Vahehongofulú

Fakakaukau ke lau ʻa e Sēnesi 14:18–20; 28:20–22 pea fakalaulauloto ki he ʻuhinga kuo kole ai ki he kakai ʻa e ʻOtuá ke nau moʻui ʻaki e fono ʻo e vahehongofulú talu mei he kuonga muʻá. Lau leva ʻa e talanoa fakataautaha mei he pōpoaki ʻa Palesiteni Lāsolo M. Nalesoni ko e “Fakakaukau Fakasilesitiale!” ʻo fekauʻaki mo ha taimi naʻá ne fili ai ke fakamuʻomuʻa ʻa e ʻEikí ʻaki hono totongi ha vahehongofulu kakato neongo naʻe ʻikai lahi ʻene paʻanga naʻe maʻú. Naʻá ne akonaki, “Ko e totongi vahehongofulú ʻoku fiemaʻu ʻa e tuí, pea ʻokú ne tanumaki foki ʻa e tui ki he ʻOtuá mo Hono ʻAlo ʻOfaʻangá.” ʻOku founga fēfē hono fiemaʻu ke ke maʻu ʻa e tui ki he Tamai Hēvaní mo Sīsū Kalaisí ʻi hono moʻui ʻaki e fono ʻo e vahehongofulú? ‘Oku fakatupulaki fēfē ai hoʻo tui kiate Kinauá?

Lau ʻa e Levitiko 27:30–32 mo e 2 Fakamatala Meʻa Hokohoko 31:5–6 ke ako fekauʻaki mo e founga hono tauhi e fono ʻo e vahehongofulú ʻi he kuonga muʻá. ʻOkú ke pehē ko e hā e ʻuhinga ʻoku māʻoniʻoni ai ʻa e vahehongofulú ki he ʻEikí? Lau ʻa e Tokāteline mo e Ngaahi Fuakava 97:10–12 ke ʻiloʻi e founga naʻe tokoni ai e vahehongofulú ki he fuofua Kāingalotú ke nau fakahoko e ngāue ʻa e ʻEikí. Naʻe tāpuekina fēfē kinautolu ʻi heʻenau tauhi ʻa e fono ko ʻení? Talanoa fekauʻaki mo e founga ʻe lava ke tokoni ai ʻa e totongi vahehongofulú ke fakamālohia ʻetau holi ke langa hake ʻa e puleʻanga ʻo e ʻOtuá.

Aleaʻi ʻa e founga ʻoku fakatou hoko ai ʻa e vahehongofulú ko ha fono fakatuʻasino mo ha fono fakalaumālié. Lau fakataha leva ʻa e Maʻake 12:41–44 pea talanoa fekauʻaki mo e founga ʻoku hoko ai e totongi vahehongofulú ko ha ngāue ʻo e tuí. Te mou lava foki ʻo mamata fakataha ʻi he vitiō “The Widow’s Mite” (1:57) pe “Jesus Teaches about the Widow’s Mites” (1:14). ʻOku ʻuhinga ki he hā ke foaki fakalaumālie hoʻomou meʻa kotoa pē ʻi hoʻomou foaki ʻa e vahehongofulu ki he ʻEikí? ʻE fakamālohia fēfē nai hoʻo tuí mo liliu fakalaumālie koe ʻi hoʻo foaki hoʻo meʻa kotoa pē kiate Iá?

Hepelū 7:1–2, 9; ʻAlamā 13:13–15

Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 34.3.1, Gospel Library

Ngaahi Tefito ʻi he Hisitōlia ʻo e Siasí, “Vahehongofulú,” Gospel Library

Steven C. Harper, “Ko Hono Fakavahehongofuluʻi ʻo Hoku Kakaí,” ʻi he Puipuituʻa ʻo e Ngaahi Fakahaá (2016), 250–55

ʻI he Malakai 3:8–12, ʻoku talaʻofa mai ai ha ngaahi tāpuaki lahi kiate kitautolu ʻi he talangofua ki he fono ʻo e vahehongofulú. ʻE founga fēfē hoʻo ʻilo lahi ange ki he ngaahi tāpuakí ni ʻi hoʻo moʻuí he ʻahó ni? Toe vakaiʻi e pōpoaki ʻa ʻEletā Tēvita A. Petinā “Ko e Ngaahi Matapā ʻo e Langí,” pea fakakaukau leva ki ha niʻihi ʻo e ngaahi founga faingofua kuo tāpuekina pe ʻe lava ʻo tāpuekina ai koe ʻi he totongi vahehongofulú. Mahalo te ke lava ʻo hiki ha lisi ʻo e ngaahi tāpuaki kuo foaki atu ʻe he ʻEikí pea fakalaulauloto pe ko e fē ʻa e ngaahi tāpuaki ʻe lava ke hoko ko ha ola ʻo e talangofua ki he fono ʻo e vahehongofulú. ʻOku fakaloloto fēfē hoʻo holi ke totongi vahehongofulu kakató pea haʻu kia Kalaisí ʻi he ʻilo ko ia ʻoku tāpuekina koe ʻi hono moʻui ʻaki e fono ʻo e vahehongofulú?

