Fānau ʻa e ʻOtuá

Ko e ʻOtuá ʻa ʻetau Tamai Hēvani ʻofá. Ko ʻEne ngaahi ʻofefine mo e ngaahi foha fakalaumālie moʻoni kitautolu. Naʻe akoʻi ʻe he ʻAposetolo ko Paulá: “Pea ʻoku fakamoʻoni ʻe he Laumālie pē ko iá mo hotau laumālié, ko e fānau ʻa e ʻOtuá ʻa kitautolu.” Hangē pē ko e fōtunga tatau hatau tokolahi mo ʻetau ongomātuʻa fakaemāmaní, ʻoku fakatupu kitautolu ʻi he ʻīmisi ʻo e ʻOtuá: ʻoku ʻi ai Hono sino ʻo e kakano mo e hui ʻo hangē ko kitautolú, pea naʻe faʻu kitautolu ke tau fōtunga tatau mo Ia.

Koeʻuhí ko e fānau kotoa kitautolu ʻa e ʻOtuá, ʻoku hoko ai ʻa e tokotaha kotoa pē kuo fanauʻi ki he māmaní ko hotau tokoua, tuofefine pe tuongaʻane fakalaumālie. Pea koeʻuhí ko e fānau fakalaumālie kitautolu ʻa e ʻOtuá, ʻoku tau takitaha maʻu ai ʻa e ivi malava ke fakatupulaki Hono ngaahi ʻulungaanga fakalangí. Tuʻunga ʻi he ʻaloʻofa ʻa Sīsū Kalaisí mo ʻEne feilaulau fakalelei ʻoku tau malava ai ʻo ikunaʻi hotau ngaahi vaivaí, angahalá mo e maté, te tau lava ʻo tatau mo ʻetau Tamai Hēvaní ʻo maʻu ʻa e kakato ʻo e fiefiá.

Naʻe ʻi ai pē hotau tuʻunga takitaha ʻi he langí. Hangē ko ʻení, ʻoku tau ʻiloʻi ne tau hoko ko e ngaahi foha mo e ngaahi ʻofefine ʻo ha ongomātuʻa fakalangi—ʻoku ʻi ai hotau tuʻunga taʻengata ko e houʻeiki tangata mo fafine. Naʻe tāpuekina foki kitautolu ʻaki ha ngaahi talēniti mo e ivi malava kehekehe, pea naʻe ui kitautolu ke tau fai ha ngaahi meʻa pau ʻi he māmaní.

ʻOku ʻikai ke tau lava ʻo manatuʻi ʻetau moʻui ʻi he maama fakalaumālié, ka naʻa tau moʻui ai mo ʻetau ongomātuʻa fakalangí kimuʻa pea tau omi ki he māmaní. ʻOku ʻafioʻi heʻetau Tamai ʻi Hēvaní ko hai kitautolu pea mo e meʻa ne tau fai kimuʻa pea tau omi ki hení. Ko ha konga ʻo ʻEne palani ʻo e fakamoʻui maʻatautolú, naʻá Ne ʻomi ai kitautolu ki he māmaní ʻi he taimi ko ʻení ke tau lava ʻo maʻu ha sino fakamatelie, ako mei heʻetau aʻusiá ke fili ʻa e leleí, pea tupulaki fakalaumālie.

ʻI heʻetau moʻui ʻo fakatatau mo hotau ivi malava fakalangi ko e fānau ʻa e ʻOtuá—ʻi heʻetau fai hotau lelei tahá ke muimui kiate Ia mo talangofua ki he ngaahi fono mo e ngaahi ouau ʻo e ongoongoleleí—ʻe mohu tāpuekina kitautolu pea te tau lava ʻo faitāpuekina ʻa e moʻui ʻa e niʻihi kehé ʻo fakafou ʻi hotau talēnití mo e ngaahi ʻulungaanga fakafoʻituituí. ʻE mohu tāpuekina foki kitautolu ʻo taʻengata ʻi he moʻui ka hoko maí ʻi he taimi te tau toe foki ai ke nofo mo Ia mo hotau ngaahi fāmilí.