Manavaʻofá

Naʻe tākiekina ʻe he ʻofa haohaoa ʻa Sīsū Kalaisí ʻa ʻEne ngaahi ngāue kotoa pē. Fakakaukau ki he ngaahi sīpinga ko ʻení: Mātiu 26:39; Luke 7:22; 1 Nīfai 19:9. ʻOku fakahaaʻi fēfē nai ʻe he ngaahi potufolofola ko ʻení ʻa e ʻofa ʻa Kalaisi kiate kitautolú? Mahalo te ke lava ʻo fakafehoanaki e ngaahi sīpinga ko ʻeni ʻo e ʻofa ʻa e Fakamoʻuí mo e fakamatala ʻa Paula ki he manavaʻofá ʻi he 1 Kolinitō 13. Kuo fakahaaʻi fēfē nai ʻe he Fakamoʻuí ʻa e faʻahinga ʻofa ko ʻení kiate koé?

Naʻe akonaki ʻa e Palōfita ko Siosefa Sāmitá, “Ko e ʻofá ko e taha ia ʻo e ngaahi ʻulungaanga fakaʻeiʻeiki taha ʻo e ʻOtuá.” Fakakaukau ke tohiʻi ʻi hoʻo tohinoá ʻa e ngaahi lea ʻOku ou ʻiloʻi ʻoku ʻofa ʻa e ʻOtuá ʻiate au koeʻuhí … ʻI he uiké kakato, hiki ʻa e ngaahi founga te ke fakakakato ai ʻa e sētesi ko ʻení. Te ke lava ʻo lau pe fanongo ki ha hiva hangē ko e “Ko e ʻOtuá ko e ʻOfa” pe “ʻOku ʻOfa ʻEku Tamai Hēvaní ʻIate Au” ke maʻu ha ngaahi fakakaukau.

Fakakaukau ki he akonaki ko ʻeni meia ʻEletā Sefilī R. Hōlaní: “Ko e ʻuluaki fekau lahi taha ʻo ʻitānití ke ʻofa ki he ʻOtuá ʻaki e kotoa ʻo hotau lotó, iví, ʻatamaí, mo e mālohí—ko e ʻuluaki fekau lahí ia. Ka ko e ʻuluaki foʻi moʻoni maʻongoʻonga ʻo ʻitānití ko e ʻofa ʻa e ʻOtuá ʻiate kitautolú ʻaki e kotoa Hono lotó, iví, ʻatamaí, mo e mālohí.” Aleaʻi ʻa e founga ʻe lava ke liliu ai ʻe hoʻo ʻiloʻi ʻa e ʻofa lahi ʻa e ʻOtuá kiate koé, ʻa e anga hoʻo ongó, fakakaukaú, mo hoʻo ʻulungāngá.

ʻE lava tokoni ʻa e foʻi vitiō “Charity: An Example of the Believers” (4:50) ke fai ha fealeaʻaki fekauʻaki mo e founga ʻoku liliu ai ʻe he ʻofa faka-Kalaisí ʻa e moʻuí. Naʻe fakahaaʻi fēfē nai ʻe he kau finemui ʻi he vitiō ko ʻení ʻa e ʻofa faka-Kalaisí ki he tokotaha fakakaekae foʻoú? Naʻe kaunga fēfē nai ʻa e ʻofa ko ʻení kiate iá? Naʻe kaungā fēfē nai ia ki he kau finemui kehé? Fakakaukau ki he kakai ʻoku mou feohí ʻe ala fiemaʻu ke nau ongoʻi e ʻofa ʻa e Fakamoʻuí. Talanoa fekauʻaki mo ha ngaahi founga te ke lava ai ʻo vahevahe ʻa e ʻofa ʻa Kalaisí mo ha taha pe toko ua ʻo kinautolu.

Luke 10:30–37; 1 Sione 3:16–18; 4:7–11, 18–19

Alan T. Phillips, “ʻOku ʻAfioʻi mo ʻOfaʻi Koe ʻe he ʻOtuá,” Liahona, Nōvema 2023, 49–52

Michael T. Ringwood, “He Naʻe ʻOfa Pehē ʻa e ʻOtuá Kiate Kitautolu,” Liahona, Mē 2022, 88–90

Susan H. Porter, “ʻOfa ʻa e ʻOtuá: Ko ha Fakafiefia Taha ia ki he Laumālié,” Liahona, Nōvema 2021, 33–35

Lau ʻa e 1 Kolinitō 13:1–7, mo fakakaukau kiate koe ʻi he ngaahi veesi ko ʻení. Lau leva ʻa e veesi 8. Ko e hā ʻene ʻuhinga kiate koe ʻa e “ʻoku ʻikai fakaʻau ʻo ngata ʻa e ʻofá”? Fakakaukau ki ha niʻihi ʻo e ngaahi ʻulungaanga ʻoku lisi atu ʻi he veesi 4–7 te ke lava ʻo ngāue ki ai ke tokoni atu ke ke hoko ko ha sīpinga lelei ange ʻo e manavaʻofá.

Neongo ko e manavaʻofá ko ha meʻaʻofa ia mei he ʻOtuá, kae hangē ko ha faʻahinga meʻaʻofa pē, kuo pau ke tau maʻu ia. Ko e hā ʻokú ke ako mei he Molonai 7:48; 8:26 fekauʻaki mo e founga ke maʻu ai ʻa e meʻafoaki ʻo e manavaʻofá?

