“Fāmilí,” Ngaahi Tefitó mo e Ngaahi Fehuʻí (2025)
Vakai Fakalūkufuá
Fāmilí
ʻI heʻetau hoko ko e ngaahi foha mo e ngaahi ʻofefine fakalaumālie ʻo ha ongomātuʻa fakalangi, ʻoku tau hoko kotoa pē ko e kau mēmipa ʻo e fāmili ʻo e ʻOtuá. Ko e fāmilí ko ha konga mahuʻinga ia ʻo e palani ʻa e ʻOtuá maʻa ʻEne fānaú. Kuo fokotuʻu ʻe he ʻEikí ʻa e fāmilí ke hoko ko e tefitoʻi ʻiuniti ʻo e Siasí mo e sosaietí. Ko e taha ia ʻo e ngaahi tāpuaki maʻongoʻonga taha te tau lava ʻo maʻu ʻi he moʻui ní.
ʻOku faʻa kau ʻi he fāmilí ha husepāniti mo ha uaifi mo ha fānau pea taimi ʻe niʻihi ʻoku nofo ha kāinga kehe ʻi he ʻapi tatau. ʻE lava foki mo ha taha ʻoku nofo toko taha, ko ha mātuʻa taautaha mo e fānau, pe husepāniti mo ha uaifi taʻe ʻi ai ha fānau ʻo hoko ko ha fāmili. ʻOku ʻi ai ha ngaahi hoa mali ʻe niʻihi kuo nau ohi pe tauhi ha fānau ʻi honau fāmilí. ʻOku hoko foki ʻa e kāinga mamaʻo ʻoku ʻikai nofo mo kitautolú ko hotau fāmili. Pea taimi ʻe niʻihi ʻoku ʻi ai hotau ngaahi kaungāmeʻa mamae ʻoku tau lau ko hotau fāmili.
ʻE lava ke fehangahangai e ngaahi fāmilí he ʻahó ni mo ha ngaahi faingataʻa lahi. Neongo hotau lelei tahá, ka ʻoku faingataʻa he taimi ʻe niʻihi ʻa e moʻui fakafāmilí. Ko e taimi ʻe niʻihi ʻoku ʻi ai ha fakakikihi. Taimi ʻe niʻihi ʻoku fai ʻe he kau mēmipa ʻo e fāmilí ha ngaahi fili ʻoku ʻikai ke tau tui tatau mo ia. Ka ʻe tāpuekina hotau ngaahi fāmilí ʻi heʻetau feinga ke feʻofaʻaki mo fepoupouʻakí, ʻo tatau ai pē pe ko e hā e ngaahi fili ʻoku fai ʻe he kau mēmipa fakafoʻituitui ʻo e fāmilí. ʻE lava ke tokoniʻi kitautolu ʻe he muimui ki he ongoongolelei ʻo Sīsū Kalaisí ke tau tauhi hotau ngaahi fāmilí ke mālohi.
Neongo pe ko e hā hotau tūkungá—taautaha, mali, vete-mali, pe uitou—ʻoku kau kotoa ki he fāmili ʻo e ʻOtuá. ʻOku mahuʻinga e fānau kotoa ʻa e ʻOtuá ki Heʻene palaní, pea ʻe lava ke fakahoko ʻe he taha kotoa ha fatongia mahuʻinga ʻi hono langa hake Hono puleʻangá. ʻI heʻetau kau atu ki he ngaahi fakatahaʻanga mo e ngaahi ʻekitivitī ʻa e Siasí, te tau lava ʻo fakatupulaki ha ongoʻi ʻo e fāmilí mo ongoʻi kau he laú fakataha mo hotau kāingalotú. ʻE lava ke tāpuekina kotoa kitautolu ʻe he ongoʻi ʻoku tau kau he laú.
ʻOku Fekauʻi Kitautolu ʻe he ʻOtuá ke Tau Maʻu ha Ngaahi Fāmili
Naʻe fili ʻe he ʻOtuá ʻa ʻĀtama mo ʻIvi ko e fuofua ongomeʻa mali ʻi he māmaní. ʻI he mali ʻa ʻĀtama mo ʻIví, naʻá na hoko ai ko ha fāmili. “ʻOku fekauʻaki ʻa e fuofua fekau naʻe tuku ʻe he ʻOtuá kia ʻĀtama mo ʻIví pea mo e meʻa te na malava ʻi hona tuʻunga fakaemātuʻá, ko e husepāniti mo e uaifí.” ʻOku kei kaunga pē ʻi he ʻahó ni ʻa e fekau ko ia ke maʻu ha fānaú.
