Toluʻi ‘Otuá

ʻOku pehē ʻe he ʻuluaki tefito ʻo e tui ʻa e Siasí, “ʻOku mau tui ki he ʻOtua, ko e Tamai Taʻengatá, pea ki Hono ʻAlo ko Sīsū Kalaisí, pea ki he Laumālie Māʻoniʻoní.” ʻOku faʻu ʻe he toko tolú ni ʻa e Toluʻi ʻOtuá. ʻOku Nau puleʻi ʻa e māmani ko ʻení pea mo hono kotoa ʻo e ngaahi fakatupu ʻa ʻetau Tamai ʻi he Langí.

ʻOku fakakaukau ʻa e Kau Māʻoniʻoni ʻi he Ngaahi ʻAho Kimui Ní ki he kau mēmipa ʻo e Toluʻi ʻOtuá ʻi ha founga ʻoku fenāpasi mo e ngaahi fakakaukau ʻa e niʻihi ʻi he tui Faka-Kalisitiané, ka ʻi ha ngaahi faikehekehe lahi. ʻOku lotu ʻa e Kau Māʻoniʻoni ʻi he Ngaahi ʻAho Kimui Ní ki he ʻOtua ko e Tamaí ʻi he huafa ʻo Sīsū Kalasí. ʻOku nau ʻiloʻi ko e Tamaí ʻa e taupotu taha ʻo ʻenau moihuú, ko e ʻAló ko e ʻEiki mo e Huhuʻi, pea mo e Laumālie Māʻoniʻoní ko e talafekau mo e tokotaha faifakahā ʻa e Tamaí mo e ʻAló. Ka ko e kehekehe ʻo e Kau Māʻoniʻoni ʻi he Ngaahi ʻAho Kimui Ní mei he ngaahi tui fakalotu Kalisitiané, ko ʻenau tui ko ia ʻoku maʻu ʻe he ʻOtuá mo Sīsū Kalaisi ʻa e sino nāunauʻia, pea ko e tokotaha mavahevahe ʻa e mēmipa takitaha ʻo e Toluʻi ʻOtuá.

Naʻe mole ʻa e tokāteline moʻoni ʻo e Toluʻi ʻOtuá ʻi he hē mei he moʻoní ʻa ia ne hoko ʻi he hili ʻa e ngāue ʻa e Fakamoʻuí ʻi he māmaní pea mo e pekia ʻa ʻEne kau ʻAposetoló. Naʻe kamata hono fakafoki mai ʻo e tokāteline ko ʻení ʻi hono maʻu ʻe he taʻu 14 ko Siosefa Sāmitá ʻene ʻUluaki Mata Meʻa-Hā-Maí. ʻOku tau ʻilo mei he fakamatala ʻa e Palōfitá ki he ʻUluaki Mata Meʻa-Hā-Maí pea mo ʻene ngaahi akonaki kehé, ko e kau mēmipa ʻo e Toluʻi ʻOtuá ko e toko tolu ia ʻoku sino mavahevahe. ʻOku maʻu ʻe he Tamaí mo e ʻAló ha sino ʻo e kakano mo e hui, pea ko e Laumālie Māʻoniʻoní ko ha laumālie.

Neongo ko e Toluʻi ʻOtuá ʻoku Nau mavahevahe mo ha ngaahi tufakanga pau, ka ʻoku Nau taha pē ʻi he taumuʻá mo e tokāteliné. ʻOku Nau taha pē ʻi hono fakahoko e palani ʻo e fakamoʻui fakalangi ʻa e Tamai Hēvaní.