Fetuʻutakí

ʻOku feinga ʻa e kau ākonga moʻoni ʻa Sīsū Kalaisí ke muimui ki Heʻene sīpingá ʻi he ngaahi founga ʻoku nau fetuʻutaki aí. ʻOku fiemaʻu ʻenau ngaahi fetuʻutaki ʻi he lea mo ʻikai lea fakatouʻosi, ke angaʻofa, manavaʻofa, mo faʻa tokoni, ʻo fakahaaʻi ha ʻofa ki he fānau ʻa e Tamai Hēvaní pea mo ha mahino ko e kakai kotoa pē ko e ngaahi tokoua mo e tuofāfine.

Naʻe akonaki ʻa ʻEletā L. Lainolo Kenituliki ʻo e Kau Fitungofulú ʻo pehē:

“ʻOku fakahaaʻi ʻa e fetuʻutaki faka-Kalaisí ʻi he ongo ʻo e ʻofá kae ʻikai ko e leʻolahi. ʻOku fakataumuʻa ia ke tokoni kae ʻikai ke fakamamahi. ʻOkú ne faʻa haʻi fakataha kitautolu kae ʻikai fakamavahevaheʻi kitautolu. ʻOku fakataumuʻa ia ke langaki hake kae ʻikai tukuhifo.

“Ko e ngaahi fetuʻutaki faka-Kalaisí ko hano fakahaaʻi ia ʻo e ʻofá kae ʻikai ko e ʻitá, moʻoní kae ʻikai ko e faʻufaʻú, manavaʻofá kae ʻikai ko e fakakikihí, fakaʻapaʻapá kae ʻikai ko e manukí, akonakí kae ʻikai ko e fakaangá, fakatonutonú kae ʻikai ko e fakahalaiaʻí. ʻOku nau lea mahino kae ʻikai ke fakapuputuʻu. Mahalo pē ʻoku ongo vaivai pe fefeka, ka kuo pau ke nau fakanonga maʻu pē.

“Ko e pole moʻoni ʻoku tau fehangahangai mo ia ʻi heʻetau fetuʻutaki mo e niʻihi kehé ko e fakafeangai hotau lotó ke maʻu ha ngaahi ongo faka-Kalaisi ki he fānau kotoa ʻa e Tamai Hēvaní. ʻI heʻetau fakatupulaki ʻa e hohaʻa ko ʻení ki he tūkunga ʻo e niʻihi kehé, te tau fetuʻutaki leva mo kinautolu ʻo hangē ko ia naʻe mei fai ʻe he Fakamoʻuí. Te tau toki fakamāfanaʻi e loto ʻo kinautolu ʻe malava ke nau faingataʻaʻia fakalongolongó. ʻI heʻetau feʻiloaki mo e kakai ʻoku ʻi ai haʻanau ngaahi fiemaʻu makehe ʻi he moʻuí, te tau toki lava leva ʻo ʻai ke fakafiefia ange ʻenau fonongá ʻi he ngaahi meʻa ʻoku tau lea ʻakí.

“ʻE tokoniʻi kitautolu ʻe he ngaahi fetuʻutaki faka-Kalaisí ke fakatupulaki ha ngaahi vā fetuʻutaki ʻoku māʻoniʻoní pea iku ʻo foki hao ki hotau ʻapi fakalangí. Fakatauange te tau mataʻikoloa ʻaki ʻa e meʻaʻofa fakalangi ʻo e fetuʻutakí, pea fakatauange ke tau fakaʻaongaʻi fakapotopoto ia ke langaki pea mo tokoniʻi e niʻihi kehé ʻi he fononga fakaofo ko ʻeni ʻi he moʻui fakamatelié.”