Fatongia Tauhi ʻo e ʻĀtakaí mo hono Fakatolongá

ʻOku fakahaaʻi ʻe he ngaahi fakamatala ʻo e Fakatupú ʻoku tokanga ʻa e ʻOtuá ki he meʻa kotoa kuó Ne ngaohí—ʻa ʻEne fānaú, ko e māmaní, mo e meʻa moʻui kotoa pē ʻi aí. Naʻe ʻuluaki fakatupu fakalaumālie ʻa e māmaní mo e meʻa moʻui kotoa pē ʻi aí, pea ʻoku hanga ʻe he ngaahi faʻahinga kehekehe ʻo e moʻuí naʻe fakatupu ʻe he ʻOtuá, ʻo ʻomi ʻa e fakaʻofoʻofa mo e faikehekehe ʻo e māmaní.

Ko e māmaní mo hono ngaahi fakatupú ʻoku taʻengata. ʻE iku pē ʻo fakamāʻoniʻoniʻi ʻa e māmaní pea maʻu hono nāunau fakasilesitialé. ʻE hoko ia ko e ʻapi ʻo e kau māʻoniʻoní, ʻa ia te nau fiefia ʻi he ʻao ʻo e ʻOtuá.

Ko e māmaní ʻa e feituʻu ʻoku foua ai ʻe he fānau ʻa e ʻOtuá ʻa e moʻui fakamatelié, fakaʻaongaʻi e tauʻatāina ke filí, ako mei heʻenau ngaahi aʻusiá, fakalakalaka, pea tupulaki. Kae mahuʻinga tahá, ko e māmaní ʻa e feituʻu naʻe maʻu ai ʻe he Fakamoʻuí ha sino fakamatelie pea fakakakato e meʻaʻofa taʻe-hano-tatau ʻo ʻEne Fakaleleí ʻaki ʻEne mamahi maʻa ʻetau angahalá, pekia ʻi he kolosí, pea fakahoko ai ʻa e Toetuʻú.

ʻOku toe akoʻi foki kitautolu ʻe he māmaní. Hangē ko ʻení, te tau lava ʻo ako ʻa e ngaahi fono, ngaahi tefitoʻi moʻoni, mo e ngaahi sīpinga ʻoku ngāue aí. ʻOku tau ako ʻa e fakaʻapaʻapá mo e loto-fakatōkilaló ʻi he taimi ʻoku tau siofi ai ʻa natula mo hono ngaahi mālohí. ʻOku fakaʻatā kitautolu ʻe he māmaní ke tau mamata ki he ngaahi ngāue ʻa e ʻOtuá ʻoku fakamoʻoni kiate Iá.

Kuo ʻai ʻe he ʻOtuá ke tau haʻisia ki hono tokangaʻi mo fakatolonga ʻo e māmaní pea mo hono fakaʻaongaʻi fakapotopoto ʻo hono ʻū naunaú. ʻI heʻetau hoko ko e kau tauhí, kuo pau ke tau faivelenga ʻi hono fakaʻaongaʻi fakapotopoto ʻa e ʻū naunau ʻo e māmaní, ʻo fakaʻaongaʻi pē ʻa e meʻa ʻoku tau fiemaʻú pea tokanga ki he ngaahi nunuʻa ʻo ʻetau angafaí ki he ʻātakaí mo e niʻihi kehé.

ʻOku tau fāifeinga ke ngaohi hotau ngaahi ʻapí, kaungāʻapí, mo e koló ke fakaʻofoʻofa, pea ʻoku tau ʻiloʻi ʻi heʻetau fai iá ʻe fiemaʻu ai ha fakakaukau lelei ʻo makatuʻunga ʻi he ngaahi tūkunga fakalotofonuá. ʻOku tau fakatolonga e ʻū naunaú mo maluʻi ʻa e ngaahi tāpuaki fakalaumālie mo fakatuʻasino ʻo natulá maʻá e ngaahi toʻu tangata ʻo e kahaʻú.

ʻOku lahi ha ʻū naunau fakanatula ʻi he māmaní ʻa ia te ne tokonaki maʻá e fāmili ʻo e tangatá ʻo ka fakaʻaongaʻi ia ʻo fakatatau mo e fakahinohino ʻa e ʻEikí—ke tokangaʻi ʻaki e masivá mo e faingataʻaʻiá pea ʻoua naʻa fakaʻaongaʻi ʻo tōtuʻa he meʻa ʻoku fiemaʻú, ke fakaʻehiʻehi mei he maumau noá, pea ʻoua naʻa ʻave fakamālohi ha ʻū naunau mei ha taha. Ko e mahu ʻo e māmaní ke fakaʻaongaʻi ia ʻi he fakapotopoto pea fakangatangata.

Neongo ʻe fakahaohaoaʻi ʻa e māmaní ʻi he hili e Hāʻele ʻAnga Ua Mai ʻa e ʻEikí, ka ʻe kei fiemaʻu pē ke tau tokangaʻi ia he taimí ni. Kuo foaki mai ʻe he ʻOtuá ʻa e māmaní mo e ngaahi meʻa lelei ʻoku maʻu mei aí ko ha ngaahi tāpuaki kiate kitautolu. ʻOku nau tokonaki maʻa ʻetau ngaahi fiemaʻu fakatuʻasinó pea ʻoku nau toe ʻomi foki ʻa e fiefiá. ʻOku fakatupu houhau ki he ʻOtuá ʻa e taʻetokanga pe ngāue hala ʻaki ʻEne ngaahi fakatupú.

Ke ako fekauʻaki mo e ngaahi polokalama ʻa e Siasí ʻoku lolotonga fai ki hono fakatolonga ʻo e ʻātakaí ʻi heʻene ngaahi ngāué, tokoni ʻofa fakaetangatá, mo e ngaahi ʻunivēsití, vakai ki he fakamatala ʻi he Ongoongo ʻa e Siasí “Caring for the Earth—News.”

Ki ha ngaahi fakakaukau ki he founga ke tokangaekina fakataautaha ai ʻa e māmaní pea ʻi homou tukui koló, vakai ki he “How Can We Better Care for the Earth?””

• Fakatupú

• Moʻui Fakamatelié

• Palani ʻo e Fakamoʻuí

• Fatongia Tauhí

• Ngaahi Folofolá

• Ngaahi pōpoaki mei he kau taki ʻo e Siasí

• Ngaahi Vitiō