Naʻe akoʻi mai ʻe Palesiteni Lāsolo M. Nalesoni ʻa e ngaahi moʻoni mahuʻinga ko ʻeni fekauʻaki mo e manavaʻofá: “Ko e ʻofa faka-Kalaisí ko e faitoʻo ia ki he fakakikihí. Ko e ʻofa faka-Kalaisí ko e meʻa-foaki fakalaumālie ia ʻokú ne tokoniʻi kitautolu ke tau liʻaki ʻa e tangata fakakakanó, ʻa ia ʻoku siokita, kumi ʻuhinga, hīkisia, mo loto-meheká. Ko e ʻofa faka-Kalaisí ko e tefitoʻi ʻulungaanga ia ʻo ha ākonga moʻoni ʻa Sīsū Kalaisi. ʻOku fakamatalaʻi ʻe he ʻofa faka-Kalaisí ʻa e tokotaha faʻa fakaleleí.” ʻI hoʻo fakalaulauloto ki he ngaahi lea ʻa Palesiteni Nalesoní, ko e hā ʻoku ueʻi koe ʻe he Laumālié ke ke faí? Fakakaukau ke fokotuʻu ʻa e lea ʻa Palesiteni Nalesoní ʻi ha feituʻu te ke vakai maʻu pē ki ai ko ha fakamanatu ke ke manavaʻofa ki he niʻihi kehé.

ʻOkú ke ʻiloʻi fēfē nai ha tokotaha muimui ʻo Sīsū Kalaisi? Naʻe akonaki ʻe he Fakamoʻuí tonu, “ʻI he meʻá ni ʻe ʻilo ai ʻe he kakai kotoa pē ko ʻeku kau ākonga ʻa kimoutolu, ʻo kapau te mou feʻofaʻaki kiate kimoutolu” (Sione 13:35). Fakakaukau fakakulupu ki ha kakai ʻokú ke saiʻia ai ʻa ia ko ha ngaahi sīpinga moʻoni kinautolu ʻo e manavaʻofá. Ko e hā ha founga kuó ke mamata ai ki heʻenau fakahoko e ʻofa haohaoa ʻa Kalaisí? Fakakaukau ke ʻave ha pōpoaki telefoni pe fai ha kiʻi tohi ki ha taha ʻo e kakai ko ʻení pea vahevahe ʻa e meʻa ʻokú ke saiʻia ai fekauʻaki mo iá.

Talanoa fekauʻaki mo ha ngaahi fili mahuʻinga ʻokú ke fai he ʻaho kotoa pē. Lau leva ʻa e “ʻOfa ki he ʻOtuá, ʻofa ki ho kaungāʻapí” ʻi he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí ([2022], 10–15). Aleaʻi ʻa e founga ʻe lava ke hoko ai ʻa e meʻafoaki ʻo e manavaʻofá ko ha fakahinohino ʻi hoʻo fai ʻa e ngaahi fili takitaha ko iá.

Fakakaukau ki he akonaki ko ʻeni meia Palesiteni Tieta F. ʻUkitofá: “Ko e hā pē ha palopalema [ʻokú ke] fehangahangai [ai] mo ho fāmilí, ko e hā pē ha meʻa kuo pau ke ke fai ke fakaleleiʻi kinautolu, ko e kamataʻanga mo e ngataʻanga ʻo e foungá ko e manavaʻofá, ʻa e ʻofa haohaoa ʻa Kalaisí.” Ngāue fakataha ke faʻu ha lisi ʻo ha ngaahi palopalema pe ngaahi pole ʻe niʻihi ʻoku fehangahangai mo ha niʻihi fakafoʻituitui pe ngaahi fāmili he ʻahó ni, hangē ko e fakakikihí pe meheká. Te ke lava ʻo lau leva ʻa e Molonai 7:45 pea talanoa ki he founga ʻe tokoni ai ʻa e ngaahi ʻulungaanga ʻo e manavaʻofá ne fakamatalaʻi ʻi he vēsí, ke solova ʻa e ngaahi palopalema ʻi ho lisí. Te ke lava leva ʻo faʻu ha palani faingofua ke fakaʻaongaʻi ʻa e manavaʻofá ke tokoni ki hono fakaleleiʻi ha taha ʻo e ngaahi palopalemá. Fakakau ʻa e ʻOtuá ʻi hoʻo palaní, pea fekumi ki ha tokoni mei he niʻihi kehé ʻo ka fiemaʻu.

2 Nīfai 26:30; Tokāteline mo e Ngaahi Fuakava 121:45–46

Russell M. Nelson, “Fiemaʻu ha Kau Faʻa Fakalelei,” Liahona, Mē 2023, 98–101

Ulisses Soares, “Kau Muimui ʻo e Pilinisi ʻo e Melinó,” Liahona, Mē 2023, 85–87

J. Anette Dennis, “ʻOku Faingofua pē ʻEne Haʻamongá, pea Maʻamaʻa ʻEne Kavengá,” Liahona, Nōvema 2022, 80–82

Marvin J. Ashton, “The Tongue Can Be a Sharp Sword,” Ensign, May 1992, 18–20

“ʻOfa Faka-Kalaisí, ko e ʻOfa Haohaoa ia ʻa Kalaisí,” Ngaahi Akonaki ʻa e Kau Palesiteni ʻo e Siasí: Siosefa Sāmita (2011), 491–501