“Ngaahi Tāpuaki Fakapēteliaké,” Ngaahi Tefitó mo e Ngaahi Fehuʻí (2025)
Vakai Fakalūkufuá
Tāpuaki Fakapēteliaké
Ko e tāpuaki fakapēteliaké ko ha tāpuaki makehe ia ʻo e lakanga fakataulaʻeikí ʻoku lava ke maʻu ʻe he kāingalotu ʻo e Siasí. ʻOku fakaafeʻi ʻa e kāingalotu kotoa pē ke nau maʻu ia ʻi he faivelenga mo e faʻa lotu.
Ko ha konga mahuʻinga ʻo e tāpuaki fakapēteliaké ko hono fakahaaʻi e hako ʻo ha taha ʻi he fale ʻo ʻIsilelí. ʻOkú ne toe ʻomi foki ha tataki fakalaumālie, fakapapau, mo ha fakafiemālie ʻi he kotoa ʻo ʻetau moʻuí, tautautefito ʻi heʻetau muimui ki he faleʻi ʻokú ne ʻomaí.
Ko e Hā ʻa e Pēteliake?
ʻOku maʻu ʻa e tāpuaki fakapēteliaké mei ha pēteliake kuo fakanofo ʻi he hilifaki ʻo e nimá. Ko e tangatá ni ko ha taha maʻu Lakanga Taulaʻeiki Faka-Melekisēteki ia kuo fakanofo ki he lakanga ʻo e pēteliaké. ʻOku vaheʻi ia ke ne tokoni ki he kāingalotu ʻi ha siteiki pau. Ko e kau pēteliaké ko ha kau muimui mateaki kinautolu ʻo Sīsū Kalaisi ʻoku nau feinga ke ongoʻingofua e ueʻi ʻa e Laumālie Māʻoniʻoní.
ʻOku toe ʻuhinga foki ʻa e foʻi lea pēteliaké ki he tamai ʻo ha fāmili. ʻOkú ne fakamanatu mai kiate kitautolu ʻa e kau pēteliake ʻo e Fuakava Motuʻá hangē ko ʻĒpalahame, ʻAisake, mo Sēkope ʻa ia naʻa nau tataki mo tāpuekina honau hakó. Naʻe hoko ʻa ʻĀtama ko e fuofua pēteliaké, pea naʻá ne fatongia ʻaki ʻa hono tāpuakiʻi hono hakó mo tokoniʻi kinautolu ke nau moʻui angatonú.
Ko e Hā ʻa e Fakahā ʻo e Hakó?
ʻOku kau foki ʻi he tāpuaki fakapēteliaké hano fakahā ʻo e hako ʻo ha taha ʻi he fale ʻo ʻIsilelí, ko ha hako ʻo ʻĒpalahame. ʻOkú ne talamai pe ko e faʻahinga fē ʻo ʻIsilelí te tau maʻu ai ʻa e ngaahi tāpuaki naʻe talaʻofa ʻaki ʻe he ʻOtuá kia ʻĒpalahamé.
Ko ʻIsilelí ko ha hingoa makehe ia naʻe foaki ʻe he ʻEikí kia Sēkopé. Ko Sēkopé ko e foha ia ‘o ‘Aisake pea ko e mokopuna ia ‘o ‘Ēpalahame. ʻE lava ke ʻuhinga ʻa e hingoa ʻIsilelí kia Sēkope, ki hono hakó, pe ki he puleʻanga ʻo e ngaahi hako ko iá. ʻOku haʻu e faʻahinga ʻe hongofulu mā ua ʻo ʻIsilelí mei he ngaahi foha mo e makapuna tangata ʻo Sēkopé.
ʻE lava ke fakafou e hakó ʻi ha taha ʻo e ngaahi faʻahinga ʻo ʻIsilelí, hangē ko ʻIfalemi, Manase, pe ko Siuta. Neongo he ʻikai ke tau hoko kotoa ko ha hako moʻoni ʻo Sēkope, ka ko kinautolu ʻoku nau tali ʻa e ongoongolelei ʻo Sīsū Kalaisí ʻoku ohi mai kinautolu ki he fale ʻo ʻIsilelí. Koeʻuhí ʻoku tau takitaha fou mai ʻi ha laine fakafāmili lahi ange, ʻe lava ke fakahaaʻi ha mēmipa ʻe toko ua ʻo e fāmili tatau pē ʻa e hako ʻi he ngaahi faʻahinga kehekehe ʻo ʻIsilelí.
ʻOku lau ʻa e kāingalotu kotoa pē ʻo e Siasí ko e hako ʻo ʻĒpalahame mo e kau ʻea-hoko ki he ngaahi talaʻofa mo e ngaahi tāpuaki kotoa ʻo e fuakava faka-ʻĒpalahamé.