ʻI hono kapusi kinaua mei he Ngoue ko ʻĪtení, naʻe pau ke ngāue ʻa ʻĀtama ke tokonaki ha meʻakai maʻana, pea naʻe ngāue fakataha mo ia ʻa ʻIvi, ko hono uaifí. Naʻá na ako ʻa e ongoongoleleí mo feinga ke tauhi ʻa e ngaahi fekaú. Naʻá na maʻu foki mo ha ngaahi faingamālie ke akoʻi ʻena fānaú.
ʻOku tāpuekina foki ʻa e ngaahi husepānití mo e uaifí he ʻahó ni ʻi heʻena ngāue fakataha mo e ʻEikí pea fengāueʻaki ʻi hono tokangaʻi, lehilehiʻi, mo akoʻi hona fāmilí. ʻI heʻenau fai ʻení, ʻe lava ke maʻu ʻe he ngaahi hoa malí ʻa e fiefia mo e mālohi ʻi he ʻEikí pea loto taha mo fakakaukau taha ʻi hona ngaahi fatongia ʻoku vahevahé.
ʻOku fokotuʻutuʻu kitautolu ʻe he ʻOtuá ki ha ngaahi fāmili ke tau lava ʻo aʻusia e fiefiá mo ako e ngaahi ʻulungaanga hangē ko e manavaʻofá, ʻofá, faʻa kātakí mo e ngāue taʻe-siokitá. ʻOku tokoni mai e ngaahi ʻulungaanga ko ʻení ke tau hoko ʻo tatau ange mo e ʻOtuá pea teuteuʻi ai kitautolu ke moʻui fiefia ko e ngaahi fāmili ʻi ʻitāniti. ʻE lava ke hokohoko atu ʻa e ngaahi vā fetuʻutaki fakafāmili kuo faʻu ʻi he māmaní hili ʻa e moʻui ko ʻení kapau ʻoku silaʻi kitautolu ʻi he temipalé pea tau tauhi faivelenga ki heʻetau ngaahi fuakavá.
Ko e Talaʻofa ʻo ha Fāmili Taʻengatá
ʻOku fehangahangai ʻa e kāingalotu kotoa pē ʻo e Siasí mo ha ngaahi ʻahiʻahi pea kuo pau ke nau ngāue ke ikunaʻi ʻa e ngaahi vaivaí. ʻOku tāpuakiʻi ʻe he ongoongolelei ʻo Sīsū Kalaisí ʻa e fānau kotoa ʻa e ʻOtuá, neongo pe ko e hā honau tūkunga fakafāmilí. Neongo ʻoku fakataumuʻa e ngāue ʻa e ʻOtuá ki he fakamoʻuí mo e hakeakiʻí ke fakatefito ʻi he ʻapí, ka ʻoku tokoni ʻa e Siasí ke poupouʻi ʻa e mātuʻá mo e ngaahi fāmilí ʻi heʻenau feinga ke moʻui ʻaki mo akoʻi e ongoongolelei ʻo Sīsū Kalaisí.
Kapau te tau langa hotau ngaahi fāmilí ʻi he ngaahi akonaki ʻa Sīsū Kalaisí—ʻo kau ai e tuí, lotú, fakatomalá, faʻa fakamolemolé, fakaʻapaʻapá, ʻofa faka-Kalaisí, manavaʻofá, ngāué, mo e fakafiefia ʻoku fakatupulakí—ʻe lava ke hoko ʻa ʻapi ko ha feituʻu ʻo e hūfangaʻanga, melino, mo e fiefia.
ʻE lava ke fekumi ʻa e tokotaha kotoa pē ki he tāpuaki kotoa pē ʻoku maʻu ʻe heʻetau Tamai Hēvaní maʻa ʻEne fānaú—kau ai ʻa e tāpuaki ʻo ha nofo-mali mo e fāmili taʻengatá. Te tau lava ʻo fai ʻeni ʻo aʻu ki heʻetau ngāue ke ikunaʻi hotau ngaahi faingataʻaʻiá ʻaki e tokoni ʻa Sīsū Kalaisí pea maʻu ʻa e fiefiá ʻi hotau ngaahi tūkunga lolotongá.
Ngaahi Tefito Fekauʻakí
-
Vete Malí
-
Ngaahi meʻa fakapaʻanga ʻa e fāmilí
-
Silá