“ຄອບຄົວມາຕິນສ໌,” ເລື່ອງຄຳສອນ ແລະ ພັນທະສັນຍາ (2024)
“ຄອບຄົວມາຕິນສ໌,” ເລື່ອງຄຳສອນ ແລະ ພັນທະສັນຍາ
ເດືອນເມສາ 1972–ເດືອນພະຈິກ 1978
ຄອບຄົວມາຕິນສ໌
ລໍຖ້າພອນຈາກພຣະຜູ້ເປັນເຈົ້າ
ເຮເວຊິໂອ ມາຕິນສ໌ ກຳລັງຂັບລົດກັບບ້ານໃນເມືອງຣຽວເດ ຈານເນໂຣ, ປະເທດບຣາຊິນ. ຖະໜົນເຕັມໄປດ້ວຍລົດ ຈົນບໍ່ມີໃຜສາມາດເຄື່ອນຍ້າຍໄດ້. ເຮເວຊິໂອໄດ້ຄິດກ່ຽວກັບຊີວິດຂອງລາວ. ລາວມີວຽກທີ່ດີ. ລາວຮັກພັນລະຍາຂອງລາວ, ຣູດາ, ແລະ ລູກສອງຄົນຂອງລາວ, ມາກັສ ແລະ ມາຣິສາ. ແຕ່ລາວຮູ້ສຶກວ່າມີບາງສິ່ງບາງຢ່າງທີ່ຂາດຫາຍໄປ.
Saints, 4:229–30
ເຮເວຊິໂອໄດ້ລົງຈາກລົດ ແລະ ເລີ່ມອະທິຖານ. “ພຣະເຈົ້າຂອງຂ້ານ້ອຍ,” ລາວເວົ້າ, “ຂ້ານ້ອຍຮູ້ວ່າພຣະອົງຢູ່ບ່ອນໃດບ່ອນໜຶ່ງ, ແຕ່ບໍ່ຮູ້ວ່າຢູ່ໃສ.” ລາວໄດ້ບອກພຣະບິດາເທິງສະຫວັນວ່າ ຄອບຄົວຂອງລາວກຳລັງສະແຫວງຫາບາງສິ່ງ, ແລະ ເຂົາເຈົ້າຕ້ອງການຄວາມຊ່ວຍເຫລືອຈາກພຣະອົງ. ແລ້ວເຮເວຊິໂອໄດ້ກັບຄືນເຂົ້າລົດ ແລະ ຂັບລົດກັບບ້ານ.
Saints, 4:230
ຕໍ່ມາ, ພຣະຜູ້ເປັນເຈົ້າໄດ້ສົ່ງຜູ້ສອນສາດສະໜາຈາກສະຫະລັດໄປທີ່ນັ້ນ. ເຂົາເຈົ້າໄດ້ຢ້ຽມຢາມຄອບຄົວມາຕິນສ໌. ເຮເວຊິໂອໄດ້ສັງເກດເຫັນວ່າ ເຂົາເຈົ້າໄດ້ນຳວິນຍານແຫ່ງສັນຕິສຸກມາສູ່ບ້ານຂອງເຂົາເຈົ້າ. ລາວຮູ້ວ່າ, ໃນເວລານັ້ນ, ຜູ້ຄົນທີ່ມີຜິວດຳມັກຈະຖືກປະຕິບັດຕໍ່ແບບບໍ່ດີຢູ່ໃນສະຫະລັດ. ລາວໄດ້ຖາມວ່າ, “ສາດສະໜາຂອງພວກເຈົ້າປະຕິບັດຕໍ່ຄົນຜິວດຳແນວໃດ?”
Saints, 4:230–31
ຜູ້ສອນສາດສະໜາໄດ້ອະທິບາຍວ່າ ລູກໆທຸກຄົນຂອງພຣະເຈົ້າສາມາດຮັບບັບຕິສະມາ. ແຕ່ໃນເວລານັ້ນ, ຄົນດຳທີ່ມີບັນພະບຸລຸດຈາກອາຟຣິກາບໍ່ສາມາດດຳລົງຖານະປະໂລຫິດ ຫລື ຮັບພອນພຣະວິຫານສ່ວນໃຫຍ່ໄດ້. ເຮເວຊິໂອ ແລະ ຣູດາມີຄຳຖາມອີກຢ່າງຫລວງຫລາຍ. ຜູ້ສອນສາດສະໜາໄດ້ພະຍາຍາມຢ່າງເຕັມທີ່ເພື່ອຕອບຄຳຖາມເຫລົ່ານັ້ນ.
Saints, 4:231
ເປັນເວລາຫລາຍປີ, ສາດສະດາໄດ້ອະທິຖານເພື່ອຈະຮູ້ວ່າ ເມື່ອໃດທີ່ຖານະປະໂລຫິດ ແລະ ພອນພຣະວິຫານສາມາດຖືກມອບໃຫ້ກັບທຸກຄົນໄດ້.
