Maama ʻa Kalaisí

Ko e Maama ʻa Kalaisí ʻa e ivi fakalangi, mālohi, pe tākiekina mei he ʻOtuá ʻoku fou mai ʻia Kalaisi pea foaki ai ʻa e moʻui mo e maama ki he ngaahi meʻa kotoa pē. ʻOku tākiekina ʻe he Maama ʻa Kalaisí ʻa e kakaí ki he leleí mo teuteuʻi kinautolu ke nau maʻu ʻa e Laumālie Māʻoniʻoní. Ko hano fakafōtunga ʻe taha ʻo e Maama ʻa Kalaisí ʻa e meʻa ʻoku tau ui ko ha konisēnisí.

Ko e Maama ʻa Kalaisí “ʻoku ʻalu atu mei he ʻao ʻo e ʻOtuá, ke fakafonu ʻa hono fuʻu lahi fau ʻo e ʻataá.” Ko ia ʻa e “maama ʻa ia ʻoku ʻi he ngaahi meʻa kotoa pē, ʻa ia ʻoku foaki ʻa e moʻui ki he ngaahi meʻa kotoa pē, ʻa ia ko e fono ʻoku puleʻi ʻaki ʻa e ngaahi meʻa kotoa pē.” ʻOku hoko ʻa e mālohí ni ko ha ivi tākiekina ki he leleí ʻi he moʻui ʻa e kakai kotoa pē. ʻI he folofolá, ʻoku faʻa ui ʻa e Maama ʻa Kalaisí ʻi he taimi ʻe niʻihi ko e Laumālie ʻo e ʻEikí, Laumālie ʻo e ʻOtuá, Laumālie ʻo Kalaisí, pe ko e Maama ʻo e Moʻuí.

ʻOku ʻikai totonu ke fetoʻoaki ʻa e Maama ʻa Kalaisí mo e Laumālie Māʻoniʻoní. ʻOku ʻikai ko ha taha ʻeni ia ʻo hangē ko e Laumālie Māʻoniʻoní. ʻOku hanga ʻe hono ivi tākiekiná ʻo tataki ʻa e kakaí ke nau ʻilo ʻa e ongoongolelei moʻoní, papitaiso, mo maʻu ʻa e meʻafoaki ʻo e Laumālie Māʻoniʻoní.

Ko e konisēnisí ko hano fakafōtunga mai ia ʻo e Maama ʻa Kalaisí, ʻokú ne ʻai ke tau malava ʻo ʻilo ʻa e leleí mei he koví. Naʻe akoʻi ʻe he palōfita ko Molomoná: “ʻOku foaki ʻa e Laumālie ʻo Kalaisí ki he tangata kotoa pē, koeʻuhi ke ne ʻiloʻi ʻa e leleí mei he koví; ko ia, ʻoku ou fakahā kiate kimoutolu ʻa e founga ke fakamāú; he ko e meʻa kotoa pē ʻoku fakaafeʻi ke faileleí, pea ʻoku fakalotoʻi ke tui kia Kalaisí, ʻoku ʻomai ia ʻi he mālohi mo e foaki ʻa Kalaisí; ko ia te mou faʻa ʻiloʻi ai ʻi ha ʻilo haohaoa ʻoku tupu ia mei he ʻOtuá. … Pea ko ʻeni, ʻe hoku kāinga, ko e meʻa ʻi hoʻomou ʻiloʻi ʻa e maama ʻa ia te mou faʻa fakamāuʻi ʻakí, pea ko e maama ko iá ʻa e maama ʻa Kalaisí, tokanga ke ʻoua naʻa mou fakamaau taʻetotonu; he ko e anga ko ia ʻoku mou fakamaau ʻakí ʻe fakamāuʻi ai foki mo kimoutolu.”