Ongoongoleleí

Ko e ongoongoleleí ko e palani ʻo e fiefia ia ʻa ʻetau Tamai Hēvaní. Ko e uho ʻo e tokāteline ʻo e ongoongoleleí ko e Fakalelei ʻa Sīsū Kalaisí. Naʻe pehē ʻe he Palōfita ko Siosefa Sāmitá, “Ko e ngaahi ʻuluaki tefitoʻi moʻoni mo e ngaahi ouau ʻo e Ongoongoleleí ko e: ʻuluakí, Tui ki he ʻEiki ko Sīsū Kalaisí; uá, Fakatomalá; tolú, Papitaiso ʻi he fakauku ke fakamolemoleʻi ʻa e ngaahi angahalá; faá, Hilifaki ʻo e nima ke maʻu ʻa e meʻa-foaki ʻo e Laumālie Māʻoniʻoní.”

ʻOku kau ʻi he kakato ʻo e ongoongoleleí ʻa e ngaahi tokāteline, ngaahi tefitoʻi moʻoni, ngaahi fono, ngaahi ouau, mo e ngaahi fuakava kotoa ʻoku fiemaʻu ke hakeakiʻi ai kitautolu ʻi he puleʻanga fakasilesitialé. Kuo talaʻofa ʻe he Fakamoʻuí kapau te tau kātaki ki he ngataʻangá, ʻo moʻui faivelenga ʻaki ʻa e ongoongoleleí, te Ne lau ʻoku ʻikai haʻatau angahala ʻi he ʻao ʻo e Tamaí ʻi he Fakamaau Fakaʻosí.

Kuo malangaʻi ʻa e kakato ʻo e ongoongoleleí ʻi he kuonga kotoa pē ʻi he taimi kuo mateuteu ai ʻa e fānau ʻa e ʻOtuá ke tali iá. ʻI he ngaahi ʻaho kimui ní, pe ko e kuonga ʻo e kakato ʻo e ngaahi kuongá, kuo fakafoki mai ʻa e ongoongoleleí ʻi he Palōfita ko Siosefa Sāmitá.