Tokāteline mo e Ngaahi Fuakavá

Ko e Tokāteline mo e Ngaahi Fuakavá ko ha tohi folofola ia ʻoku ʻi ai e ngaahi fakahā mei he ʻEikí ki he Palōfita ko Siosefa Sāmitá, pea ki ha kau palōfita tokosiʻi kehe ʻi he ngaahi ʻaho kimui ní. Ko ha folofola makehe ia he ʻoku ʻikai ko ha liliu ia ʻo ha ngaahi tohi fakakuonga muʻa.

Ko e Tokāteline mo e Ngaahi Fuakavá ko e taha ia ʻo e ngaahi tohi folofola ʻe fā ʻoku fakaʻaongaʻi ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní (ko e tolu kehé ko e Tohi Tapú, ko e Tohi ʻa Molomoná, pea mo e Mataʻitofe Mahuʻingá).

Kuo folofola ʻa e ʻEikí ki he Palōfita ko Siosefa Sāmitá, “ʻE maʻu ʻe he toʻu tangatá ni ʻa ʻeku leá ʻiate koe.” ʻOku tau ako ʻi he Tokāteline mo e Ngaahi Fuakavá, ʻa e ngaahi tokāteline fekauʻaki mo e natula taʻengata ʻo e ngaahi fāmilí, ko e ngaahi tuʻunga ʻo e nāunaú ʻoku tatali ki he houʻeiki tangata mo fafine hili ʻa e moʻuí ni, pea mo hono fokotuʻu ʻo e Siasi ʻo Kalaisí ʻi he māmaní he kuongá ni. ʻOku tau lau foki ʻo fekauʻaki mo e ngaahi fuakava ʻoku fakahoko ʻe he ʻOtuá mo kinautolu ʻoku loto-fiemālie ke tauhi ʻEne ngaahi fekaú.

Naʻe folofola ʻa e ʻEikí fekauʻaki mo e Tokāteline mo e Ngaahi Fuakavá ʻo pehē:

“Fakatotolo ʻi he ngaahi fekau ko ʻení, he ʻoku moʻoni mo totonu ia, pea ko e ngaahi kikite mo e ngaahi talaʻofa ʻoku ʻi aí ʻe fakamoʻoniʻi hono kotoa.

“ʻIlonga ha meʻa kuó u lea ʻaki ʻe au ko e ʻEikí, kuó u lea ʻaki ia, pea ʻoku ʻikai te u tuli tonuhia; pea neongo ʻe mole atu ʻa e ngaahi langí mo e māmaní, ka ʻe ʻikai mole atu ʻa ʻeku leá, ka ʻe fakamoʻoniʻi hono kotoa, neongo pe ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē.”

Naʻe pehē ʻe he Palōfita ko Siosefa Sāmitá ko e Tokāteline mo e Ngaahi Fuakavá “ko e makatuʻunga ia ʻo e Siasí ʻi he ngaahi ʻaho fakaʻosi ko ʻení, pea ko e meʻa ʻaonga ia ki he māmaní, ʻa ia ʻoku fakahā ai kuo toe ʻomi ki he tangatá ʻa e ngaahi kī ʻo e ngaahi meʻa lilo ʻo e puleʻanga ʻo hotau Fakamoʻuí”