. … ʻOku haʻisia ai ʻa e ngaahi tamaí mo e ngaahi faʻeé ke nau fetokoniʻaki ko ha kaungā-ngāue tuʻunga tatau. Ka ʻe fiemaʻu ke fai ha liliu fakafoʻituitui ia ʻo ka hoko ha faingataʻaʻia fakaesino, mate, pe ko ha ngaahi toe tūkunga kehe.”

Ko e ngāué ko ha tefitoʻi moʻoni mahuʻinga ia ʻo e ongoongoleleí. ʻOkú ne tanumaki ʻa e fakalakalaká mo fakatupulaki kitautolu. ʻOku fakahalaiaʻi ʻe he ʻOtuá ʻa e nofo noá pea poupouʻi kitautolu ke “fai ʻa e ngaahi meʻa lahi ko [ʻetau] fili tauʻatāina [ʻatautolu] pē.” ʻOku ʻikai ngata pē ʻi he finangalo ʻa e ʻEikí ke tau tokonaki maʻa hotau ngaahi fāmilí ka ke tau “femoʻuekina … ʻi ha ngāue lelei.” ʻOku mahuʻinga e ngāue leleí ke tau lava ai ʻo tokonaki maʻa hotau ngaahi fāmilí pea ngāue faivelenga ʻi he Siasí.

Talu mei he kamataʻangá mo hono fekauʻi ʻe he ʻEikí ʻa ʻĀtama ke ngoueʻi ʻa e kelekelé pea pule ki he fanga manu ʻo e ngoué, ke kai ʻene maá ʻi he kakava ʻo hono matá. Naʻe pehē ʻe ʻEletā L. Tomu Peuli ʻo e Kōlomu ʻo e Kau ʻAposetolo ʻe Toko Hongofulu Mā Uá: “Kuó u mahuʻingaʻia maʻu pē ʻi he tuʻo lahi hono naʻinaʻi mai ʻe he folofolá ke ʻoua te tau nofo noa pea feinga ke ola mo ʻaonga ʻetau ngaahi ngāue kotoa pē. … Ko hono akoʻi ki he fānaú ‘a e fiefia ‘o e ngāue angatonú, ko e taha ia ‘o e ngaahi meʻafoaki maʻongoʻonga taha ‘e lava ke ke foaki atu kiate kinautolú.”

“ʻAi muʻa ke tau ʻilo ko e faingamālie ko ia ke ngāué ko ha meʻaʻofa ia, ko e mālohi ke ngāué ko ha tāpuaki pea ko e ʻofa ko ia ʻi he ngāué ko e lavameʻá ia.”