Houʻeiki Fafine ʻi he Siasí

Ko e houʻeiki fafiné ko e ngaahi ʻofefine ʻofeina kinautolu ʻo e ʻOtuá; ʻoku tokoni honau tuʻunga fakalangi ko ʻEne fānau fakalaumālié ke nau laka atu ki muʻa ʻi he fakatuʻamelie mo e tui kia Sīsū Kalaisi. ʻI he hoko ʻa e houʻeiki fafiné ko e kau ākonga ʻa Sīsū Kalaisí, ʻoku nau mahuʻinga ki he palani ʻa e ʻOtuá ki he fiefiá. ʻOku nau langa hake ʻa e puleʻanga ʻo e ʻOtuá ʻaki ʻenau hoko ko e ngaahi uaifi, faʻē, ʻofefine, tokoua, mehikitanga mo e ngaahi kaungāmeʻa. ʻOku tokoni e houʻeiki fafiné ke fakahoko e ngāue ʻa e ʻOtuá ʻi hono vahevahe mo akoʻi e ongoongoleleí, kau atu ki he ngaahi fakataha alēlea fakauōtí mo fakasiteikí, fakahoko e ngāue fakatemipalé mo e hisitōlia fakafāmilí, tokangaekina ʻa e niʻihi ʻoku faingataʻaʻiá, mo ngāue fakaetauhi ki he niʻihi kehé.

Naʻe pehē ʻe Kamila N. Sionisoni, ko e Palesiteni Lahi ʻo e Fineʻofá, “Ko ha taimi nāunauʻia ʻeni ke hoko ai ko ha fefine, ko ha fefine ʻo e fuakavá, ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ko e mahino ko ia hotau ngafá, taumuʻá, mo e fatongiá ʻi he palani ʻo e fiefiá ʻoku fakaʻeiʻeiki, fakafiemālie, mo fakafiefia ia.”

Ko e kakai fefine lalahi kotoa pē ʻi he Siasí ko e kau mēmipa kinautolu ʻo e Fineʻofá. Naʻe fokotuʻu ʻa e Fineʻofá ʻi he 1842, ko e kī ia ki he misiona ʻa e Siasí ʻi he tokoni ki he ʻOtuá ke fakakakato ʻEne ngāue ʻo e fakamoʻuí mo e hakeakiʻí, pea naʻe ueʻi fakalangi ʻa hono fokotuʻutuʻu iá. ʻI he taimi naʻe fokotuʻu ai ʻa e Fineʻofá, naʻe pehē ʻe he Palōfita ko Siosefa Sāmitá: “Te u fokotuʻutuʻu ʻa e kakai fefiné ʻo fakatatau mo e lakanga fakataulaʻeikí. … Naʻe teʻeki ai fokotuʻutuʻu lelei pehē ʻa e Siasí kae tālunga hono fokotuʻutuʻu ko ʻeni ʻo e kakai fefiné.”

ʻI he ʻaho ní, ko e Fineʻofá ko e taha ia ʻo e ngaahi houalotu tokolahi taha ʻa e houʻeiki fafiné ʻi he māmaní, ʻa ia ʻoku ʻi ai ha kau mēmipa ʻe laui miliona. ʻI he Fineʻofá, ʻoku tataki mo ngāue ai ʻa e houʻeiki fafiné ʻi ha ngaahi uiuiʻi mo e ngaahi fatongia fakaemāmanilahi mo fakalotofonua. ʻI heʻenau ngāue fakatahá, ʻoku ʻomi ai ʻe he houʻeiki fafiné ʻa e fakafiemālie ʻo Sīsū Kalaisí ki he kakai ʻi he funga ʻo e māmaní fakatuʻasino mo fakalaumālie fakatouʻosi.

ʻOku toe fua fatongia foki ʻa e houʻeiki fafiné ʻi he houalotu Finemui mo e Palaimeli ʻo e Siasí. ʻOku nau tokoni ki he toʻu tangata kei tupu haké ke nau hoko ko ha kau ākonga ʻa Sīsū Kalaisi.

ʻI he kau atu ʻa e houʻeiki fafiné ki he Siasí, te nau ala maʻu ha mālohi ʻi heʻenau fakahoko mo tauhi e ngaahi fuakava mo e ʻOtuá mo e moihū kiate Ia ʻi he temipalé. ʻI Heʻene tokoní, te nau ala tokoni ke fakahoko ʻa e moʻui taʻengata ʻa e fānau ʻa e ʻOtuá mo teuteuʻi ʻa e māmaní ki he Hāʻele ʻAna Ua Mai ʻa Sīsū Kalaisí.