Ngaahi Faingataʻaʻia Fakaesinó

Naʻe fakamatala ʻe he Palōfita ko Siosefa Sāmitá ko e “kau maʻu ʻatamai mo e laumālie kotoa pē kuo fekauʻi mai ʻe he ʻOtuá ki māmani ʻoku nau tuʻu ke fakalakalaka.” ʻOku ʻi māmani ʻa e kotoa ʻo e fānau ʻa e ʻOtuá ke ʻoange e faingamālie ke ako mo moʻui ʻaki e ongoongolelei ʻo Sīsū Kalaisí.

ʻOku maʻu foki ʻe he kāingalotu ʻo e Siasí ʻoku ʻi ai honau ngaahi faikehekehe pe faingataʻaʻia fakaesino ʻokú ne uesia ʻenau ngaahi ngāué pe feohí, ha ngaahi faingamālie ke ngāue fakaetauhi, akoʻi, tokoni, mo tataki. ʻOku fiemaʻu e tokoni ʻa e tokotaha kotoa pē ʻi he puleʻanga ʻo e ʻEikí. Pea ʻe lava ke fai ia ʻe ha taha pē ʻokú ne maʻu e holi ke fai ha ngaahi fuakava toputapu kapau ʻokú ne moʻui taau mo fakahaaʻi ha tuʻunga fakapotopoto ʻo e fua fatongiá mo e haʻisia ki he fatongiá.

ʻOku ʻafioʻi mo ʻofa ʻa e Tamai Hēvaní ki he kotoa ʻo ʻEne fānaú, pea ʻokú Ne ʻafioʻi e ngaahi faingataʻa ʻoku tau fehangahangai mo iá. Ko e faingataʻaʻia fakaesinó ʻoku ʻikai ko ha tautea—ʻo ʻikai ki he fakafoʻituituí pe ki he mātuʻá. Naʻe akoʻi ʻe Palesiteni Lāsolo M. Nalesoni ʻo pehē: “ʻOku ʻikai fiemaʻu e sino haohaoá kae toki aʻusia ai e ikuʻanga fakalangi ʻo ha taha. Ko hono moʻoní, ko ha niʻihi ʻo e ngaahi laumālie lelei tahá ʻoku faʻofale ia ʻi ha ngaahi sino ngāvaivai mo ʻikai haohaoa. ʻOku faʻa fakatupulaki e ivi fakalaumālie leleí ʻe ha kakai ʻoku nau faingataʻaʻia fakaesino, koeʻuhí ko ʻenau mohu faingataʻaʻiá.”

ʻOku totonu ke tau anga fakaʻapaʻapa ki he kakai faingataʻaʻia fakaesino kotoa pē pea fekumi ki ha ngaahi founga ke tokoniʻi kinautolu mo honau ngaahi fāmilí ʻaki e ʻofa faka-Kalaisí—pea ke poupouʻi kinautolu ʻi heʻenau tokoniʻi e niʻihi kehé.