Tauʻatāina ke Filí mo e ʻEkeʻi Meiate Kita ʻa e Meʻa Ke Fai pe Taʻe Faí

Ko e tauʻatāina ke filí ko e ivi malava mo e faingamālie ia ʻoku foaki mai ʻe he ʻOtuá ke tau fili mo ngāue maʻatautolu. ʻOku mahuʻinga ʻa e tauʻatāina ke filí ʻi he palani ʻo e fakamoʻuí. Ka ne taʻeʻoua ʻa e tauʻatāina ke filí, he ʻikai malava ke tau ako pe fakalakalaka pe muimui ki he Fakamoʻuí. Ko ia ʻoku tau, “tauʻatāina ke fili ʻa e tauʻatāiná mo e moʻui taʻengatá, tuʻunga ʻi he Fakalaloa maʻongoʻonga ʻo e faʻahinga kotoa ʻo e tangatá, pe fili ʻa e pōpulá mo e maté, ʻo fakatatau ki he hopoate mo e mālohi ʻo e tēvoló.”

Naʻa tau maʻu ʻa e tauʻatāina ke filí ʻi heʻetau moʻui ʻi he maama fakalaumālié. Ko e taumuʻa ʻe taha ʻo e moʻui ʻi he māmaní, ke fakahaaʻi ʻa e ngaahi fili te tau fakahokó. Kapau ne fakamālohiʻi kitautolu ke tau fili ʻa e totonú, he ʻikai ke tau mei lava ʻo fakahaaʻi ʻa e meʻa ne tau fili maʻatautolú. ʻIkai ngata aí, ʻoku tau fiefia ange ʻi he taimi kuo tau fai ai ʻetau fili pē ʻatautolú.

Ko e tauʻatāina ke filí ko e taha ia ʻo e ngaahi meʻa mahuʻinga taha ne aleaʻi ʻi he Fakataha Alēlea ʻi he Langí he maama fakalaumālié. Ko e taha ia e ngaahi ʻuhinga lahi ne fepaki ai ʻa e kau muimui ʻa Kalaisí mo e kau muimui ʻa Sētané.

Kuo folofola ʻe he ʻEikí, ʻoku fatongia ʻaki ʻe he kakai kotoa pē ʻa ʻenau ngaahi fakakaukaú, ngaahi ʻulungāngá, ngaahi holí, mo e ngaahi angafaí. Neongo ʻoku tau tauʻatāina ke fili ʻa ʻetau angafaí, ka ʻoku ʻikai ke tau tauʻatāina ke fili ʻa e ngaahi nunuʻa ʻo ʻetau ngaahi tōʻonga ko iá. ʻOku muiaki mai ʻa e ngaahi nunuʻá, tatau ai pē pe ʻoku lelei pe kovi, ko ha ola fakanatula ʻo ha faʻahinga fili pē ʻoku tau fai.