Fakatomalá

Ko e fakatomalá ko e meʻaʻofa ia ʻa e ʻOtuá maʻatautolu. ʻI Heʻene fekauʻi mai kitautolu ki he māmaní, naʻá Ne ʻafioʻi he ʻikai ha taha ʻiate kitautolu ʻe haohaoa. Ko e konga ia ʻo ʻEne palani ʻo e fakamoʻuí, ʻa ʻEne foaki mai Hono ʻAlo ko Sīsū Kalaisí, ke mamahi koeʻuhí ko ʻetau ngaahi angahalá. Koeʻuhí ko e Fakalelei ʻa Kalaisí, ʻe lava ke tau fakatomala pea fakamolemoleʻi kitautolu ʻi he taimi ʻoku tau maumau-fono aí, pe maumauʻi e ngaahi fekau ʻa e ʻOtuá. ʻE lava leva ke hoko ʻetau ngaahi angahalá ʻo “hinehina ʻo hangē ko e ʻuha hinaekiakí,” ʻa ia ko hono ʻuhingá ʻoku tau maʻa mo taau ke toe nofo mo e ʻOtuá hili ʻa e moʻuí ni.

ʻI heʻetau tui kia Sīsū Kalaisi mo fakatomala fakamātoató, te tau lava ʻo aʻusia ha liliu ʻo e lotó mo e ʻatamaí. ʻE lava ke fie maʻu ki ai ha ngāue mo ha kātaki kae toki aʻusia moʻoni ʻa e liliu ko ʻení, ka ʻoku malava ia ʻi he Fakalelei ʻa e Fakamoʻuí.

ʻOku ʻikai ngata pē ʻa e fakatomalá ʻi heʻetau fiemaʻu ha fakamolemole mei he ngaahi angahala mamafá. Te tau lava ʻo fakatomala fakaʻaho ʻo aʻu ki he fanga kiʻi fehalaaki īkí ke tokoniʻi kitautolu ke hokohoko atu ʻetau ofi ange ki he ʻOtuá. Naʻe akoʻi ʻe Palesiteni Lāsolo M. Nalesoni ʻo pehē: “Ko e fakatomalá ʻoku ʻikai ko ha meʻa pē ʻoku hoko; ko ha ngāue. Ko e kī ia ki he fiefia mo e nonga ʻo e ʻatamaí. Ko e taimi ʻoku fakatahaʻi ai mo e tuí, [ʻoku] malava leva ʻe he fakatomalá ʻo ʻai ke tau maʻu ʻa e mālohi ʻo e Fakalelei ʻa Sīsū Kalaisí. … Ko e taimi ʻoku tau fili ai ke fakatomalá, ʻoku tau fili ke liliu! ʻOku tau fakaʻatā ke liliu kitautolu ʻe he Fakamoʻuí ki hotau tuʻunga lelei tahá.”

ʻOku kau ʻi he fakatomalá ʻa e ngaahi ʻelemēniti ko ʻení:

• Tui ki heʻetau Tamai Hēvaní mo Sīsū Kalaisi. Ke maʻu ha fakamolemole mei heʻetau ngaahi angahalá, kuo pau ke tau tomuʻa ngāueʻi ʻetau tui ki he Tamai Hēvaní mo Sīsū Kalaisí. ʻI heʻetau tafoki ki hotau Fakamoʻuí pea falala ki Hono mālohí ke fakamaʻa kitautolu mei he angahalá, te tau lava ʻo "ngāue ʻaki [ʻetau] tuí ke fakatomala."

• Mamahi ʻi he angahalá. Kimuʻa pea tau lava ʻo fakatomalá, ʻoku fie maʻu ke tau ʻiloʻi kuo tau faiangahala. ʻOku tau ongoʻi leva ha "mamahi ʻoku taau mo e ʻOtua," ʻa ia ʻoku hoko mai ʻi he taimi ʻoku tau ongoʻi taʻefiemālie moʻoni ai ʻi he talangataʻa ki he Tamai Hēvaní mo Sīsū Kalaisí. ʻI he taimi ʻoku tau ongoʻi ai ʻa e mamahi ʻoku taau mo e ʻOtuá, te tau maʻu foki ha holi moʻoni ke fai ʻa e meʻa kotoa pē ʻoku fie maʻu ke tau fai ke maʻu ai ʻa e fakamolemolé.

• Vete ʻo e Angahalá. ʻOku fiemaʻu foki ke tau vete ʻetau ngaahi angahalá kae fakamolemoleʻi kitautolu. ʻOku ʻuhinga ʻeni ke lotu ʻi he loto-fakatōkilalo ki he Tamai Hēvaní, fakahā ʻetau ngaahi fehalākí, pea kolea ʻEne tokoní mo e fakamolemolé. ʻI he ngaahi angahala mamafá, mahalo ʻe fie maʻu foki ke tau talanoa mo ʻetau pīsopé pe palesiteni fakakoló pea fekumi ki heʻene fakahinohinó ʻi he founga ʻo e fakatomalá.

• Siʻaki e angahalá. Ne ʻosi folofola ʻa e ʻEikí, “Te mou ʻilo ʻi he meʻá ni ʻo kapau ʻoku fakatomala ha tangata mei heʻene ngaahi angahalá—vakai, te ne vete ia pea liʻaki ia.” ʻI heʻetau fakatomala mo fakatupulaki ʻetau tui kia Sīsū Kalaisí, ʻe lava ke tataki kitautolu ʻe heʻetau falala kiate Iá ke liliu ʻetau tōʻongá. ʻE lava ke tokoni hono maʻu Hono mālohí ʻi heʻetau moʻuí ke tau fakaʻehiʻehi mei hono toutou fai ʻo e ngaahi angahalá pea fakaʻehiʻehi mei he ngaahi tūkunga ʻe ala ʻahiʻahiʻi ai kitautolu ke tau faiangahalá.

• Totongi huhuʻí. ʻI he taimi ʻoku tau fakatomala aí, ʻoku totonu ke tau fakaleleiʻi ha faʻahinga lavea pe maumau naʻe fakatupu ʻe heʻetau ngaahi tōʻongá.

• Moʻui māʻoniʻoni. ʻOku kau ʻi he fakatomalá ʻa hono fai hotau lelei tahá ke muimui ki he Tamai Hēvaní mo Sīsū Kalaisi ʻaki hono fai ha ngaahi meʻa hangē ko hono ako ʻo e folofolá, lotu fakaʻaho, maʻulotu, mo ʻaukai ki ha tokoni mo ha mālohi lahi ange. ʻI he taimi ʻe lava aí, ʻe lava foki ke tokoni hono maʻu ʻo e sākalamēnití mo e moihū ʻi he temipalé ke tau maʻu ʻa e mālohi ʻo Sīsū Kalaisí ʻi heʻetau moʻuí.

• Fakaleleí

• Kātaki ki he Ngataʻangá

• Tui

• Fakamolemolé

• Sīsū Kalaisi

• Ngaahi Folofolá

• Ngaahi pōpoaki mei he kau taki ʻo e Siasí

• Fakahinohino Ako ʻo e Ongoongoleleí ki he Fakatomalá

• Maʻuʻanga tokoni maʻá e fānaú

• Ngaahi Himí mo e hiva ʻa e fānaú

• Ngaahi Vitiō