Tohi ʻa Molomoná

Naʻe akoʻi mai ʻe Siosefa Sāmita ko e Tohi ʻa Molomoná ko e “maka-tuʻu-loto ʻo ʻetau tui fakalotú” (vakai, Ngaahi Akonaki ʻa e Kau Palesiteni ʻo e Siasí: Siosefa Sāmita (2011), 73). ʻI he tā-palani ʻo ha fale, ko e maka-tuʻu-lotó ko ha foʻi maka ia ʻi lotomālie ʻi he taupotu taha ki ʻolunga ʻo ha ʻaleso, ʻa ia ʻokú ne fakamaʻu fakataha ʻa e toenga ʻo e fanga foʻi maká ʻo taʻofi ke ʻoua naʻa holafa ʻa e ʻalesó. Hangē ko e maka-tuʻu-loto ʻi he langa falé, ʻoku matuʻaki mahuʻinga ʻa e Tohi ʻa Molomoná ki heʻetau tui kia Sīsū Kalaisi mo ʻEne ongoongolelei kuo fakafoki maí. ʻOku tākiekina fēfē nai hoʻo fakamoʻoni ki he Tohi ʻa Molomoná ʻa hoʻo fakamoʻoni ki he ngaahi tafaʻaki kehekehe ʻo e ongoongoleleí?

Ko e tefitoʻi pōpoaki ʻo e Tohi ʻa Molomoná ko Sīsū ʻa e Kalaisí. Fakaafeʻi ʻa e kau mēmipa ho kulupú ke nau lau ʻa e peesi talamuʻaki ʻo e Tohi ʻa Molomoná, ʻo tokanga makehe ki he palakalafi hono uá. ʻOku fakamamafaʻi fēfē nai ʻe he peesi talamuʻakí ʻa e mahuʻinga ko ia ʻo e Tohi ʻa Molomoná? Mahalo ʻe ʻaonga foki mo e ngaahi potufolofola ko ʻení: 1 Nīfai 6:4; Sēkope 1:7; ʻAmenai 1:26; 3 Nīfai 11:13–17; Molonai 10:32–33. Ko e hā ʻoku mahuʻinga ai ke tokoni ke mahino ki he niʻihi kehé, ko e taumuʻa ʻo e Tohi ʻa Molomoná ke fakamoʻoniʻi ko Sīsū ʻa e Kalaisí?

2 Nīfai 29:1–13; 33:10–15; Tokāteline mo e Ngaahi Fuakava 42:12; Siosefa Sāmita—Hisitōlia 1:34; Ngaahi Tefito ʻo e Tuí 1:8

Russell M. Nelson, “Ko e Tohi ʻa Molomoná: Ne Mei Fēfē Nai Hoʻo Moʻuí Ka Ne ʻIkai Ia?,” Liahona, Nōvema 2017, 60–63

“Vahe 9: Ko e Tohi ʻa Molomoná—Ko e Maka-tuʻu-loto ʻo ʻEtau Tui Fakalotú,” Ngaahi Akonaki ʻa e Kau Palesiteni ʻo e Siasí: Ezra Taft Benson (2014), 125–34

Naʻe fekauʻi ʻa Siosefa Sāmita ke ne leʻohi fakalelei ʻa e ʻū lauʻi peletí. Lolotonga e ngāue ki hono liliú, naʻe ʻi ai ha tokosiʻi ne nau sio tonu ki he ʻū lauʻi peletí. Ka neongo ia, naʻe talaange kia Siosefa Sāmita ke ne fakahā ʻa e ʻū lauʻi peletí ki ha niʻihi ʻo hono kaungā-ngāue ofí. Naʻe hoko ʻo ʻiloa ʻa e niʻihi ko ʻení ko e “Kau Fakamoʻoni e Toko Tolú” mo e “Kau Fakamoʻoni ʻe Toko Valú.” Te ke lava ʻo lau ʻenau ngaahi fakamoʻoní ʻi he “Ko e Fakamoʻoni ʻa e Kau Fakamoʻoni ʻe Toko Tolú” mo e “Ko e Fakamoʻoni ʻa e Kau Fakamoʻoni ʻe Toko Valú.” Ko e hā ʻoku mahuʻinga ai ke tokoniʻi e niʻihi kehé ke nau ʻilo ki he ngaahi aʻusia ʻa e Kau Fakamoʻoni ʻe Toko Tolú mo e Kau Fakamoʻoni ʻe Toko Valú? Ko e hā te ke ala fai ke vahevahe ai mo e niʻihi kehé ʻa hoʻo fakamoʻoni ki he Tohi ʻa Molomoná?

