Naʻe Fili ʻa Sīsū Kalaisi ko e Fakamoʻuí

ʻI he taimi naʻe fakahā mai ai ʻa e palani ʻo hotau fakamoʻuí kiate kitautolu ʻi he maama fakalaumālié, naʻa tau fuʻu fiefia ʻo tau “kalanga fakafiefia.” Naʻe mahino kiate kitautolu kuo pau ke tau mavahe mei hotau ʻapi fakalangí ʻi ha kiʻi taimi. Lolotonga ʻetau mavahé, te tau faiangahala kotoa pea ʻe hē ha niʻihi ʻo kitautolu mei he halá. Naʻe ʻafioʻi ʻe heʻetau Tamai Hēvaní te tau fiemaʻu tokoni, ko ia naʻá Ne palani ha founga ke tokoniʻi ai kitautolu.

Naʻa tau fiemaʻu ha Fakamoʻui ke totongi ʻetau ngaahi angahalá mo akoʻi mai ʻa e founga ke tau toe foki hake ai ki heʻetau Tamai Hēvaní. Naʻe folofola ʻetau Tamaí, “Ko hai te u fekauʻí?” Naʻe folofola ʻa Sīsū Kalaisi, ʻa ia naʻe ui ko Sihová “Ko au ʻeni, fekauʻi au.”

Naʻe finangalo lelei ʻa Sīsū Kalaisi ke hāʻele mai ki he māmaní, foaki ʻEne moʻuí maʻatautolu, pea toʻo hake kiate Ia ʻetau ngaahi angahalá. Hangē ko ʻetau Tamai Hēvaní, naʻá Ne finangalo ke tau fili pe te tau talangofua ki he ngaahi fekau ʻa e Tamai Hēvaní. Naʻá Ne ʻafioʻi kuo pau ke tau tauʻatāina ke fili kae lava ke fakamoʻoniʻi ʻoku tau taau mo e hakeakiʻí. Naʻe folofola ʻa Sīsū, “ʻE Tamai, ke fai pē ʻa ho finangaló, pea ke ʻoʻou ʻa e lāngilangí ʻo taʻengata.”

Naʻe haʻu foki ʻa Sētane, ʻa ia naʻe ui ko Lusifaá ʻo pehē, “Vakai, ko au ʻeni, fekauʻi au, te u hoko ko ho ʻAlo, pea te u huhuʻi ʻa e faʻahinga kotoa pē ʻo e tangatá, koeʻuhí ke ʻoua naʻa mole ha foʻi laumālie ʻe toko taha, pea ko e moʻoni kuo pau ke u fai ia; ko ia ke ke foaki kiate au ʻa ho lāngilangí.” ʻI he palani ʻa Sētané, he ʻikai fakangofua kitautolu ke tau fili. Te ne toʻo ʻa e tauʻatāina ke fili naʻe foaki mai ʻe heʻetau Tamaí kiate kitautolú. Naʻe fiemaʻu ʻe Sētane ke ne maʻu kotoa ʻa e lāngilangi ki hotau fakamoʻuí. Fakatatau mo ʻene fokotuʻú, naʻe mei taʻofi ʻetau taumuʻa ke haʻu ki he māmaní.

Hili ʻa e fanongo ʻa e Tamai Hēvaní ki he fakatou lea ʻa Hono ongo ʻaló, naʻá Ne folofola, “Te u fekauʻi ʻa e ʻuluakí.”