Fakatupú

ʻI he malumalu ʻo e fakahinohino ʻa e Tamai Hēvaní, naʻe fakatupu ʻe Sīsū Kalaisi ʻa e ngaahi langí mo e māmaní. ʻOku tau ʻilo mei he folofola naʻe fakahā mai ʻi he Palōfita ko Siosefa Sāmitá, naʻe fokotuʻutuʻu ʻe he ʻEikí ʻi he ngāue ʻo e Fakatupú, ha ngaahi meʻa naʻe ʻosi ʻi ai. Naʻe ʻikai ke Ne fakatupu ʻa e māmaní “taʻe ʻi ai ha meʻa,” ʻo hangē ko ia ʻoku tui ki ai ha kakai ʻe niʻihi.

ʻOku toe akoʻi mai foki ʻe he folofolá ko ʻĀtama ʻa e “ʻuluaki tangata ʻi he kakai kotoa peé.” Naʻe fakatupu ʻe he ʻOtuá ʻa ʻĀtama mo ʻIvi ʻi Hono ʻīmisí pea ʻi he ʻīmisi ʻo Hono ʻAlo pē Taha naʻe Fakatupú.

Ko e Fakatupú ko ha konga mahuʻinga ia ʻo e palani ʻa e Tamai Hēvaní ki he fakamoʻuí. ʻOkú ne ʻomi kiate kitautolu takitaha ʻa e faingamālie ke haʻu ai ki he māmaní, ʻa ia te tau maʻu ai ha sino pea fakaʻaongaʻi ʻetau tauʻatāina ke filí. ʻI he Fakataha Alēlea ʻa e Ngaahi ʻOtuá ʻi he maama fakalaumālié, naʻe fakahoko ai ʻa e fanongonongo ko ʻení: “Te tau ʻalu hifo, he ʻoku ʻi hena ha vahaʻa ʻataʻatā, pea te tau toʻo mei he ngaahi meʻá ni, pea te tau ngaohi ha māmani ʻa ia ʻe lava ke nofo ai ʻa kinautolú ni; pea te tau siviʻi ʻa kinautolu ʻi he meʻá ni, ke vakai pe te nau fai ʻa e ngaahi meʻa kotoa pē ʻe fekau ʻe he ʻEiki ko honau ʻOtuá kiate kinautolú.”