ພະຍານເຫັນແຜ່ນຈາລຶກພຣະຄຳພີມໍມອນ

ການສະແດງປະຈັກພະຍານຕໍ່ໂລກ

ຜູ້ຄົນໃນເມືອງຈຳນວນໜຶ່ງບໍ່ພໍໃຈກັບໂຈເຊັບ ສະມິດ.

ໂຈເຊັບ, ເອມມາ, ແລະ ອໍລີເວີໄດ້ສືບຕໍ່ແປແຜ່ນຈາລຶກຄຳຢູ່ທີ່ເຮືອນສະມິດ ໃນລັດເພັນໂຊເວເນຍ. ແຕ່ຜູ້ຄົນໃນເມືອງຂອງພວກເພິ່ນຕ້ອງການທີ່ຈະຢຸດພວກເພິ່ນ. ອໍລີເວີມີເພື່ອນຄົນໜຶ່ງຊື່ເດວິດ ວິດເມີ ທີ່ອາໄສຢູ່ລັດນິວຢອກ. ອໍລີເວີໄດ້ຖາມເດວິດວ່າພວກເພິ່ນຂໍຍ້າຍເຂົ້າໄປຢູ່ກັບຄອບຄົວວິດເມີເພື່ອສຳເລັດການແປນີ້ໄດ້ຫລືບໍ່.

Saints, 1:68

ເດວິດ ວິດເມີ ໄດ້ຕ້ອນຮັບໂຈເຊັບ, ເອມມາ, ແລະ ອໍລີເວີສູ່ເຮືອນຂອງເພິ່ນ.

ເດວິດ ແລະ ຄອບຄົວຂອງເພິ່ນເຫັນດີ. ພວກເພິ່ນຍິນດີຕ້ອນຮັບໂຈເຊັບ, ເອມມາ, ແລະ ອໍລີເວີເຂົ້າສູ່ບ້ານຂອງພວກເພິ່ນ. ບັດນີ້ ພວກເພິ່ນສາມາດເຮັດວຽກການແປໄດ້ຢ່າງສະຫງົບ. ມີຫລາຍຄົນທີ່ອາໄສຢູ່ທີ່ບ້ານຂອງວິດເມີ. ນັ້ນກໍໝາຍຄວາມວ່າມີວຽກງານຫລາຍຢ່າງທີ່ຕ້ອງເຮັດ, ໂດຍສະເພາະແມ່ນແມຣີ, ແມ່ຂອງເດວິດ.

Saints, 1:68-70.

ມື້ໜຶ່ງ, ໃນຂະນະທີ່ແມຣີກຳລັງເຮັດວຽກຢູ່, ທູດໂມໂຣໄນໄດ້ມາຢ້ຽມຢາມລາວ. ເພິ່ນໄດ້ກ່າວວ່າ ເພິ່ນຮູ້ດີວ່າການມີວຽກເພີ່ມທັງໝົດນັ້ນເຮັດໃຫ້ລາວເມື່ອຍ. ເພິ່ນຕ້ອງການທີ່ຈະເພີ່ມຄວາມເຂັ້ມແຂງໃຫ້ກັບສັດທາຂອງລາວ. ເພິ່ນໄດ້ເປີດຖົງອອກ ແລະ ດຶງເອົາແຜ່ນຈາລຶກຄຳອອກມາ. ເພິ່ນໄດ້ເປີດໄປໜ້າຕ່າງໆ ແລະ ໄດ້ສະແດງໃຫ້ແມຣີເຫັນການຂຽນນັ້ນ. ເພິ່ນໄດ້ສັນຍາກັບແມຣີວ່າລາວຈະໄດ້ຮັບພອນ.

Saints, 1:70–71.

ເດວິດ ວິດເມີ, ມາຕິນ ແຮຣິສ, ແລະ ອໍລີເວີ ຄາວເດີຣີ ໄດ້ຖາມໂຈເຊັບວ່າພວກເພິ່ນສາມາດເປັນພະຍານໄດ້ບໍ.