Te Tau Ako Fēfē mei ha Tāpuaki Fakapēteliaké?
ʻOku fonu ʻa e moʻuí ʻi he ngaahi fehuʻi, faingataʻa, mo e ngaahi fili. Kuo teʻeki tuku ʻe heʻetau Tamai Hēvaní ke tau tuenoa ʻo hē atu taʻe kau ai ʻEne tokoní. ʻOkú Ne ʻomi ʻEne tataki angaʻofá ʻo fakafou ʻi he lotú, folofolá, kau palōfitá, mo e Laumālie Māʻoniʻoní. ʻOkú Ne toe foaki mai foki ha tāpuaki fakapēteliake.
ʻOku ʻafioʻi koe ʻe he Tamai Hēvaní. ʻOkú Ne ʻofa ʻiate koe. ʻOkú Ne ʻafioʻi ho ngaahi mālohingá, vaivaí, mo e tuʻunga malava taʻengatá. ʻOku ʻi ho tāpuaki fakapēteliaké ʻa ʻEne faleʻi fakataautaha kiate koé. ʻE lava foki ke kau ai ha ngaahi talaʻofa mo ha ngaahi fakatokanga te ne ʻomi ha nonga mo ha maluʻi. ʻOku totonu ke ke ako ia ʻi he faʻa lotu pea toutou fakahoko. ʻI hoʻo muimui ki heʻene faleʻí, te ke fai ai ha ngaahi fili lelei ange pea lava ke maʻu e ngaahi tāpuaki ʻa e ʻOtuá kuo talaʻofa maí.
He ʻikai tali ʻe he tāpuakí ʻetau ngaahi fehuʻí pe lisi kotoa e meʻa ʻe hoko ʻi heʻetau moʻuí. Kapau ʻoku ʻikai talanoa ʻa e tāpuakí ki ha meʻa mahuʻinga ʻe hoko, hangē ko ha ngāue fakafaifekau taimi kakato pe mali, ʻoku ʻikai ʻuhinga ia he ʻikai ke tau maʻu ʻa e faingamālie ko iá.
ʻI he founga tatau pē, ʻoku ʻikai totonu ke tau pehē ʻe hoko kotoa ʻa e ngaahi meʻa ʻoku talanoa ki ai ʻa e tāpuakí ʻi he moʻuí ni. Kapau ʻoku tau moʻui taau, ʻe fakakakato kotoa ʻa e ngaahi talaʻofá ʻi he taimi ʻa e ʻEikí. Ko e ngaahi tāpuaki ko ia he ʻikai hoko ʻi he moʻui ní ʻe hoko ia ʻi he moʻui ka hokó.
Ko e ngaahi tāpuaki fakapēteliaké ʻoku toputapu mo fakataautaha ia. ʻE lava ke vahevahe kinautolu mo e kau mēmipa tonu ʻo e fāmilí ka ʻoku ʻikai fakataumuʻa ia ke fakafehoanaki mo ha ngaahi tāpuaki kehe pe vahevahe ʻi he kakaí.
Te Tau Maʻu Fēfē ha Tāpuaki Fakapēteliake?
ʻOku fakaafeʻi ʻa e kāingalotu moʻui taau kotoa pē ʻo e Siasí ke nau maʻu ha tāpuaki fakapēteliake. ʻOku maʻu ʻe ha kāingalotu tokolahi honau tāpuakí ʻi heʻenau kei taʻu hongofulu tupú pea ʻoku kei hanganaki mai ha ngaahi fili mahuʻinga lahi ʻi he moʻuí. Neongo ia, ka ʻoku poupouʻi foki mo e kakai lalahi matuʻotuʻa angé ke nau maʻu honau tāpuakí. ʻOku totonu ke fakataha ʻa e kāingalotu ʻoku nau fiemaʻu ha tāpuakí mo ʻenau pīsopé pe palesiteni fakakoló.
ʻOku hikitepiʻi e ngaahi tāpuaki fakapēteliaké pea toki taipeʻi. ʻOku ʻoange ha tatau ki he mēmipá pea tauhi ha tatau ʻe taha ʻi he ngaahi lekooti ʻo e Siasí. Kapau ʻoku mole pe maumau ʻa e tatau ʻo e mēmipá, ʻe lava ke kole ha tatau foʻou mei he peesi Tāpuaki Fakapēteliaké ʻi he ChurchofJesusChrist.org. ʻE lava foki ke maʻu ʻe he kāingalotú honau tāpuaki fakapēteliaké mei he konga ki he Home ʻi he polokalama Gospel Library.