Vaʻinga Kumi Monūʻiá

ʻOku ʻikai poupouʻi ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e vaʻinga kumi monūʻiá, ʻo kau ai ʻa e ngaahi lulu monūʻia ʻoku fakapaʻanga ʻe he puleʻangá. Kuo poupouʻi ʻe he kau taki ʻo e Siasí ʻa e kāingalotu ʻo e Siasí ke nau kau fakataha mo e niʻihi kehé ʻi he fakafepakiʻi hono fakalao mo fakapaʻanga ʻe he puleʻangá ha faʻahinga founga pē ʻo e vaʻinga kumi monūʻiá.

Ko e vaʻinga kumi monūʻiá ʻoku fakaʻaiʻai ia ʻe ha holi ke maʻu ha meʻa taʻe ngāueʻi. ʻOku fakatupu ʻauha fakalaumālie ʻa e holi ko ʻení. ʻOkú ne tataki ʻa kinautolu ʻoku kau ki aí ke mamaʻo mei he ngaahi akonaki ʻo e ʻofa mo e ngāue tokoni ʻa e Fakamoʻuí kae fakatau atu ki he siokita ʻa e filí. ʻOkú ne holoki ʻa e ngaahi ʻulungaanga lelei ʻo e ngāué mo e fakapotopotó pea mo e holi ke ngāue faitotonu ʻi he meʻa kotoa pē ʻoku tau faí.

Ko kinautolu ʻoku kau ʻi he vaʻinga kumi monūʻiá, ʻoku vave pē ʻenau ʻiloʻi ʻa e kākaá ʻi he fakakaukau ko ia te nau lava ʻo foaki siʻisiʻi pe ʻikai foaki ha meʻa kae maʻu mai ha meʻa ʻoku mahuʻinga. ʻOku nau ʻiloʻi ai ʻoku nau tukuange ha paʻanga lahi, honau lāngilangi pē ʻonautolú, pea mo e fakaʻapaʻapa ʻa e kau mēmipa ʻo e fāmilí mo e ngaahi kaungāmeʻá. ʻI hono kākaaʻi mo maʻunimā kinautolú, ʻoku nau faʻa fakavalevale ʻaki ha paʻanga ʻoku totonu ke nau fakaʻaongaʻi ki ha ngaahi taumuʻa kehe, hangē ko hono feau e ngaahi fiemaʻu tefito honau fāmilí. ʻOku faʻa hoko ʻo fakapōpula moʻoni pea fiemaʻu vivili ʻa e kau vaʻinga kumi monūʻiá he feinga ke totongi honau ngaahi moʻua ʻi he kumi monūʻiá ʻo nau iku ai ki he kaihaʻá, mo e mole honau ngeiá.