Saints, 4:71
ເຮເວຊິໂອ ແລະ ຣູດາໄດ້ຕັດສິນໃຈລອງໄປໂບດ. ໄພ່ພົນຢູ່ທີ່ນັ້ນມີຄວາມຮັກ ແລະ ມີເມດຕາຫລາຍ. ຄອບຄົວມາຕິນສ໌ມັກສິ່ງທີ່ເຂົາເຈົ້າໄດ້ຮຽນຮູ້ຢູ່ໂບດ.
Saints, 4:231–32
ມື້ໜຶ່ງ, ຂະນະທີ່ເດີນທາງກັບບ້ານຈາກໂບດ, ມາກັສໄດ້ບອກຄອບຄົວຂອງລາວວ່າ ລາວໄດ້ສັງເກດເຫັນວ່າເຂົາເຈົ້າເບິ່ງຄືມີຄວາມສຸກຫລາຍຂຶ້ນ. “ເຮົາຮູ້ວ່າແມ່ນຫຍັງເປັນສາເຫດ,” ມາກັສໄດ້ເວົ້າ. “ພຣະກິດຕິຄຸນຂອງພຣະເຢຊູຄຣິດ.” ຄົນອື່ນໆໃນຄອບຄົວຮູ້ວ່າ ມາກັສໄດ້ເວົ້າຖືກ. ເຂົາເຈົ້າໄດ້ຕັດສິນໃຈຮັບບັບຕິສະມາ ແລະ ຮັບການຢືນຢັນ.
Saints, 4:232
ຫລາຍປີຕໍ່ມາ, ໄພ່ພົນໃນປະເທດບຣາຊິນໄດ້ຫຍຸ້ງຢູ່ກັບການສ້າງພຣະວິຫານ. ຄອບຄົວມາຕິນສ໌ຮູ້ສຶກຕື່ນເຕັ້ນ, ແຕ່ເຂົາເຈົ້າກໍໂສກເສົ້າເຊັ່ນກັນ. ເຂົາເຈົ້າບໍ່ສາມາດເຂົ້າໄປໃນພຣະວິຫານ ຫລັງຈາກການອຸທິດ. “ບໍ່ຕ້ອງເປັນຫ່ວງ,” ເຮເວຊິໂອໄດ້ບອກຣູດາ. “ພຣະຜູ້ເປັນເຈົ້າຮູ້ທຸກສິ່ງທຸກຢ່າງ.”
Saints, 4:293–94
ມັນບໍ່ງ່າຍທີ່ຈະຍຶດໝັ້ນຢູ່ໃນຄວາມຊື່ສັດ. ຜູ້ຄົນໄດ້ເວົ້າເຍາະເຍີ້ຍຄອບຄົວມາຕິນສ໌. ແມ່ນແຕ່ໝູ່ເພື່ອນຂອງເຂົາເຈົ້າກໍບໍ່ເຂົ້າໃຈວ່າ ເປັນຫຍັງເຂົາເຈົ້າຈຶ່ງຢູ່ກັບສາດສະໜາຈັກ. ແຕ່ເຮເວຊິໂອ ແລະ ຄອບຄົວຂອງລາວຮູ້ວ່າ ມັນແມ່ນສາດສະໜາຈັກຂອງພຣະເຢຊູຄຣິດ.
Saints, 4:251–52
ມື້ໜຶ່ງ, ເມື່ອເຮເວຊິໂອໄດ້ກັບມາບ້ານຈາກບ່ອນທຳງານ, ຣູດາໄດ້ເວົ້າວ່າ, “ຂ້ອຍມີຂ່າວດີ, ຂ່າວທີ່ໜ້າອັດສະຈັນ!” ຫລັງຈາກທີ່ໄດ້ຖືສິນອົດເຂົ້າ ແລະ ອະທິຖານຢ່າງຫລວງຫລາຍ, ສາດສະດາ, ປະທານສະເປັນເຊີ ດັບເບິນຢູ ຄິມໂບ, ກໍໄດ້ຮັບການເປີດເຜີຍ. ພຣະເຈົ້າໄດ້ບອກເພິ່ນວ່າ ທຸກຄົນ, ບໍ່ຈຳແນກຜິວສີ, ສາມາດໄດ້ຮັບພອນທຸກປະການຈາກຖານະປະໂລຫິດ ແລະ ພຣະວິຫານໄດ້.
ຂໍ້ປະກາດຢ່າງເປັນທາງການ 2; Saints, 4:318–19
ຄອບຄົວມາຕິນສ໌ ແລະ ຄົນອື່ນໆໄດ້ລໍຄອຍເປັນເວລາດົນນານ. ການລໍຄອຍໄດ້ສິ້ນສຸດລົງແລ້ວ! ເຮເວຊິໂອ ແລະ ມາກັສໄດ້ຮັບຖານະປະໂລຫິດ. ເຮເວຊິໂອ, ຣູດາ, ແລະ ລູກໆຂອງເຂົາເຈົ້າໄດ້ຖືກຜະນຶກເປັນຄອບຄົວໃນພຣະວິຫານ. ບັດນີ້ເຂົາເຈົ້າສາມາດໄດ້ຮັບພອນທຸກປະການຂອງພຣະກິດຕິຄຸນ.
Saints, 4:319–21