ບາງຄົນຍັງບໍ່ເຊື່ອວ່າແຜ່ນຈາລຶກນັ້ນເປັນຄວາມຈິງ. ໂຈເຊັບໄດ້ເຊື່ອຟັງພຣະບັນຊາຂອງພຣະຜູ້ເປັນເຈົ້າທີ່ຫ້າມບໍ່ໃຫ້ສະແດງແຜ່ນຈາລຶກນັ້ນໃຫ້ໃຜເຫັນ. ພຣະຜູ້ເປັນເຈົ້າໄດ້ກ່າວວ່າ ພຣະອົງຈະໃຫ້ພະຍານເພີ່ມອີກສາມຄົນເຫັນແຜ່ນຈາລຶກນັ້ນ. ເດວິດ ວິດເມີ, ມາຕິນ ແຮຣິສ, ແລະ ອໍລີເວີ ຄາວເດີຣີ ໄດ້ຂໍໃຫ້ພວກເພິ່ນເປັນພະຍານໄດ້ບໍ. ພຣະຜູ້ເປັນເຈົ້າໄດ້ກ່າວວ່າພວກເພິ່ນເປັນໄດ້.

ຄຳສອນ ແລະ ພັນທະສັນຍາ 5:11–12; 17; Saints, 1:73

ໂຈເຊັບ, ມາຕິນ, ອໍລີເວີ, ແລະ ເດວິດກຳລັງອະທິຖານເພື່ອໃຫ້ໄດ້ເຫັນແຜ່ນຈາລຶກຄຳ.

ໂຈເຊັບ, ມາຕິນ, ອໍລີເວີ, ແລະ ເດວິດໄດ້ເຂົ້າໄປໃນປ່າ. ພວກເພິ່ນໄດ້ຄຸເຂົ່າ ແລະ ປ່ຽນກັນທູນຖາມພຣະເຈົ້າວ່າພວກເພິ່ນສາມາດເຫັນແຜ່ນຈາລຶກນັ້ນໄດ້ຫລືບໍ່, ແຕ່ກໍບໍ່ມີຫຍັງເກີດຂຶ້ນ.

Saints, 1:73

ມາຕິນ ແຮຣິສ ໄດ້ຮູ້ສຶກວ່າເພິ່ນເປັນຕົ້ນເຫດທີ່ເຮັດໃຫ້ຄຳອະທິຖານຂອງພວກເພິ່ນບໍ່ໄດ້ຮັບຄຳຕອບ. ມາຕິນໄດ້ອອກໄປ, ແລະ ຄົນອື່ນໆຍັງສືບຕໍ່ອະທິຖານ.

Saints, 1:73

ທູດອົງໜຶ່ງປະກົດຕົວຕໍ່ອໍລີເວີ, ເດວິດ, ແລະ ໂຈເຊັບ.

ແລ້ວທູດສະຫວັນອົງໜຶ່ງໄດ້ປະກົດຕົວໃນແສງອັນເຈີດຈ້າ. ເພິ່ນໄດ້ສະແດງແຜ່ນຈາລຶກຄຳ ແລະ ຂໍ້ຄວາມທີ່ຂຽນໃນນັ້ນໃຫ້ກັບອໍລີເວີ ແລະ ເດວິດໄດ້ເຫັນ. ພວກເພິ່ນໄດ້ຍິນສຸລະສຽງຂອງພຣະເຈົ້າກ່າວວ່າ ໂຈເຊັບໄດ້ແປແຜ່ນຈາລຶກນີ້ດ້ວຍອຳນາດຂອງພຣະເຈົ້າ ແລະ ການແປນັ້ນແມ່ນຖືກຕ້ອງ. ພຣະເຈົ້າຍັງໄດ້ກ່າວຕໍ່ພວກເພິ່ນອີກວ່າ ພວກເພິ່ນຄວນບອກກັບທຸກຄົນ ເຖິງສິ່ງທີ່ພວກເພິ່ນໄດ້ເຫັນ ແລະ ໄດ້ຍິນ.

“ປະຈັກພະຍານຂອງພະຍານສາມຄົນ”; Saints, 1:73–74

ທູດອົງໜຶ່ງໄດ້ປະກົດຕົວຕໍ່ມາຕິນ ແລະ ໂຈເຊັບ.

ໂຈເຊັບໄດ້ອອກໄປຊອກຫາມາຕິນ. ເພິ່ນຍັງອະທິຖານຢູ່. ໂຈເຊັບໄດ້ອະທິຖານກັບເພິ່ນ. ແລ້ວທູດໄດ້ປະກົດຕົວ ແລະ ສະແດງແຜ່ນຈາລຶກໃຫ້ກັບມາຕິນໄດ້ເຫັນ, ຄືກັນກັບທີ່ເພິ່ນໄດ້ເຮັດກັບອໍລີເວີ ແລະ ເດວິດ.

