Fakataha Alēlea ʻi he Langí

ʻI he maama fakalaumālié, naʻe ui ʻe heʻetau Tamai Hēvaní ha Fakataha Alēlea Lahi ke fakamatalaʻi ʻEne palani ki heʻetau fakalakalaká. Ne tau ako ai kapau te tau muimui ki Heʻene palaní, te tau hoko ʻo hangē ko Iá. Te tau toetuʻu; te tau maʻu ʻa e mālohi kotoa pē ʻi he langí pea ʻi māmani; te tau hoko ko ha ongomātuʻa fakalangi pea maʻu mo ha fānau fakalaumālie ʻo hangē pē ko Iá.

Naʻa tau ako te Ne ʻomi ha māmani maʻatautolu ʻa ia ʻe siviʻi ai kitautolu. ʻE ʻufiʻufi ʻe ha veili ʻa ʻetau ngaahi manatú, pea ʻe ngalo ʻiate kitautolu ʻa hotau ʻapi fakalangí. Naʻe mahuʻinga ʻeni kae lava ke tau fakaʻaongaʻi ʻetau tauʻatāina ke fili ʻa e leleí pe koví ʻo ʻikai tākiekina ʻe he manatu ki heʻetau nofo fakataha mo ʻetau Tamai Hēvaní. Te Ne tokoniʻi kitautolu ke tau fakatokangaʻi ʻa e moʻoní ʻi he taimi te tau toe fanongo ai ki ai ʻi he māmaní.

ʻI he Fakataha Alēlea Lahí ne tau ʻilo foki ai ʻa e taumuʻa ki heʻetau fakalakalaká: ke maʻu ha fiefia kakato. Ka neongo ia, naʻa tau ʻilo foki ʻe kākaaʻi ha niʻihi, fili ha ngaahi hala kehe, pea hē mei honau halá. Ne tau ʻilo ai te tau foua kotoa ha ngaahi faingataʻa ʻi heʻetau moʻuí: ʻa e puké, siva e ʻamanakí, faingataʻaʻiá, mamahí, mo e maté. Ka naʻe mahino kiate kitautolu ʻe hoko e ngaahi meʻá ni ke tau maʻu ai ʻa e potó pea ʻe ʻaonga ia kiate kitautolu. Kapau te tau fakangofua, ʻe hanga ʻe he ngaahi ʻahiʻahi ko ʻení ʻo fakahaohaoaʻi kitautolu kae ʻikai ke ikunaʻi kitautolu.

Naʻa tau ako foki ʻi he fakataha alēlea ko ʻení koeʻuhí ko hotau ngaahi vaivaí, te tau faiangahala kotoa pē, tukukehe ʻa e fānau īkí. Ne tau ʻiloʻi ʻe ʻomi ha Fakamoʻui maʻatautolu koeʻuhi ke tau lava ʻo ikunaʻi ʻa ʻetau ngaahi angahalá pea mo e maté, ʻaki ʻa e toetuʻú. Naʻa tau ʻilo kapau te tau tui kiate Ia, talangofua ki Heʻene folofolá pea muimui ki Heʻene sīpingá, ʻe hakeakiʻi kitautolu pea te tau hoko ʻo hangē ko ʻetau Tamai Hēvaní. Te tau maʻu ʻa e fiefia kakato.