Sīsū Kalaisi

ʻOku ʻikai ha meʻa ʻe toe mahuʻinga ange ke tau ako ki ai ka ko Sīsū Kalaisi—ko hai Ia, meʻa kuó Ne fai maʻatautolú, mo e meʻa ʻokú Ne finangalo ke tau ʻilo mo fakahokó. ʻOku tokoniʻi kitautolu ʻe he folofolá mo e ngaahi akonaki ʻa e kau palōfita mo e kau ʻaposetolo ʻo onopōní ke tau ʻiloʻi Hono fatongia mahuʻinga ko hotau Fakamoʻui mo e Huhuʻí.

ʻOku tau ako ʻi he folofolá naʻe fili ʻa Sīsū Kalaisi ʻi he maama fakalaumālié ke hoko ko e Fakamoʻui ki he fānau kotoa ʻa e Tamai Hēvaní (vakai, 1 Pita 1:19–20; ʻĒpalahame 3:27). Talu mei he kamataʻangá mo e hoko ʻa Sīsū Kalaisi ko e tokotaha mahuʻinga taha ʻi hono fakahoko e palani ʻa e ʻOtuá ki he fakamoʻui mo e hakeakiʻi ʻo ʻEne fānaú. Naʻe fakatupu ʻe Sīsū Kalaisi ʻa e ngaahi langí mo e māmaní ʻi he malumalu ʻo e fakahinohino ʻa e Tamaí (vakai, Mōsese 1:32–33). Lolotonga ʻa e kuonga ʻo e Fuakava Motuʻá, naʻe ʻiloa ʻa Sīsū Kalaisi ko e Sihova maʻongoʻongá. Naʻá Ne tataki mo fakahinohinoʻi ʻa e kau palōfita mo e kakai tui ʻo e kuonga muʻá. Naʻe fakamālohia kinautolu ʻe Heʻene ʻofá mo e ʻaloʻofá lolotonga ʻenau ngaahi faingataʻaʻiá.

ʻI he taʻu ʻe 2,000 tupu kuohilí, naʻe hāʻele mai ai ʻa Sīsū Kalaisi ki he māmaní ʻi ha ʻaloʻi fakaofo. Naʻá Ne moʻui mo ngāue ʻi he kakai ʻi he fonua ʻo ʻIsilelí. Naʻá Ne fakahoko ha ngaahi mana lahi, hangē ko hono fakamoʻui ʻo e mahakí mo e fokotuʻu ʻa e maté (vakai, Mātiu 11:4–5). Naʻá Ne fokotuʻu Hono Siasí mo akoʻi ʻa e tokāteline ʻo e fakatomalá, fakamolemoleʻi ʻo e ngaahi angahalá, mo e moʻui taʻengatá kiate kinautolu kotoa pē ʻe muimui kiate Iá. Naʻe haohaoa e moʻui ʻa Sīsū Kalaisí, ʻo ʻaʻeva maʻu pē ʻi he talangofua ki Heʻene Tamaí (vakai, 2 Nīfai 31:7).

Koeʻuhí naʻe hāʻele mai ʻa Sīsū Kalaisi ki he māmaní ke fakahaofi e fānau ʻa e Tamaí, naʻá Ne finangalo lelei ai ke toʻo kiate Ia ʻa e tautea ki heʻenau ngaahi angahalá. ʻI ha ngaahi senituli kimuʻa, naʻe kikite ʻe ʻĪsaia: “Ko e moʻoni kuó Ne toʻo kiate Ia ʻa ʻetau ngaahi vaivaí, ʻo Ne fua ʻetau ngaahi mamahí. … Naʻe lavea Ia koeʻuhi ko ʻetau ngaahi angahalá, naʻe fakavolu Ia koeʻuhi ko ʻetau ngaahi hiá” (ʻĪsaia 53:4–5). Naʻe aʻusia ʻe Sīsū ha mamahi lahi ʻaupito, ʻo tupu ai e tafe e taʻataʻá mei he ava kotoa ʻo Hono kilí (vakai, Luke 22:44; Tokāteline mo e Ngaahi Fuakava 19:15–20). Naʻe puke pōpula pea tukuakiʻi Ia ki ha ngaahi tukuakiʻi loi pea tauteaʻi Ia ke pekia. Naʻe tutuki fakamamahi Ia ki ha kolosi ʻa ia naʻá Ne mamahi ai mo foaki ʻEne moʻuí maʻatautolu (vakai, Mātiu 27:50). Ka naʻe ʻikai ko e ngataʻangá ʻa ʻEne pekiá. Naʻe toe tuʻu hake ʻa Sīsū Kalaisi mei he fonualotó pea ngāue fakaetauhi ki Hono kau muimuí, ʻi ha sino kuo toetuʻu (vakai, Luke 24:36–40; 3 Nīfai 11:8–15).