ʻI he taimi ʻoku tau fakaʻaongaʻi ai ʻa e tuí pea totongi vahehongofulú, te tau lava ʻo ʻamanaki ki ha ngaahi tāpuaki mei he ʻEikí. ʻI he lea ʻa Palesiteni Sefilī R. Hōlani ko e “Like a Watered Garden,” naʻá ne fakamatala ai ki he founga ne hokohoko atu ai e totongi vahehongofulu ʻa Mele Filitingi Sāmitá hili hono tāmateʻi hono husepāniti ko Hailame Sāmitá. Fakakaukau ke lau ʻa e talanoa ko ʻení ʻi he pōpoaki ʻa Palesiteni Hōlaní. Ko e hā e meʻa ʻokú ke ako mei he sīpinga ʻa Melé? Ko e hā ha ngaahi tāpuaki te ke lava ʻo maʻu ʻi hoʻo kamata pe hokohoko atu ke moʻui ʻaki e fono ʻo e vahehongofulú?

Kuo talaʻofa mai ʻe he ʻEikí ʻi heʻetau moʻui ʻaki e fono ʻo e vahehongofulú, te Ne “fakaava ʻa e ngaahi matapā ʻo e langí” pea “lilingi hifo … ha tāpuaki” kiate kitautolu (Malakai 3:10). ʻOku ʻuhinga ki he hā ʻe fakaava mai ʻa e ngaahi matapā ʻo e langí ʻi heʻetau talangofua ki he fono ko ʻení? Lau fakataha ʻa e ngaahi lea ko ʻeni meia ʻEletā Petinaá: “ʻOku fakaʻatā ʻe he matapaá ʻa e maama fakanatulá ke hū ki ha fale. ʻI he founga tatau pē, ʻoku huaʻi mai ʻa e maama mo e fakakaukau fakalaumālie ʻi he matapā ʻo e langí pea ki heʻetau moʻuí ʻi heʻetau tauhi e fono ʻo e vahehongofulú.” Mahalo te ke lava ʻo tāpuniʻi taimi nounou ʻa e maama ʻoku hū mai ki ha loki mei ha matapā luva pe ko ha hūʻanga ʻe taha kimuʻa pea toki fakaʻatā ʻa e māmá ke toe ulo mai. Aleaʻi ʻa e faikehekehe ʻoku fakahoko ʻe he māmá mo e founga ʻe lava ai ʻe he totongi vahehongofulú ʻo ʻomi kiate koe ʻa e māmá pe maama fakalaumālié. Te mou lava foki ʻo fevahevaheʻaki ʻa e founga kuo mou aʻusia ai ha maama fakalaumālie ʻi hoʻomou moʻuí ʻi hoʻomou talangofua ki he fono ʻo e vahehongofulú.

Robert D. Hales, “Tithing: A Test of Faith with Eternal Blessings,” Liahona, Nov. 2002, 26–29

Sheldon F. Child, “Ko e Founga Fakatupu Koloa Lelei Tahá,” Liahona, Mē 2008, 79–81

Yoshihiko Kikuchi, “Will a Man Rob God?,” Liahona, May 2007, 97–98

Valeri V. Cordón, “Ko e Lea Fakafonua ʻo e Ongoongoleleí,” Liahona, Mē 2017, 55–57

Ko e kau tamaioʻeiki ʻa e ʻEikí kuo filí ko e kau tauhi kinautolu ki he ngaahi foaki vahehongofulú. Naʻe fakamatala ʻa Pīsope Selati Kausei ʻo pehē, “ʻI he ngaahi lea ʻo e ongoongoleleí, ko e foʻi lea fatongia tauhí ʻoku fakataumuʻa [ia] ki ha fatongia toputapu fakalaumālie pe fakatuʻasino ke tauhi ha meʻa ʻa e ʻOtuá, ʻa ia ʻoku tau fatongia ʻakí.” ʻOku hoko fēfē ʻa e fatongia tauhi ʻo e vahehongofulú ko ha fatongia fakalaumālie mo fakatuʻasino fakatouʻosi ki he kau tamaioʻeiki ʻa e ʻEikí? Lau ʻa e Tokāteline mo e Ngaahi Fuakava 104:11–17. Ko e hā ha meʻa ʻokú ke ako mei he ngaahi veesi ko ʻení fekauʻaki mo e finangalo ʻa e ʻEikí ke “tauhi ʻa [ʻEne] kau māʻoniʻoní” ʻo fakafou ʻi he fatongia tauhí?

Ko e ngaahi tāpuaki lahi ʻoku tau fiefia ai ʻi he Siasí ʻoku tuʻunga ia ʻi he ngaahi foaki vahehongofulu ʻoku fakaʻaongaʻi ke langa ʻaki e puleʻanga ʻo e ʻOtuá ʻi he funga ʻo e māmaní. Naʻe akoʻi ʻe Palesiteni Sefilī R. Hōlani ko ʻetau “ngaahi temipalé, falelotú, seminelí, mo e ngaahi fakatahaʻangá” ʻoku malava kotoa ia koeʻuhí ko e vahehongofulu ʻoku foaki ʻe he kāingalotú pea “ʻoku ʻikai mo ha toe founga kehe ʻe lava ʻo maʻu ai e ngaahi tāpuakí ni.” Mou fetalanoaʻaki fekauʻaki mo e ngaahi tāpuaki ʻoku lava ke maʻu koeʻuhí ko e vahehongofulú. ʻE tokoniʻi fēfē kitautolu ʻe he ngaahi tāpuaki ko ʻení ke tau maʻu ha fakakaukau ʻoku taʻengatá mo ʻomi kitautolu ke tau ofi ange ki he ʻOtuá? Te nau lava fēfē ʻo fakaloloto ange ʻetau tukupā ke totongi vahehongofulu kakato mo faitotonú?

“Tithing and Charitable Donations,” newsroom.ChurchofJesusChrist.org

“How the Church of Jesus Christ Uses Tithes and Donations,” Dec. 20, 2019, newsroom.ChurchofJesusChrist.org