“ໄຂ່ມຸກອັນລ້ຳຄ່າ,” ເລື່ອງຄຳສອນ ແລະ ພັນທະສັນຍາ (2024)
“ໄຂ່ມຸກອັນລ້ຳຄ່າ,” ເລື່ອງຄຳສອນ ແລະ ພັນທະສັນຍາ
ເດືອນກໍລະກົດ 1835–ເດືອນມີນາ 1842
ໄຂ່ມຸກອັນລ້ຳຄ່າ
ພຣະຄຳພີເພີ່ມເຕີມຈາກພຣະຜູ້ເປັນເຈົ້າ
ມື້ໜຶ່ງ, ຊາຍຄົນໜຶ່ງໄດ້ມາທີ່ເມືອງເຄີດແລນພ້ອມກັບມຳມີຈາກປະເທດເອຢິບ. ພ້ອມກັບມຳມີເຫລົ່ານີ້ກໍມີມ້ວນໜັງສື, ຫລື ມ້ວນກະດາດທີ່ເກົ່າແກ່ບາງຈຳນວນ. ມ້ວນໜັງສືມີຕົວອັກສອນເອຢິບຂຽນຢູ່ໃນນັ້ນ. ຊາຍຄົນນັ້ນໄດ້ສະແດງມັນແກ່ສາດສະດາໂຈເຊັບ ສະມິດ. ໂຈເຊັບສົນໃຈໃນການຂຽນເຫລົ່ານັ້ນ.
Saints, 1:219–20
ໝູ່ເພື່ອນບາງຄົນໄດ້ຊ່ວຍໂຈເຊັບຊື້ມຳມີ ແລະ ມ້ວນໜັງສື. ຂະນະທີ່ໂຈເຊັບສຶກສາການຂຽນເຫລົ່ານັ້ນ, ພຣະຜູ້ເປັນເຈົ້າໄດ້ເປີດເຜີຍການຂຽນບູຮານຂອງອັບຣາຮາມ, ສາດສະດາໃນພຣະຄຣິສຕະທຳຄຳພີ. ດ້ວຍຄວາມຊ່ວຍເຫລືອຈາກໝູ່ເພື່ອນເຊັ່ນ ອໍລີເວີ ຄາວເດີຣີ, ໂຈເຊັບໄດ້ຂຽນສິ່ງທີ່ພຣະຜູ້ເປັນເຈົ້າສິດສອນເພິ່ນກ່ຽວກັບຄຳສອນຂອງອັບຣາຮາມ.
Saints, 1:220
ອັບຣາຮາມໄດ້ເຫັນພາບນິມິດກ່ຽວກັບຊີວິດຂອງເຮົາກັບພຣະບິດາເທິງສະຫວັນກ່ອນເຮົາໄດ້ມາເກີດ. ເພິ່ນເຫັນວ່າພຣະເຢຊູໄດ້ຖືກເລືອກໃຫ້ເປັນພຣະຜູ້ຊ່ວຍໃຫ້ລອດຂອງເຮົາ. ອັບຣາຮາມກໍຍັງຮຽນຮູ້ກ່ຽວກັບການສ້າງໂລກນີ້ນຳອີກ. ໄພ່ພົນຮູ້ສຶກຕື່ນເຕັ້ນທີ່ໄດ້ຮັບການສິດສອນເຫລົ່ານີ້ຈາກອັບຣາຮາມ. ເຂົາເຈົ້າດີໃຈທີ່ພຣະຜູ້ເປັນເຈົ້າຕ້ອງການສິດສອນເຂົາເຈົ້າເພີ່ມເຕີມ.
ອັບຣາຮາມ 2:6–11; 3–5; Saints, 1:220
ການຂຽນຂອງອັບຣາຮາມກາຍເປັນສ່ວນໜຶ່ງຂອງພຣະຄຳພີທີ່ເອີ້ນວ່າ ໄຂ່ມຸກອັນລ້ຳຄ່າ. ໜັງສືເຫລັ້ມນີ້ກໍມີການຂຽນຂອງໂມເຊນຳອີກ, ສາດສະດາອີກຄົນໜຶ່ງໃນພຣະຄຣິສຕະທຳຄຳພີ. ມັນສິດສອນຄວາມຈິງທີ່ຂາດຫາຍໄປຈາກພຣະຄຣິສຕະທຳຄຳພີ. ພຣະຜູ້ເປັນເຈົ້າຕ້ອງການໃຫ້ຜູ້ຄົນຮູ້ຄວາມຈິງເຫລົ່ານີ້, ສະນັ້ນພຣະອົງຈຶ່ງໄດ້ແບ່ງປັນຄວາມຈິງກັບໂຈເຊັບ ສະມິດ.
ໄຂ່ມຸກອັນລ້ຳຄ່າກໍມີປະຈັກພະຍານຂອງໂຈເຊັບ ສະມິດ ແລະ ຫລັກແຫ່ງຄວາມເຊື່ອ 13 ຂໍ້ນຳອີກ. ໂຈເຊັບ ສະມິດ ໄດ້ຂຽນເລື່ອງເຫລົ່ານີ້ ເພື່ອບອກໂລກເຖິງຄວາມເຊື່ອຂອງໄພ່ພົນຍຸກສຸດທ້າຍ. ໄຂ່ມຸກອັນລ້ຳຄ່າເປັນໜັງສືເຫລັ້ມນ້ອຍ, ເຊັ່ນດຽວກັບໄຂ່ມຸກທີ່ເລັກນ້ອຍ, ແຕ່ມີຄ່າຢ່າງຫລວງຫລາຍ.