ʻI he ʻaho ní, ʻoku hanganaki fiefia atu ʻa e kāingalotu ʻo e Siasi ʻo Sīsū Kalaisí ki Heʻene liuaki mai ki he māmaní ʻa ia ne ʻosi talaʻofá. ʻOku ʻikai ʻilo ha taha ki he taimi ʻe hoko ai ʻení (vakai, Tokāteline mo e Ngaahi Fuakava 49:7), ka ʻoku fakamatala ʻa e folofolá ki ha ngaahi fakaʻilonga mo e ngaahi meʻa ʻe hoko kimuʻa ʻi Heʻene Hāʻele ʻAnga Ua Maí. ʻE liliu ʻa e māmaní ʻi he taimi ʻe liuaki mai ai ʻa e ʻEikí, pea te Ne fakahā ʻa e ngaahi meʻa kotoa pē kiate kinautolu ʻoku māʻoniʻoní (vakai, Tokāteline mo e Ngaahi Fuakava 101:23–34).

Kuo teuteuʻi ʻe he Tamai Hēvaní ha ngaahi tāpuaki fungani maʻanautolu ʻoku nau tali Hono ʻAlo ko Sīsū Kalaisí (vakai, Tokāteline mo e Ngaahi Fuakava 84:37–38). Naʻe folofola ʻa Sīsū Kalaisi: “Kapau te mou haʻu kiate au te mou maʻu ʻa e moʻui taʻengatá. Vakai, ʻoku mafao atu hoku nima ʻo e ʻaloʻofá kiate kimoutolu, pea ko ia ia ʻe haʻú, te u maʻu ia” (3 Nīfai 9:14). ʻOku tau fakahā ʻetau tali e fakaafe ʻa e ʻEikí ke haʻu kiate Iá ʻi he taimi ʻoku tau tui ai kiate Ia, fakatomala mei heʻetau ngaahi angahalá, papitaiso, tauhi e ngaahi fekau ʻa e ʻOtuá, mo maʻu ʻa e ngaahi ouau toputapu ʻo e temipalé.

ʻI he taimi ʻoku tau loto-fakatōkilalo ai ʻo hanga kia Sīsū Kalaisi ʻi he tui mo e fakatomalá, te tau lava ʻo maʻu ha fakamolemole ʻo ʻetau ngaahi angahalá (vakai, Mōsaia 4:2–3). ʻOku makatuʻunga foki ʻi he Fakalelei ʻa Sīsū Kalaisí ʻa ʻetau malava ʻo “maʻu ʻa e mālohi fakaʻotuá—ʻa e mālohi feʻunga ke mafeia e ngaahi kavenga mafasiá, meʻa fakatutá, mo e ngaahi ʻahiʻahi ʻo hotau kuongá.” ʻE lava ke ʻomi ʻe he ʻofa, ʻaloʻofa, mo e fakamolemole ʻoku tau maʻu meia Sīsū Kalaisí ha liliu tuʻuloa ʻi heʻetau moʻuí mo ʻomi kiate kitautolu ʻa e mālohi ke tau laka ki muʻa ʻi hono fakahoko e finangalo ʻa e ʻOtuá (vakai, Mōsaia 5:2; Hilamani 15:7–8).