Angaʻofá

Ko e angaʻofá ko e tokoni pe ivi fakalangi ʻoku ʻomi kiate kitautolu tuʻunga ʻi he Fakalelei ʻa e ʻEiki ko Sīsū Kalaisí. Tuʻunga ʻi he angaʻofa ʻa e ʻOtuá, ʻe toetuʻu ai ʻa e tokotaha kotoa pē naʻe moʻuí—ʻe toe fakatahaʻi hotau laumālié mo hotau sinó, ʻo ʻikai ʻaupito ke na toe mavahevahe. ʻOku tuʻunga ʻi Heʻene angaʻofá, ʻa e malava ʻe he niʻihi ʻoku nau moʻui ʻaki ʻa e ongoongolelei ʻa e ʻEikí ʻo fakatomala pea fakamolemoleʻí.

Ko e angaʻofá ko ha meʻaʻofa ia mei he Tamai Hēvaní ʻoku fakafou mai ʻi Hono ʻAlo ko Sīsū Kalaisí. Ko e tefitoʻi ʻuhinga ʻo e foʻi lea ko e angaʻofá, ʻi hono ngāue ʻaki ʻi he folofolá, ko ha mālohi fakaivia mo e faitoʻo fakalaumālie ʻoku foaki mai ʻo tuʻunga ʻi he ʻaloʻofa mo e ʻofa ʻa Sīsū Kalaisí.

ʻOku aʻusia ʻe he tokotaha kotoa pē ʻi he māmaní ʻa e mate fakatuʻasinó. Tuʻunga ʻi he angaʻofa ʻa Sīsū Kalaisí, ʻe toetuʻu ʻa e tokotaha kotoa pea moʻui ʻo taʻengata.

Koeʻuhí ko e ngaahi fili fakafoʻituituí, ʻoku aʻusia ai ʻe he taha kotoa ʻa e ngaahi nunuʻa ʻo e angahalá. ʻOku ui ʻa e ngaahi nunuʻa ko ʻení ko e mate fakalaumālie. He ʻikai lava ha taha ʻo foki ki he ʻao ʻo e ʻOtuá taʻe kau ai ʻa e angaʻofa fakalangí. Tuʻunga ʻi he Fakalelei ʻa Sīsū Kalaisí, ʻe lava ke fakamolemoleʻi ʻetau ngaahi angahalá; te tau lava ʻo maʻa ʻi he ʻao ʻo e ʻOtuá. Ke maʻu e mālohi fakaivia ko ʻení, kuo pau ke tau talangofua ki he ongoongolelei ʻo Sīsū Kalaisí, ʻa ia ʻoku kau ai hono maʻu e tui kiate Iá, fakatomala mei heʻetau ngaahi angahalá, papitaiso, maʻu e meʻafoaki ʻo e Laumālie Māʻoniʻoní, mo e feinga ke muimui ki he ngaahi akonaki ʻa Sīsū Kalaisí ʻi he toenga ʻo ʻetau moʻuí.

ʻOku tokoniʻi kitautolu ʻe he angaʻofa ʻa e ʻOtuá ʻi he ʻaho kotoa pē. ʻOkú ne fakamālohia kitautolu ke tau fakahoko ha ngaahi ngāue lelei naʻe ʻikai ke tau mei lava ʻo fakahoko ʻiate kitautolu pē. Naʻe talaʻofa mai ʻe he ʻEikí kapau te tau fakavaivaiʻi kitautolu ʻi Hono ʻaó pea tui kiate Ia, ʻe tokoni ʻEne angaʻofá ke tau ikunaʻi ʻetau ngaahi vaivai fakafoʻituitui kotoa pē.