Neongo kuo fifili ha tokolahi ki he ngāue ki hono liliu ʻo e Tohi ʻa Molomoná, naʻe ʻoange ʻe Siosefa Sāmita ha kiʻi fakamatala pau kau ki ai makehe mei hono talaange naʻe liliu ia “ʻi he foaki mo e māfimafi ʻo e ʻOtuá” (talateu ki he Tohi ʻa Molomoná; Tokāteline mo e Ngaahi Fuakava 135:3). Fakaafeʻi e kau mēmipa ʻi ho kulupú ke nau lau ʻa e “Liliu ʻo e Tohi ʻa Molomoná” ʻi he Ngaahi Tefito ʻi he Hisitōlia ʻo e Siasí (Gospel Library). Fehuʻi ange pe ko e hā ha ngaahi fakakaukau ne nau maʻu mei he laukongá. ʻOku mou pehē ko e hā e ʻuhinga naʻe fakamamafaʻi ai ʻe Siosefa Sāmita ʻa e “meʻafoaki mo e mālohi ʻo e ʻOtuá” ʻi hono aleaʻi ko ia e liliu ʻo e Tohi ʻa Molomoná?

ʻĪsaia 29:11–14, 18–19; Siosefa Sāmita—Hisitōlia 1:30–35, 42–54

Kau Māʻoniʻoní: Ko e Talanoa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, voliume 1, Ko e Fuka ʻo e Moʻoní, 1815–1846 (2018), 22–32, 41–69

Russell M. Nelson, “A Treasured Testament,” Ensign, July 1993

“Days of Harmony” (vitiō), Gospel Library

Lau ʻa e fakamatala ko ʻeni meia ʻEletā Sefilī R. Hōlani, “ʻOku ou fakamoʻoni he ʻikai lava ha taha ʻo aʻu ki he tui kakato ki he ngāue ko ʻeni ʻo e ngaahi ʻaho kimui ní—peá ne maʻu ai ha nonga mo e fiemālie kakato ʻo hotau kuongá—kae ‘oua kuó ne tali moʻoni hono faka-ʻOtua ʻo e Tohi ʻa Molomoná mo e ʻEiki ko Sīsū Kalaisí, ʻa ia ʻokú ne fakamoʻoniʻí.” Kuo tākiekina fēfē nai ʻe he Tohi ʻa Molomoná ʻa hoʻo fakamoʻoni ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní?

Ko e Tohi ʻa Molomoná ko ha meʻangāue ia kuo teuteuʻi fakalangi ki he fakauluí ʻa ia ʻokú ne maʻu ʻa e mālohi ke liliu ʻa e fakakaukaú, lotó, mo e moʻuí ʻi heʻetau fakafenāpasi kitautolu kia Sīsū Kalaisi mo ʻEne ngaahi akonakí. Lau ʻa e fakamatala ko ʻeni meia Palesiteni ʻEselā Tafu Penisoní fakataha mo e kau mēmipa ʻi ho kulupú:

“Ko e Tohi ʻa Molomoná ko e meʻangāue ia ne palani ʻe he ʻOtuá ke “tafiʻi ʻa māmani ʻo hangē ka fai ia ʻaki ʻa e lōmakí, ke tānaki fakataha mai ʻa [Hono] kakai filí.’ (Mōsese 7:62.) Ko e tohi folofola toputapu ko ʻení, ʻoku fiemaʻu ke kakano lahi ange ʻaki ʻetau malangá, ʻetau faiakó, mo ʻetau ngāue fakafaifekaú. …

“ʻOku ou fakatukupaaʻi kitautolu kotoa ke tau fakakaukauʻi ʻi he lotu lahi e ngaahi sitepu te tau lava fakataautaha ai ʻo ʻomai kakato e fakamoʻoni foʻou ko ʻeni kia Kalaisí ki heʻetau moʻuí pea ki he māmani ʻokú ne fiemaʻu lahi fau iá.”

Ko e hā ha ngaahi founga te tau lava ai ʻo tokoni ki he ʻEikí ʻi Heʻene ngāué ʻaki hono fakafonu ʻa e māmaní ʻaki ʻa e Tohi ʻa Molomoná?

2 Nīfai 25:17–18; ʻEta 4:11; Tokāteline mo e Ngaahi Fuakava 20:8–15

Jeffrey R. Holland, “Malu Maʻá e Laumālié,” Liahona, Nōvema 2009, 88–90

Ronald A. Rasband, “ʻI He ʻAho Ní,” Liahona, Nōvema 2022, 25–27

Michael T. Ringwood, “You Can Know for Yourself,” Ensign, Feb. 2017, 66–69