Saints, 1:74

ໂຈເຊັບບອກພໍ່ແມ່ຂອງເພິ່ນວ່າຄົນອື່ນໄດ້ເຫັນແຜ່ນຈາລຶກຄຳ.

ຕໍ່ມາ, ໂຈເຊັບໄດ້ໄປຫາພໍ່ແມ່ຂອງເພິ່ນ, ທີ່ກຳລັງຢ້ຽມຢາມແມຣີ ວິດເມີ ຢູ່. ເພິ່ນໄດ້ບອກພໍ່ແມ່ຂອງເພິ່ນວ່າເພິ່ນດີໃຈຫລາຍທີ່ຄົນອື່ນໄດ້ເຫັນແຜ່ນຈາລຶກຄຳແລ້ວ. ບັດນີ້ພະຍານກໍສາມາດບອກກັບຜູ້ຄົນວ່າໂຈເຊັບເວົ້າຄວາມຈິງ. ມາຕິນບອກກັບທຸກຄົນວ່າເພິ່ນດີໃຈຫລາຍທີ່ພຣະເຈົ້າໄດ້ອະນຸຍາດໃຫ້ເພິ່ນເປັນໜຶ່ງໃນພະຍານ.

Saints, 1:74–75

ມີເພີ່ມອີກແປດຄົນທີ່ໄດ້ຮັບເປັນພະຍານເຫັນແຜ່ນຈາລຶກຄຳ.

ສອງສາມມື້ຕໍ່ມາ, ພຣະຜູ້ເປັນເຈົ້າໄດ້ບອກໂຈເຊັບໃຫ້ສະແດງແຜ່ນຈາລຶກຄຳໃຫ້ອີກແປດຄົນໄດ້ເຫັນ—ພໍ່ຂອງເພິ່ນ, ອ້າຍຂອງເພິ່ນອີກສອງຄົນ, ອ້າຍນ້ອງຂອງເດວິດອີກສີ່ຄົນ, ແລະ ນ້ອງເຂີຍຂອງເດວິດ. ເຂົາເຈົ້າໄດ້ຖືແຜ່ນຈາລຶກ ແລະ ເປີດໄປໜ້າຕ່າງໆ. ເຂົາເຈົ້າຮູ້ຈັກວ່າແຜ່ນຈາລຶກນັ້ນມີຈິງ.

“ປະຈັກພະຍານຂອງພະຍານແປດຄົນ”; Saints, 1:75

ໂຈເຊັບ ແລະ ມາຕິນກຳລັງເບິ່ງຕົ້ນສະບັບທີ່ຖືກຈັດພິມ.

ບັດນີ້ການແປພຣະຄຳພີມໍມອນໄດ້ສຳເລັດແລ້ວ. ໂຈເຊັບໄດ້ສົ່ງແຜ່ນຈາລຶກຄຳຄືນໃຫ້ທູດໂມໂຣໄນ. ບັດນີ້ເຖິງເວລາທີ່ຈະພິມສຳເນົາໜັງສືນີ້ເພື່ອທຸກໆຄົນຈະໄດ້ອ່ານ ແລະ ຮຽນຮູ້ກ່ຽວກັບພຣະເຢຊູຄຣິດຫລາຍຂຶ້ນ.

Saints, 1:75–76

ໂຈເຊັບ ແລະ ມາຕິນກຳລັງສະເຫລີມສະຫລອງການຈັດພິມພຣະຄຳພີມໍມອນ.

ມັນໃຊ້ເງິນຈຳນວນຫລວງຫລາຍໃນການພິມພຣະຄຳພີມໍມອນ. ມາຕິນ ແຮຣິສ ໄດ້ຂາຍທີ່ດິນສ່ວນໜຶ່ງຂອງຟາມເພິ່ນເພື່ອຈ່າຍຄ່າພິມ. ເພິ່ນໄດ້ກະທຳໄປຍ້ອນເພິ່ນຮູ້ຈັກວ່າພຣະຄຳພີມໍມອນເປັນຄວາມຈິງ. ໜັງສືທຸກເຫລັ້ມມີປະຈັກພະຍານຂອງມາຕິນ ແລະ ພະຍານຄົນອື່ນໆໃຫ້ທຸກຄົນໄດ້ອ່ານ. ພະຍານເຫລົ່ານັ້ນບໍ່ເຄີຍປະຕິເສດປະຈັກພະຍານຂອງພວກເພິ່ນ.

ຄຳສອນ ແລະ ພັນທະສັນຍາ 19:26–27, 34–35; Saints, 1:76–78