“Akó,” Ngaahi Tefitó mo e Ngaahi Fehuʻí (2023)
Vakai Fakalūkufuá
Akó
ʻI heʻetau maheni mo e moʻoni ʻi he ngaahi maʻuʻanga tokoni kotoa pē ʻoku leleí, ʻoku tau mateuteu lelei ange ai ke ngāue ʻi he māmaní mo tokoni ʻi he puleʻanga ʻo e ʻOtuá. Naʻe fakahā ʻe he ʻEikí, “Ko e nāunau ʻo e ʻOtuá ko e ʻatamai potó, pe, ko hono ʻai ʻe tahá, ko e maama mo e moʻoni.” ʻOku haʻu ʻa e moʻoni kotoa pē mei he Tamai Hēvaní pea ʻoku fakataumuʻa ia ki he lelei ʻo ʻEne fānaú. ʻOku finangalo e ʻOtuá ke tau akoʻi hotau ʻatamaí, fakatupulaki ʻetau ngaahi taukeí, mo fakahaohaoaʻi hotau ngaahi ivi malavá kae lava ke tau hoko ko ha ivi tākiekina lelei ange ki he leleí ʻi he māmaní, tokonaki maʻatautolu, hotau fāmilí, mo kinautolu ʻoku faingataʻaʻiá, pea langa hake ʻa e puleʻanga ʻo e ʻOtuá.
Ko e moʻoni kotoa pē, ʻo tatau ai pē pe ʻoku fakalotu pe fakaʻatamai, ʻoku fakakau ia ʻi he palani ʻa e ʻOtuá ki hotau fakamoʻuí mo ʻetau fiefiá. Naʻe akoʻi ʻe he Palōfita ko Siosefa Sāmitá, “ʻIlonga ha tefito ʻo e potó ʻoku tau lava ʻo maʻu ʻi he moʻui ko ʻení, te tau toe tuʻu hake pē mo ia ʻi he toetuʻú. Pea kapau ʻe maʻu ʻe ha tokotaha ʻi heʻene faivelengá mo e talangofuá ha ʻilo mo e poto lahi ange [ʻi he moʻuí ni] … te ne maʻu ha tuʻunga māʻolunga lahi ange pehē ʻi he maama ka haʻú”
Kuo foaki mai ʻe he ʻEikí kiate kitautolu takitaha ha ngaahi meʻafoaki mo poupouʻi kitautolu ke tau fakalakalaka ai mo fekumi ki ha ngaahi meʻafoaki kehe. Kuó Ne fakahinohinoʻi foki kitautolu ke “fekumi ki he ʻiló, ʻio, ʻi he ako pea ʻi he tui foki” ʻOku poupouʻi ʻe he kau taki ʻo e Siasí ʻa e kāingalotú ke nau kau ʻi he ngaahi feinga ke fakatupulaki ʻa e ʻilo ki he laukongá mo e tohí, akó, mo e pōtoʻi ngāué.
Kuo poupouʻi ʻe he kau palōfita ʻa e ʻOtuá ʻi onopōní ʻa e houʻeiki tangatá mo e fefiné fakatouʻosi ke nau ako ki he lahi taha te nau ala lavá. Naʻe naʻinaʻi ʻa Palesiteni Kōtoni B. Hingikelī ki he kau talavoú ke nau “ngāueʻi [ha faingamālie] ke ako. Maʻu e ako kotoa te ke ala lavá.” Naʻe tapou ʻa Palesiteni Tōmasi S. Monisoni ki he kau finemui ʻo e Siasí ke “hoko atu hoʻomou akó—kapau ʻoku ʻikai ke mou lolotonga fakahoko ia pe teʻeki ai fakahoko ia.”